Kommune Kujalleq sukannersumik nakkutigineqarunnaartoq
- Nuannaarutigeqaara Kommune Kujalleq aningaasaqarnerminik iluarsiinialersimammat.
- Kommuni imaannaanngitsunik nalaataqarsimavoq, suliassartilli pimoorussimavaat, ukiunilu tulliuttuni ajunngitsumik ineriartortoqalissasoq ilimagilluinnarpara, aningaasaqarnermut, aatsitassanut nunanullu allanut naalakkersuisoq Vittus Qujaukitsoq taama oqarpoq.
Aamma atuaruk Kommune Kujallermi aningaasatigut ingerlatsineq ajortumik ingerlavoq
Suliarineqarsinnaasut suliarisariaqakkallu
Aningaasaqarneq iluarsiiffiginiarlugu Kommune Kujalleq kommunimi suliassat tamarmik suliarineqarsinnaasunik suliarisariaqakkanillu agguaasimavoq. Missingersuutit pillugit isumaqatigiinniarnerit tassuuna oqinnerulersimapput. Kommunimi aqutsisutut sulisut ikilisinneqarsimapput, aamma kommuni nalimmassaanerit avataasiorlunilu saarullittassanik tulaassisussaatitaanerit aqqutigalugit isertitaqarnerulersimavoq.
- Suleqatigiilluta aningaasaqarnerput illuanut saatissinnaasimavarput. Sipaarniarfiusussat aaqqissuussaanikkullu allannguinerit kisiisa aqqutiginagit, kisiannili aamma aalisakkanik suliffissuarni sanaartortitsinernilu ataasiakkaani iluanaarutit annertusarnissaat isiginiarnerunerisigut.
- Tamatumunnga peqatigitillugu kommunimi aningaasartuutit aalajangersimasut allanngorartullu ikinnerulersissimavagut. Naalakkersuisut paasinnilluarsimapput nunatsinni pisortat suliassaasigut akileraarutitigut isertinneqartut aqqutigalugit nalimmassaanermut aaqqissuussinermik naleqqunnerusumik pilersitsinissaminnut, borgmester Jørgen Wæver Johansen taama oqarpoq.
Kommune Kujalliup aningaasaqarnerminik sukaterisimanera naalakkersuisup Vittus Qujaukitsup nuannaarutiginerarpaa.
Aamma atuaruk Kujalleq Qaasuitsorlu nakkutigineqartut
Qaasuitsup Kommunia taamaalilluni kisiartaalluni suli sukannersumik nakkutigineqarpoq.
