Aningaasanut karsi imaqanngilaq: Kommune Kujallermi ukioq manna nutaanik atorfinitsitsisoqassanngitsoq
![](/sites/default/files/styles/image_934x467/public/2024-03/Qanorooq%2012.03.2024%20Still.jpg?itok=khSBQwjo)
Kommune Kujalleq sipaarniarneroqqittariaqarpoq. Kommunip aningaasaqarneranik aaqqiiniarluni misiliinerit arlallit iluatsinnginnerisa kingunerisaanik atorfinitsitsinerit ukiup sinnerani unitsinneqarallarput.
Kommune Kujalleq nittartakkamini paasissutissiivoq.
Atorfiit kommunimi suliaqarnermi inatsisitigut piumasaqaatitaqanngitsut inuttalerneqanngikkallassapput.
Ilinniartitsisutut, meeqqerivinni paaqqutarinniffinnilu sulisutut atorfiit inatsisitigut piumasaqaataasut suli atorfinitsitsiffiussapput.
- 2024-imi ilimagineqartutut naatsorsuutit takutippaat annertuumik atuinerusoqarsimasoq, taamaattumik taama suliniuteqartoqaqqinnissaa pisariaqarsimavoq. Kommune angalanernut, pisiniarnernut sulisoqarnikkullu sukaterisareersimavoq, taamaakkaluartorli sukaterisoqaqqinnissaa pisariaqartinneqartoq paasinarsivoq, borgmesteri, Stine Egede (IA) tusagassiuutinut nalunaarummi oqarpoq.
40 millionit periarfeerunneqariataartut
Kommune Kujalliup Namminersorlutik Oqartussanut akileraarutinik A-nik 40 millionit koruuniusunik akiliisimannginnera aningaasaqarnermut ataatsimiititaliamit maajimi paasineqariataarmalli aningaasaqarnera pitsaanngilaq.
Taamaammat kommunip akiliutigeriaannagassatut aningaaserivimmit atukkami 25 millionit koruuninit 100 millionit koruuninut qaffanneqarnissaannut qinnuteqarniarluni aalajangerpaa.
Stine Egedep tamanna kommunimi innuttaasunut sunniuteqarnavianngitsoq sipaarniartoqalernavianngitsorlu taamani neriorsuutigaa.
Demokraatit tamanna isumaqatigivallaanngilaat, taakkulu kommunalbestyrelsimit juunip aallartinnerani tunuarput, Inuit Ataqatigiit taamaalillutik amerlanerussuteqaqqalaalerlutik.
Demokraatit kommunalbestyrelsimi immikkut ittumik ataatsimiittoqarnerani Stine Egedemut tatiginnikkunnaarnissamik aamma siunnersuuteqarput, tamannali kommunalbestyrelsimit amerlanerussuteqartunit itigartitsissutigineqarpoq.
Tamatumalu kingornali IA-p kommunip ilorraap tungaanut ingerlaleqqinniarsaraa, taakkuli kommunip ingerlatsinerani aningaasartuutinik annikillisaaniarlutik suliniutaat naammattumik sunniuteqanngillat, taamaammat maanna sukaterinerusariaqarput.
Atorfinitsitsinerit unitsinneqarallarnerata saniatigut kommunip suliassaani inatsisitigut piumasaqaatitaqanngitsunik niuerniarnerit aamma unitsinneqarput.