Kommune Kujalleq 40 millionit koruuninik akileraarutinut akiitsoqartoq
Kommune Kujalliup aningaasaatai qiviaraanni ingerlanerliorpoq.
Kommune Kujallermi naatsorsuuserinermi kukkunerpassuit pissutigalugit 2024-mi missingersuutini 8 millionit koruuninik atuinerusoqarpoq.
Tamatuma saniatigut aningaasaqarnermut ataatsimiititaliaq Namminersorlutik Oqartussanut qaammatini pingasuni akileraarutinik A-nik akiliisoqarsimanngitsoq ilisimatinneqarpoq. Taakku 40 millionit koruunit missaanniipput.
Kommune Kujalleq nittartakkamini allappoq.
Taamaammat kommunip aningaaserivimmi akiliutigeriiaannagassatut atukkani 25 millionit koruuninit 100 millionit koruuninut qaffanniarpai. Tamanna periarfissaanngippat kommune aningaaserivimmut taarsigassarsiniarpoq. Tamanna kommunalbestyrelsip maajip 22-ani ataatsimiinnermi isumaqatigiiffiusumik akuersissutigaa.
Pissutsit ilungersunartut Kommune Kujallermi borgmesterip, Stine Egedep (IA) uissuummissutigai.
- Soorunami tupaqaanga, aamma nuanniillioqaanga, tujormillungalu assut, taanna KNR-imut oqarpoq.
- Kisianni tassa paasiniariarlugu susoqartoq iliuuseqarluta aallartippugut. Aamma masskkut qujartumik aningaasaqarnermut ataatsimiititaliap innersuussutitaa aamma kommunalbestyrelsip tamarmiusup ippassaq akuersissutigivaa, tassalu akiliutigeriaannagassatut atukkat qaffanneqarnissaat 100 millioninut, borgmesteri oqarpoq.
Kommune aningaasaqarnermut naalakkersuisoqarfimmut attaveqarpoq. Suna akilersinnaanerunersoq apeqqutaatillugu akiliutigeriiaannagassatut atukkanut imaluunniit aningaaserivimmut taarsigassarsinissamut Naalakkersuisut akuersinissaat maanna utaqqivaat.
Qanoq taama ajortigisinnaava?
Tamanna kommunip ersarissumik suli akisinnaanngilaa. Ingerlatsiviit naatsorsuuserinerit akiliinerillu sorliit atuinerujussuusoqarneranut pissutaanersut maanna misissuleruttorpaat.
Kommunimi kikkut tamarmik naammagisimaarinninngillat. Aningaasaqarnermut ataatsimiititaliap aningaasaqarnermik ingerlatsivik isornartorsiorpaa. Ingerlatsiviummi kommune Namminersorlutik Oqartussanut akileraarutinik A-nik akiitsoqartoq paasigamikkut ataatsimiititaliaq ilisimatittussaagaluarpaat.
Aningaasaqarnermut ingerlatsivik kukkunerit taama ittut qanoq pinaveersaartinniarnerlugit saqqummiivoq. Taamalu pisoqaqqinnginnissaa kommunalbestyrelsip maanna neriuutigaa.
Aqutsisullu missingersuutit aqunneqarsinnaanissaat pissutigalugu 2024-mut iluarseeqqinnissamut pilersaarusiornissamik eqqartueqatigiipput. Aningaasaqarnermillu suliaqartut piffissami qaninnermi ilinniartinneqassapput.
Kommunimi akileraarutip procentia innuttaasunut 1 procentimik appasinnerulersinneqassasoq kommunip 2023-mi novembarimi nalunaarutigaa.
Tamanna innuttaasunut qanoq sunniuteqassava?
Sunniuteqassanngitsoq borgmesteri oqarpoq.
Taassuma kommunip pissutsit ilungersunarluinnartutut isigai akiligassaminnillu akiliisarlutik oqaatigaa. Aammattaaq aningaasaqarnermik nakkutilliineq pitsaanerulersinneqassaaq.
- Erseqqissaatigissavara kommunip aningaasaqarneranut sumilluunniit sunniuteqarnavianngilaq. Aamma ulluinnarni ingerlatatsinnut, suliatsinnut, minnerpaamilluunniit sunniuteqartussaanngilaq, sipaarniarnerput ullumikkut sukannersumik ingerlatsinerput allanngortissanngilarput. Kisianni taassuma qaavatigut sipaarnerulernavianngilagut. Taamaattumik innuttaasut eqqissillutik pisinnaapput, taanna oqarpoq.
Aningaasaqarnermut pisortap pilersaarut saqqummiuppaa, 2024-llu affaanut naatsorsuutit aggustip aallartinnerani saqqummiunneqarnissaat neriorsuutigalugu, tassanilu pisoq nutaamik naliliiffigineqarumaarpoq.
