Kommune Kujallermi aningaasatigut ingerlatsineq ajortumik ingerlavoq
Kommune Kujalliup aningaasatigut inissisimanini Naalakkersuisunut nalunaarutigisartussanngorpai.
Kommuneqarfik Sermersuup nakkutigisaanera unippoq kisianni kommune kujalleq maanna sukannersumik nakkutigisaavoq.
Kommune Kujalleq Kommunit Nakkutilliisoqarfianit siornali marsip 15-iani sukannersumik nakkutigineqalerpoq.
Taama uppernarsaavoq kommune kujallermi kommunaldirektøri Frank Hedegaard Jørgensen.
Kommune Kujalleq taarsigassarsivoq
Kommune Kujalliup aningaasatigut ingerlatsinera ukiuni arlaqartuni ajortumik ingerlasimavoq, Kommune Kujallerlu 2011-imi Namminersorlutik Oqartussanit 37 million koruuninik taarsigassarsivoq.
Taarsigassat isumaqatigiissut malillugu ukiumi naatsorsuiffimmi 2013-2014-imi taarserneqartussaapput.
Taarsigassalli kommunip akilersinnaasimanngilai, 2014-illu naalernerani kommunip taarsigassai 40 million koruunit angusimavai.
Taamaattumik kommune sukannersumik nakkutigineqalerpoq.
Taarsiinissamut isumaqatigiipput
Namminersorlutik Oqartussat Kommune Kujalliullu taarsigassarsiat naatsorsuiffimmi 2015-2016-imi qaammatikkaartumik 250.000 koruunikkaarlugit akilerneqartassasut, naatsorsuiffimmilu 2016-imit 2019-imut qaammatikkaartumik 750.000 koruunikkaarlugit akilerneqartassasut isumaqatigisiissutigaat. Ukioq 2020-milu 1,1 million koruunit sinnilaarlugit qaammammut akilerneqartassasut isumaqatigiissutigineqarpoq.
Kommunit aningaasatigut siorna nalimmassarneqarneqarmata, Kommune Kujalleq 23 million koruuninik pissarsivoq.