Kujallermi akileraarutinut akiliinerit amigaataasut Demokraatit eqqarsarnartoqartippaat – aningaasat sumut pippat?
Kommune Kujalleq qaammatini kingullerni pingasuni akileraarutinik A-nik akiliisimannginnami akileraarutinut 40 millionit koruuninik akiitsoqartoq saqqummiunneqaqqammerpoq.
Kommunip naatsorsuutai misissoraanni aningaasaqarnera pitsaanngilaq. Tamanna kommunalbestyrelsimi ilaasortanut aalassaataavoq. Kommune sooq akileraarsimannginnersoq aningaasallu sumut pisimanersut Demokraatit paaserusuppaat.
- Aningaasarparujussuupput, ilungersunartorujussuuvoq inissisimanerput, Kommune Kujallermi kommunalbestyrelsimut ilaasortaq Demokraatineersoq, Margrethe Thaarup Andersen oqarpoq.
Kommune Kujalliup Namminersorlutik Oqartussanut akiitsui erniat ilanngullugit 43 millionit koruuniupput.
Taamaammat Demokraatini ilaasortat pingasut 40 millionit koruunit Namminersorlutik Oqartussanut akiliutigineqarsimanngippata sumut pisimanersut nassuiaatigineqarnissaat piumasaraat.
- Kissaatigalugulu aamma oqariartuutiginikuuarput aningaasat sumut atorneqarsimanersut, taamatuttaarlu aamma qanoq atorneqarsimanersut misissuiffigineqassasut, Margrethe Thaarup Andersen oqarpoq.
Aningaasat tigoriaannaaq qaffanneqartut toqqissisimanngittoqartorlu
Namminersorlutik Oqartussanut akiliutissat amigaataanerata kingunerisaanik kommunalbestyrelsip kommunip akiliutigeriaannagassatut atugai 25 millionit koruuninit 100 millioninut qaffappaat, akileraarutinut akiligassat 40 millionit erniaallu 3 millionit taamaalillutik akilerneqarsinnaassallutik.
Aalajangiineq tamanna Demokraatit aamma akueraat, taamaammallu Margrethe Thaarup Andersenip aningaasat qanoq atorneqarsimanerat nassuiaateqarfigeqquaa.
Innuttaasummi aningaasaatigigaat, taassuma KNR-imut erseqqisaatigaa.
- Kommunalbestyrelsimi ilaasortanut, taamatuttaarlu aamma Kommune Kujallermi innuttaasut pisariaqartippaat paasisallugu taakkua sumut pisimanersut, Margrethe Thaarup Andersen oqarpoq.
Kommunalbestyrelsimi illuatungiliuttut akiitsoqangaatsiarneq toqqissimannginnermik pilersitsisoraat.
- Innuttaasut toqqissisimanngillat tamatuma kingorna. Taavalu aamma kommunalbestyrelsimi neriuutigilluinnaqqissaarpaa 100 procentimik paasisat kingulliit aallaavigalugit ilisimatitsisoqassasoq sumut killittoqarneranik qanorlu pisoqarsimaneranik, kommunalbestyrelsimi aamma ilaasortaasoq, Masauna Holm Petersen Siumumeersoq oqarpoq.
Aasaaneranilu sulinngiffeqartoqalinnginnerani kommunalbestyrelsimi immikkut ittumik ataatsimiittoqartariaqartoq, Demokraatinit Margrethe Thaarup Andersen isumaqarpoq.
- Pisoq pimoorullugu sulisoqarpoq
Kissaallu tamanna tusaaneqartoq aamma takussutissaqarpoq. Kommunimi aningaasaqarnermut ataatsimiititaliaq juunip qulingani ataatsimiissaaq, tamatumalu kingorna kommunalbestyrelsip sinneri ataatsimiigiaqquneqarumaartut, borgmesteri, Stine Egede sapaatip akunnerata siuliani tallimanngornermi ualikkut tusagassiuutinut nalunaarummi naatsumi allappoq.
Tamatuma saniatigut borgmesteri kommunip illoqarfiinut annernut pingasunut tassa Narsamut, Nanortalimmut Qaqortumullu juunip ingerlanerani angalassaaq innuttaasunullu ataatsimiititsissalluni allappoq.
- Uannut pingaaruteqarpoq oqaatigissallugu aningaasaqarnermi inissisimanerput pillugu pimoorussilluta sulinerput, kommunillu Aningaasaqarnermut Naalakkersuisoqarfik aningaasaqarnermut iluarsiinissamut pilersaarut pillugu attaveqaqatigigaa.
- 2023-mut 2024-mullu naatsorsuutit tamakkiisumik takulluarsinnaalerumallugit misissortariaqakkat kommunip maanna ingerlatileruttorpai, taamaasiornikkut aningaasaqarnermik aqutsinermi politikkikkut suliniutinik ingerlatsisoqarsinnaaniassammat, borgmesteri Stine Egede tusagassiuutinut nalunaarummi oqarpoq.
