Kommune Kujalleq pisortassaaleqimmat, kommunimi tassani politikerit utaqqipput. Assi: KNR / Jørgen Semionsen

Kommune Kujalleq pisortassarsiortoq

Kommune Kujalleq maannakkorpiaq sisamanik pisortassaaleqivoq. Aamma pisortaanissaaleqillunilu pisortaanermut tullersortissaaleqivoq.

Kommune Kujalleq pisortassaaleqingaatsiarpoq. 

- Kommune Kujallermi pisortaqarniarnikkut massakkut qinigaaffiup siuliani aallartittumik ajornartorsiuteqarpugut, kommunalbestyrelsimi IA-p gruppiani siulittaasoq Naja Lund oqarpoq.

- Tassa pisortaagallartunik arlalinnik atorfeqartitsivugut, aamma pisortaanermik inuttassarsiuussineq massakkut ingerlanneqarluni.

Kommune Kujallermi ingerlatsivinni arfiniliusuni sisamat pisortassarsiuunneqartut pisortaagallartunit maanna aqunneqartut tassaapput, inunnik isumaginninnermi ingerlatsivik, atuarfeqarnermut meeqqeriveqarnermullu ingerlatsivik, teknikkeqarnermut ingerlatsivik inuussutissarsiornermullu ingerlatsivik.

Borgmesteri: Nalaatsornerinnaavoq

Kommune Kujallermi pisortat taarseraannerpassui nalaatsornerinnaasoq, borgmesterinngorlaaq Stine Egede (IA) oqarpoq. Kommunip allaffeqarfiani saliisoqassasoq, borgmesteri qineqqusaarnermi arlaleriarluni oqarpoq.

- Kommunimi soraarsitsiortortoqanngilaq. Ingerlatsivinni pisortat taarsersorneqarnerat nalaatsornerinnaavoq, Stine Egede Sermitsiaq.AG-mut oqarpoq.

Borgmesteri suliat ataasiakkaat pillugit oqaaseqarusunngilaq, soraartullu sulianut attuumassuteqanngitsut erseqqissaatigalugu.

- Suliat ataasiakkaat pillugit oqaaseqarsinnaanngilanga. Sulisut taarseraannerpassui nalaatsornerinnaavoq. Allamik oqaaseqarsinnaanngilanga, Stine Egede (IA) oqarpoq.

Kommunimi pisortatut atorfiit assigiinngitsut sisamat qinersisoqanngitsorli inuttaqarsimanngillat. Taakku tassaapput, pisortaanertut, pisortap tulliatut, isumaginninnermi pisortatut atuarfeqarnermilu pisortatut atorfiit.

Politikerit utaqqisut

Kommunip allaffeqarfiani pisortatut atorfiit marluk allat maanna aamma inuttaqanngillat – tamannalu politikerinut pisarissersuutaasoq, Naja Lund naliliivoq.

- Pisortaanertut atorfik inuttalerneqareerpat kommunemi allannguiniarluta qineqqusaarutigisavut pillugit sulineq aallartissinnaangussavarput, taanna oqarpoq.

- Innuttaasunut qanilaarnerusumik sullissilernissamut sukkanerusumillu sullissinerit ingerlanneqalernissaannut neriulluarpugut.

IA Kommune Kujallermut Siumup siuttuuffigilluinnarsimasaani qinersinermi kingullermi qinersisut affaasa sinnerinit taaguunneqarluarmat qinersiseqarnerpaavoq.

IA Nalerarlu suleqatigiipput. Taakku isumaginninnermik sulinerup pitsanngorsaneqarnissaa piumasaraat – Kuannersuarnilu aatsitassarsiulersaarnermut aamma akerliulluinnarput. 

Kommuni Kujallermi pisortatut atuuffiit pisortaanerugallartunik maanna inuttallit katillutik arfiniliusut allattorsimaffiat kommunip nittartagaanit pissarsiaraarput:

  • Pisortaanerugallartoq, Max Heilmann Larsen
  • Pisortaanermut tullersortiugallartoq, Kim Rosendahl
  • Teknikkimut Avatangiisinullu Ingerlatsivimmi pisortaagallartoq, Josef Kreutzmann
  • Kulturimut, Sunngiffimmut Pinaveersaartitsinermullu Ingerlatsivimmi pisortaq, Mikael Mansi Rasmussen
  • Isumaginninnermut Ingerlatsivimmi pisortaagallartoq, Arnaraq Dorph
  • Atuarfeqarnermut, Meeqqeriveqarnermut Nutaaliornermullu Ingerlatsivimmi pisortaagallartoq, Ruth Jakobsen
  • Inuussutissarsiornermut Suliffeqarnermullu Ingerlatsivimmi pisortaagallartoq, Poul Jørgensen
  • Aningaasaqarermut Pilersaarusiornermullu Ingerlatsivik, Kim Rosendahl

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat