- Assigiinngitsunik sunniuteqarujussuartartut nunarsuarmi tamani misilittakkat takutippaat, Anne Merrild Hansen oqarpoq.

Professori uulia pillugu: Sunniuteqarujussuartartoq nunarsuarmi tamani misilittakkat takutippaat

Uuliasiornermit inuiaqatigiinnut sunniutaasinnaasut Naalakkersersuisut uuliasiornermut periusissiaanni ukkatarineqarnerusariaqaraluartut professori isumaqarpoq.

Nunatsinni uuliasiortoqalissappat inuiaqatigiinni allanngortoqarsinnaavoq. Taamaammat inuiaqatigiit ineriartornissaat uuliasiornissamut ineriartortitsinermi siusissukkut eqqarsaatigineqartariaqartut, Ilisimatusarfimmi professori, Anne Merrild oqarpoq.

Naalakkersuisulli uuliasiornissamut periusissiaminni uuliasiortitseqatigiiffiit inuiaqatigiillu qanoq sunniiveqatigiissinnaanersut pillugit eqqarsaateqarpallaarsimarpasinngitsut, professori isumaqarpoq, inuiaqatigiinnilu kingunerluutaasinnaasut pinngitsoortinniarlugit qanoq iliortoqarniarnersoq takusinnaanngilaa.

- Assigiinngitsunik sunniuteqarujussuartartut nunarsuarmi tamani misilittakkat takutippaat, Anne Merrild Hansen oqarpoq.

Uuliasiornermut periusissiaq
 

  • Naalakkersuisut 2020-mit 2024-mut uuliasiornermut periusissiaq ukioq nmanna jannuaarip naanerani akueraat.

 

  • Nunatsinni uuliasiornerup soqutigineqaqqilernissaa periusissiami pingaarnertut aallunneqarpoq.

 

  • Sumiiffinnik pisinnaatitsissuteqarfinnik nutaanik ammaaneq, nunami taamatullu sinerissap avataani.

 

  • Nunap sannaanut aammalu geofysiskinut suliniutinik pisinnaatitsissutinut politikkimut akuusutut ilaatillugu ingerlatsinissaq.

 

  • Uuliasiornermut suliffissuarnut iliuuseqarluni nittarsaassilluni suliniuteqarneq.

 

  • Atugassarititaasunut killissaliussanik naleqqussaaneq, ilanngullugu ’first-mover’-nut aaqqissuussineq nutaaq, periusissiap atuuffissaani atuuttussaq, naapertorlugu akileraarusiisarnerup annertussusaanik immikkut naleqqussaanissaq.

 

  • Naalakkersuisut siulittaasuata, Kim Kielsenip, nunatsinni sumiiffiit pillugit akuersissutit nutaat saqqummiunneqartut sapaatit akunneranni 6-imi Houstonimi ussassaarutigiartorpai.

 

  • Tamatuma kingorna Namminersorlutik Oqartussanit atorfilittat Londonimut  februarip ulluisa qulinganni nittarsaassiartorput.

Paasissutissat: Naalakkersuisut

 

AAMMA ATUARUK Uuliasiornissaq piareersarluartariaqarpoq

Uulia inuit inuunerannut sunniuteqartartoq professori nassuiaavoq. Nunatta avataanit suliartortoqassaaq, tamannalu piorsarsimassutsikkut sunniuteqarsinnaavoq. Aamma nunatsinni sineriammit suliartortoqassammat, innuttaasut sumi najugaqarnerannut sunniuteqassaaq. Uuliamillu suliaqariartortut suliffigisaminnit soraassammata, suliffigisimasaat allanik sulisussarsiortariaqassapput.

Aamma uuliamik qalluisoqalerpat nunatta imartaani umiarsuaqarnerulissaaq, imaanilu isumannaallisaasoqarnerusariaqalissalluni.

Tamakkulu uuliasiornermik ineriartortitsinermi eqqarsaatigineqartariaqartut, professori isumaqarpoq.

AAMMA ATUARUK Kalaallit uuliasiornissarsuarmi mianersorfissaqarput

- Suliaqarfiup nutaap ineriartortinnerani suliniutinut ataasiakkaanuinnaq ukkassinani inuiaqatigiinnulli sunniutaasussat pillugit pilersaarusiornermut atatillugu naliliinermik amigaateqarsoraara, Anne Merrild Hansen oqarpoq.

Naalakkersuisut nunatsinni uuliasiornermik ingerlatsisimanngitsunik, tamatumanilu ingerlatseqatigiiffinnik minnernik soqutiginnilersitsiniartut uuliasiornermut periusissiami atuarneqarsinnaavoq.

- Tamanna tunngaviuvoq pingaaruteqartoq, misilittakkat naapertorlugu ingerlatseqatigiiffiit maanngaaniit qimaguteqqammersut soqutiginnilerseqqinniarnissaat ajornakusoornerusarmat, periusissiami allaqqavoq.

Uuliasiortitseqatigiiffiit Shell, ConocoPhillips Statoililu maanngaanniit qimaguteqqammersunut ilaapput.

AAMMA ATUARUK Uuliasioqatigiiffiit Kitaata imartaanit qimarrattut

Taakkulu uuliasiortitseqatigiiffissuarnut qanoq pissusilersornissamut sivisuumik suliarisanik najoqqutassaqartunut aamma ilaasut, Anne Merrild Hansen oqarpoq.

Kisianni ingerlatseqatigiiffiit minnerit ilaat inatsisinik unioqqutitsinngikkaluarlutik inuiaqatigiinnik salliussinissaminnut kajumissuseqarnissaminnut pissutissaqarujussuanngitsut, professori oqarpoq.

- Ingerlatseqatigiiffiit minnerit aktiaatinik niueqatigiittarfinni nalunaarsorsimasut immaqa uulia nassaareriarlugu aktiaatitik iluanaaruteqarujussuarlutik tuniniarusussavaat. Taavalu sivisuumik tassaniinnissartik naatsorsuutiginnginnamikku inuiaqatigiinnut aalaakkaasumik pitsaasumillu atassuteqarnissaminnut immaqa soqutigisaqarujussuanngillat, Anne Merrild Hansen oqarpoq.

AAMMA ATUARUK Issittumi uuliaqarluartoq ilimagineqarpoq

Taamaammat uuliap inuiaqatigiinnut sapinngisamik pitsaanerpaamik sunniuteqarnissaa qulakkeerniarlugu siusissukkut iliuuseqartoqartariaqartoq, ilisimatooq isumaqarpoq.

- Nalinginnaasumik ineriartortitsinermi ineriartornerup eqqarsaatigineqarnissaa pingaartorujussuuvoq. Immaqa qanoq ineriartortoqarsinnaaneranut siusissukkut naatsorsuusiortoqarsinnaavoq, taavalu uuliasiorneerup nunap aningaasaqarneranuunnaanngitsoq, kisianni aamma inuiaqatigiinnut uuliasiornermit toqqaannartumik sunnerneqanngitsunut qanoq iluaqutaasinnaanissaa eqqarsaatigalugu, Anne Merrild Hansen oqarpoq.

KNR-ip Naalakkersuisut siulittaasuat, Kim Kielsen (S), apersorniaraluarpaa, periusissiarli pillugu apersorneqarusunngilaq, nukissiuuteqarnermullu naalakkersuisumut, Jess Svanemut (S), innersuussilluni. Jess Svaneli angalagami marlunngornermi periarfissaqarnani oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat