Kujallermi qinigaq naammatsittoq: Stine Egede akisussaaffimmik tigusissaaq
Kommune Kujalleq ingerlanerliorpoq.
Maannalu ima ingerlanerliortigaaq allaat isumaginninnermik ingerlatsivimmi kommunimi ikiortariaqartunik, utoqqarnik innarluutilinnillu ikiuiffiusussami ilungersuassutaangaatsiartut aaqqiissuteqarfiginissaannut naalakkersuisut maanna akuliuttussanngorlutik.
- [...] ajornartorsiutit annertungaarmata pinasuartuullutillu, Naalakkersuisuni Kommune Kujalleq ikiorniarlugu aalajangersimavugut, innuttaasut pisinnaatitaaffii inatsimmillu eqquutsitsineq qulakkeerneqarniassammata kommunimut ingerlaannartumik ikiuinissaq pisariaqarpoq, meeqqanut, inuusuttunut, ilinniartitaanermut, kultureqarnermut, timersornermut ilageeqarnermullu naalakkersuisoq, Aqqaluaq B. Egede (IA) sapaatip akunnerata siuliani oqarpoq.
Ikiuisoqarnissaalu pisariaqartinneqarluinnarpoq.
Kommunimi borgmesterip, Stine Egedep (IA) oqarnera naapertorlugu kommunimi sulianik isumaginnittut amigaataanerat aamma meeqqat, inuusuttut innarluutillillu pillugit suliat amerlassusaat pissutigalugit isumaginnittoqarfik ilungersuangaatsiarpoq.
Kommunip nammineq kisitsisaatai naapertorlugit innarluutilinnut tunngatillugu suliat 300-t aamma meeqqanut inuusuttunullu tunngatillugu suliat 857-it utaqqisinneqarput.
Naalli ikiuisoqarnissaa pisariaqartinneqarluinnaraluartoq ikiuisoqartussanngornera kommunimi qinikkat akornanni tamanna nuannaarutigalugu tiguneqanngilaq.
Kommune Kujallermimi kommunalbestyrelse Stine Egedep pissutsit ilungersunartut pillugit naalakkersuisunut septembarimi paasissutissiinerata kingorna ikiuisoqarnissaata qanoq ittuunissaanik kikkullu akiliissuteqarnissaannik tusagaqarsimanngillat.
- Meeqqanut, inuusuttuaqqanut innarluutilinnullu akisussaaffiit maannakkut naalakkersuisoqarfimminngaanniit tiguneqartut, tusagassiuutitigut nalunaarutigineqartut ersarissumik uagut, ataatsimiititaliallumi nassuiaasersorneqanngilagut kikkut aningaasatigut nammatassiissuteqarfigineqassanersut, kommunalbestyrelsimut ilaasortaq Demokraatineersoq, Margrethe Thårup Andersen oqarpoq.
Karen Marie Kyed Frederiksen Demokraatineersoq kommunimi isumaginninnermut ataatsimiititaliami ilaasortaavoq, taassumalu ataatsimiititaliaq kommunalbestyrelsimisulli ilisimasaqanngitsiginera uppernarsarpaa, aamma qanoq aaqqiissuteqartoqarnissaa suliniutillu suut maanna aallartinneqarnissaat pillugit.
- Suliassat suunersut naluarput. Taavalu kikkut aningaasartaanut akiliissanersut aamma naluarput, Karen Marie Kyed Frederiksen oqarpoq.
Isornartorsiuineq paasisinnaanngikkaa
Borgmesterip nammineerluni isornartorsiuineq paasisinnaanngilaa. Muminganilli suleqatini paasissutissiiffigisimallugit isumaqarpoq.
Taassuma naalakkersuisut septembarimi ataatsimeeqatigereerlugit kommunimi isumaginnittoqarfimmut ikiuisoqangajalernissaa kommunalbestyrelsimut paasissutissiissutigisimallugu oqaatigaa.
- Qaqortumut uterama, kommunalbestyrelsip ataatsimiinnerani tamanut ilisimatitsissutigivara. Taamaattumik eqqortuunngilaq ilisimatitsissutigineqarsimannginneranik oqarneq, borgmesteri oqarpoq.
Kommunalbestyrelsili isumaginninnermillu ataatsimiititaliaq ikiuisoqangajalerneranik ilisimatinneqarsimanerat kommunalbestyrelsimut ilaasortat, Margrethe Thårup Andersenip isumaqatigaa.
Taassumali aamma isumaginninnermut ataatsimiititaliami ilaasortap, Karen Marie Kyed Frederiksenip isornartorsiuinerat naalakkersuisunut isumaqatigiissutip qanoq imaqarneranut ilaatinneqarnissap amigaataaneranut tunnganeruvoq.
- Kommunitut taamatut akisussaaffiiagaanerni, arsaarinnittarnerni qitiusuminngaanniit nakkutigineqalerluni, inunnik isumaginnittoqarfik eqqarsaatigalugu qitiusuminngaanniit, Nuumminngaanniit nakkutigineqalertussaassasoq, assut inunnut kalluaasussaassammat uagut soqutigivarput qanoq isilluni qanorlu kinguneqartussamik suliniuteqartoqarnersoq, Margrethe Thårup Andersen oqarpoq.
Mailinut akineq ajortoq
Suliassami kina siuttuussava, naalakkersuisullu kommunimut qanoq ikiuissava apeqqutilli taakku marluk Stine Egedep akissuteqarfigiuminaatsippai.
- Suliassat suulluunniit tamarmik meeqqanut inuusuttunullu tunngassuteqartut. (Suliassat aqq.) Ataasiakkaarlugit taagorsinnaanngilakka amerlangaarmata, taanna oqarpoq.
Naalakkersuisunit sulisut isumaginnittoqarfimmi pissutsinut ikiuinissamik qaqugu aallartitsissanersut borgmesterip aamma ilisimanngilaa.
Taamaakkaluartorli ilisimasaqarneruleruni isumaginninnermik ataatsimiititaliaq nalinginnaasumik kommunimi innarluutilinnut, utoqqarnut meeqqanullu akisussaaffeqartoq paasissutissiissuteqarfigineqarumaartoq erseqqissaatigaa.
- Ataatsimiitaliaq paasissutissat pissarsiarisussaavai. Ilisimalereerutsigit kommunalbestyrelsimut aamma ilisimatitsissutigineqartariaqarpata ilisimatitsissutigineqarumaarput, Stine Egede oqarpoq.
Margrethe Thårup Andersenilli (D) isornartorsiuinini attatiinnarpaa. Taannami kommunip aningaasaqarnerata ilungersunarnera pissutigalugu naammagittarsinnaajunnaalerpoq.
Borgmesterip tunuarnissaa Demokraatit aasaq piumasaraaq, taannali tunuanngilaq, taassumami tunuliaqutarisai amerlanerussuteqarput. Taamaammat Margrethe Thårup Andersen pakatsisimanermini allatut aqqutissaaruppoq.
- Borgmesteri kaammattornikuuarput taamatut aqutsineranik kisitta taamatut oqariartornata arlallit taamatut suleriaaseqarneq akuersaarnagu tatiginagulu. Borgmesterilli naalakkersuisuninngaanniit uppisikkuminaannerujussuusarput. Taamaammat borgmesterip nammineq tunuarnissani aalajangertussaavaa, taamaattorli uagut styrelseslovip iluani, taanna tunngavigalugu tunuartariaqartoq, taamaattorli tamanna pinikuunngilaq, taanna oqarpoq.
