Demokraatit 40 millionit koruunit pissutigalugit tunuartut

Nalunaaqutaq 13.50 borgmesterip oqaaseqarneranik nutarterneqarpoq.

Demokraatit Kommune Kujallermi Inuit Ataqatigiit suleqatigerusukkunnaarpaat, taamaammat IA kommunalbestyrelsimi maanna ikinnerpaanik amerlanerussuteqalerpoq.

Kommunip karsianit 40 millionit koruunit akileraarutissat pillugit kukkuluttortoqarnerani tamanna pivoq.

- Demokraatiniit kommunitsinni pisut isiginngitsuusaaginnarsinnaanngilagut, kinguneqartinnagillu, akisussaaffimmik tigusisoqartariaqarpoq, tamannali maanna Inuit Ataqatigiinniit piumaneqanngilaq, Demokraatit tusagassiuutinut nalunaarummi allapput.

- Inatsisartut inatsisaat malinneqartariaqarput taakkulu malinneqartinnagit uagut (Demokraatit aaqq.) ajoraluartumik suleqataaffigisinnaanngilarput ajoraluartumik, partiimit Margrethe Thårup Andersen oqarpoq.

Naak akileraarutissat?

Aningaasaqarnermut ataatsimiititaliap kommunip Namminersorlutik Oqartussanut qaammatini pingasuni akileraarutinik A-nik akiliisimanngitsoq apriilimi paasivaa. Taakku 40 millionit koruunit missaanniipput. Saniatigullu 3 millionit koruuninik erniaqarlutik.

Taamaammat kommunip aningaasaqarnera ingerlanerliorpoq, tamannalu pissutigalugu Demokraatit aningaasat taakku 40 millionit koruunit nunatta karsianut akiliutigineqarsimanngippata sumut pisimanerat nassuiaateqarfigineqaqquaat. Aningaasammi taakku innuttaasunut utertinneqanngillat.

Kommunalbestyrelsimi sisamanngormat immikkut ittumik ataatsimiittoqartoq

IA Dmeokraatillu nunatta kujataani kommunimut 2023-mi suleqatigiilerput. Taakku ataatsimoorlutik qinikkanit 15-init kommunalbestyrelsimi amerlanerussuteqarluarlutik aqqanilinnik qinigaatitaqaraluarput. Demokraatilli IA-mik suleqateqarnermit tunuarnerisa kingunerisaanik IA arfineq-pingasunik qinigaatitaqarluni – ikinnerpaanik amerlanerussuteqaannalerpoq.

- Kommune Kujalleq aningaasarnikkut akisussaassuseqartumik eqqortumillu ingerlatsiffiusoq politikkikkut anguniagaraarput. Isumaqatigiissummili oqaaseqatigiit maanna borgmesteriutitatsinnit ajoraluaqisumik attanneqanngillat! Taammaammat Demokraatinit Kommune Kujallermi borgmesterimut kommunimilu pisortaanermut tatiginninnerput kipivoq, Demokraatit oqarput.

Kommunalbestyrelsi sisamanngormat immikkut ittumik ataatsimiippoq. Tassanilu Demokraatit borgmesterip, Stine Egedep (IA) tunuarnissaa piumasaqaatigalugulu tatiginnikkunnaarnissamik siunnersuuteqarput. Kommunalbestyrelsimili amerlanerussuteqartut itigartitsipput, Stine Egedelu suli borgmesteriulluni.

- Uggornarpoq demokraatit nammineerlutik aallaqqaammulli oqaatigivaat tunuartinngikkuninnga tunuassallutik taannalu aamma piviusunngortippaat tassa nammineq aalajangernerat uagut sulinitsinnut sunniuteqarnavianngilaq aamma ataatsimiitsitaliani sulinernut naatsorsuutiginngilara sunniuteqassasoq, borgmesteri KNR-imut oqarpoq.

Taassuma 40 millionit koruunit akilerniarlugit suliaqarlutik oqaatigaa. Taamaammat kommunalbestyrelsip kassekredit 100 millionit koruuninik qaffannissaa akuersissutigaa, taamaalillutik akiligassat akilerneqapallassinnaassammata. 

- Akisinnaanngilara neriuppunga qinigaaffiup naannginnerani akilerneqarnissaat uanga taanna anguniassavara.