Kujallermi innuttaasut: Naak taakku 40 millionit koruunit?
Kommune Kujalleq nunatta karsianut 40 millionit koruuninik saniatigullu ernianut 3 millionit koruuninik akiligassanik kinguaattooqqavoq. Kommuni akileraarutinut qaammatini pingasuni akiliisimannginnami akiitsoqalerpoq.
Tamanna pissutigalugu pingasunngornermi akerliussutsimik takutitsisoqarpoq. Taakku 40 millionit koruunit sumut pineqarsimanersut paaserusuppaat? Soorunami akileraarutinut akiliisoqarsimanngitsoq? Taakkumi innuttaasunut aamma atorneqarsimarpalunngillat.
Allagartarsualisartut
Akerliussutsimik takutitsisut aningaasaqarnermut inuussutsissarsiornermullu ataatsimiititaliaq kommunimi ataatsimiittoqartoq akissuteqaqquaat. Taamaammat akerliussutsimik takutitsisut Qaqortumi illoqarfiup qeqqanit kommunip allaffiata tungaanut ingerlaaqatigiipput.
Kommunip nunatta karsianut marsimili akiliisimannginnera kommunalbestyrelsip maajimi ataatsimiinnerani saqqummiunneqarpoq.
- Pisut innuttaasut aalassassutigaat, apeqquterpassuillu suli akineqarneq ajortut akerliussutsimik takutitsinermi aaqqissueqataasoq oqarpoq.
Tamannalu innuttaasut akornanni toqqissisimannginnermik pilersitsisoq akerliussutsimik takutitsisut erseqqissaatigaat.
Borgmesterimit naapinneqartut
Akerliussutsimik takutitsisut kommunimut apuukkamik ataatsimiititaliami siulittaasumit aamma borgmesteriusumit, Stine Egedemit (IA) naapinneqarput, taassumalu aningaasat sumut pisimanerannik misissuinermit inernerit ataatsimiinnermi saqqummiunneqassasut oqaatigaa.
- Ajortuliortoqarsimanngitsorli, borgmesteri erseqqissaavoq.
Aningaasaqarnermut ataatsimiititaliap ataatsimiinneranit saqqummiussanik Qaqortumi, Narsami Nanortalimmilu innuttaasut qaammammi matumani ataatsimiititsinissani paaasissutissinneqarumaartut, borgmesteri oqarpoq. Tassani 40 millionit koruunit sumut pisimanersut nassuiarneqassaaq.
- Soorunalimi pissangavunga, tassa utaqqimaaginnassaagut ukua kommunalbesyrelsimi aningaasaqarnermut ataatsimiitsitaliaq ataatsimeereersimaleriarpat saqqummiussinissaat pissangassutigaara, Angerdla Kielsen Olsen akerliussutsimik takutitseqataasoq oqarpoq, taassumali maannamut akissutigineqartoq naammagisimaavinngilaa.
