Stine Egede: Meeqqat angerlarsimaffiit avataanut inissinneqartartut kommunep aningaasarliorneranut pissutaapput

20 millionit koruunit. Kommune Kujalliup karsia taama amerlatigisunik maanna amigarpoq. Kommunimmi qaammatini pingasuni akileraarutinik A-nik akiliinissani puigorsimavaa.

Akileraarutinut akiliinngitsoorsimaneq aningaasaqarnermut ataatsimiititaliami ilaasortat maajimi paasigamikku tamarmik tupaallaatigisaat, borgmesteri Stine Egedep akisussaaffiginerarpaa:

- Soorunami ajuusaarnarpoq tassunga killinnerput. Kisianna tassa akisussaaffik uanga tiguara, taanna oqarpoq.

Meeqqat angerlarsimaffiup avataanut inissitat pissutaasut

Pisoq borgmesterip akisussaaffigineraraluarlugu, taamaattoq ajornartorsiut meeqqat angerlarsimaffiup avataanut inissinneqartarnerannik pissuteqarnerarpaa:

- Meeqqat angerlarsimaffiit avataanut inissinneqartartut amerlavallaaqaat. Isumaginninneruttaaq iluani kinguartooqqarujussuarnitsinni allanik ikiorserneqartariaqarnerput sulisussaqannginnatta ilinniarsimasunik nammineq uagut nunatsinni allaninngaanniit ikiorserneqartariaqarnerput kommunimut akisoorujussuuvoq.

Borgmesterip aamma aningaasaqarnermut ataatsimiititaliap akileraarutinik akiliinngitsoortarsimanerat, Stine Egedep imminerminut kinguneqartinneqartariaqarunanngitsoq taanna isumaqarpoq.

Taannami borgmesteriuinnassaaq:

- Soorunami akisussaaffik tiguinikuugakku issiaannassuunga aamma suliassaq naammassillugu suliarissavara. Uanga assannik errortuinavianngilanga aamma qimarratiginavianngilakka pisut, taanna oqarpoq.

Millionit amigaataanerat malugineqassanngitsoq

Millionerpassuarnilli amigaateqarneq kommunimi innuttaasunit malugineqassanngitsoq taanna neriorsuivoq.

- Taamaattumik, sunniuteqarfissaat… qanoq oqassaanga… takujuminaatsippara sukkut malunniuteqassanersoq.

- Allaanerussutigiinnarpaa massakkut sukaterisoqaqqippoq. Sukaterinerit ingerlareernikuupput massakkut sukerterinerit sakkortuseqqiinnarpagut. Taamaammat innuttaasunik sullissinitsinni annertunerusumik sunniuteqartiginissaa takorpiarsinnaanngilara.

Kommune Kujallermili innuttaasut Stine Egedep neriorsuutaata akerlianik siunissami aarleqquteqassappata pissutissaqarsinnaavoq.

Sukaterinermi 2025-mi suli ingerlaannassasoq Stine Egede oqarpoq.   

- Ilimaginngilara, sakkukilleqqissapput kisianni 2021-mili sukannersumik ingerlatsinerput ingerlatiinnassagipput ilimagivara.