Kommunip akileraarnikinnerulernissaq ilimasaarutigaa – aningaasaqarnermilli suliallit 2021-mut ilimagisatik uniungaatsiaraat
![](/sites/default/files/styles/image_934x467/public/article_images/nanortalik_kommunekontor_kommune_kujalleq.jpg?itok=Lwxo5D7Q)
Kommune Kujalliup aningaasarsiornera ilorraap tungaanut ingerlavoq isumalluartoqarsinnaallunilu.
Borgmesteri Stine Egede (IA) aperigaanni taama isumaqartoqarpoq.
Kommunip aningaasarsiornerata ingerlalluarnera innuttaasunut iluaqutissanngortinniarneqarpoq, innuttaasummi 1 procentpointimik 2024-mi akileraarnikinnerunissaat aalajangerneqarpoq. Kommune Kujallermi 2024-mi akileraarut taamaasilluni 43 procentiussaaq.
Kommunimut akileraarut 28 procentimit 1 procentpointimik apparneqarluni 2024-mi 27 procentinngussaaq.
Kommune Kujalliup tusagassiorfinnut nalunaarutaa naapertorlugu tamanna 6 aamma 7 millionit koruunit akornanni naleqarpoq.
Kommune Kujalliup sinneqartooruteqarnermini innuttaasumik akileraarnikinnerulernissaannik aalajangernera ajoriffissaqartinnagu, Aningaasaqarnermut Naligiissitaanermullu Naalakkersuisoq Naaja Nathanielsen oqarpoq:
- Kommunip tamanna nammineq aalajangigassarilluinnarpaa. Tassa kommunit nammineertuunerisa siunertaa. Qanormi iliorpata pitsaanerussanersoq namminneq nalunngilaat, taanna KNR-imut oqarpoq.
Kujalliup siornatigut aningaasarsiornera qularnartulik
Kommune Kujalleq aningaasarsiornikkut siornatigut ajornartoorsimavoq.
14,6 millionit koruuninik sinneqartooruteqarnissaq, kommunip 2021-mi naatsorsuutigigaluarpaa.
Ukiorli naammat allarluinnarmik pisoqarpoq, naaatsorsuutimmi takutippaat kommuni 2,1 millionit koruuniinnarnik sinneqartooruteqartoq, tassa ilimagisamit 12,5 koruuninik appasinnerulluni. Borgmesteri Stine Egede (IA) KNR-imut taama ilisimatitsivoq.
Kommunip aningaasarsiornermut pisortaata Kim Rosendahlip oqarnera naapertorlugu ukiup ingerlanerani tapiliussatut aningaasaliissuteqartoqarsimanera matumani pissutaavoq, assersuutigalugu sanaartornermut tapiliussatut aningaasaliisoqarsimalluni.
![](/sites/default/files/styles/image_934x467/public/2023-05/Stine%20Egede%20akileraarut%20pillugu.jpg?itok=_2vHto_w)
Kommune Kujalliup missingersuutini ukioq taanna ukiup qiteqqunnerani 17,4 milllionit koruuninik sipporeerpai. Aningaasaqarnermut ataatsimiititaliaq taamaalinerani iliuuseqartariaqalerpoq.
Kommunip aningaasarsiornerata sukateriffigineqarnissaa aningaasaqarnermut ataatsimiititaliap kinguninngua aalajangerpaa.
Kommune Kujallermi aningaasaqarnermi nutaamik aqutsissuteqalersimammat Kommune Kujalliup 2021-mut 2022-mullu naatsorsuutai suli naammassineqanngitsut, Kim Rosendahlip oqaatigaa.
Pissutsit nutaat, aningaasarsiorneq nutaaq
Borgmesterilli Stine Egedep oqarnera naapertorlugu 2023-mi aningaasarsiornermi naatsorsuutinut tunngatillugu taamaattoqarnavianngilaq.
Kommunimmi matumani 15,8 millionit koruuninik sinneqartooruteqarnissi naatsorsuutigaa.
Inatsisartulli missingersuutit naatsorsuutillu pillugit inatsisaat naapertorlugu kommunit ukiumut aningaasartuuteqarnerusinnaanerat killeqaraluartoq innuttaasutik akileraarnikinnerusoqalissasut Kommune Kujalleq aalajangerpoq. Kommunilu 2023-mut missingersuutiminik sippuisimanerluni nalugaluarlugu taamaaliorpoq.
Soorliuna kommuni missingersuutinik sippueqqissagaluaruni naammattunik aningaasaateqarnissamut sipaarnianngitsoq?
Aningaasaqarnermut Naligiissitaanermullu Naalakkersuisoqarfik naapertorlugu kommuni inatsisit naapertorlugit taamaaliorsinnaavoq.
Taamaaliorunilli pitsaasuunavianngitsoq, Kommune Kujalliup borgmesteria Stine Egede isumaqarpoq:
- Qanoq iliorutta pitsaanerussanersoq naaffeqanngitsumik oqallisigisinnaavarput. Aalajangereerpugulli. Nalornisigisimagaluarutsigu taama aalajangersimanavianngikkaluarpugut, taanna KNR-imut oqarpoq.
Naatsoorsuutisimi kukkuneqarpata qanoq iliussavisi?
- Natsorsuutivut kukkuneqanngillat.
2024-mut missingersuutit ukioru novembarimi aappassaaneerneqassapput.