Kalaallit uuliasiornissarsuarmi mianersorfissaqarput

Uuliasiornerup annertoorsuarmik aningaasarsiutaalernissaanut Kalaallit Nunaat mianersortariaqarpoq.

Ilisimatooq kalaallinut tunngasunik ilisimasalik taama oqarpoq. Uuliasiornerup aningaasarsiutaalernera inuussutissarsiutinut allanut akornutaaginnarani, allaallu koruuninik milliardinik arlalinnik isertitaqarnissamik ilisimasunneq, kingunerloratarsinnaavoq.

Uuliasiornissarsuarmik oqalunnerit Kalaallit Nunaannut akornutaaleratarsinnaapput, taama mianersoqqusivoq Roskilde Universitets Centerimi lektori Rasmus Ole Rasmussen, aviisimi Politikenimi ullumi saqqummersumi.

Rasmus Ole Rasmussen Namminersornerullutik Oqartussani suligallarami, ilaatigut Canadami Alaskamilu uuliasiornermik misilittakkat misissuiffigeqqissaarsimareerlugit oqarsinnaanngorsimavoq: - Ukorsiinnguinaa mianersoritsi, isertitassarpassuarnik ilimagisaqaraluarlusi Kalaallit Nunaata ineriartorneranut akornutinngorsinnaanerat eqqaamasiuk.

Suliffinni pioreersuni akissarsianut naleqqiullugu uuliasiorfinni sulinerup isertitsiffiunerusinnaanera, kajumigineqartaqaaq, suliffinnut allanut kingunerlussinnaasumik.

Aamma assersuutigaa Savalimmiuni ukiuni makkunani pisut. Savalimmiuni uuliasiornerup qanoq iluaqutaatigilernissaa ukiualuit matuma siornagut ilimanarsimmat, Torshavnimi illut akii qaffarujussuarput, artukkiinermik kinguneqartumik. Savalimmiunimi uuliasiorneq suli maannamut aningaasarsiutaallualinngilaq.

-Namminersornerullutik Oqartussat mianersortumik eqqarsarluarlutillu pisariaqarput, Rasmus Ole Rasmussen oqarpoq.

Suliffeqarfissuit uuliasiortussat aalajangersimasumik piumaffigineqassapput, aningaasanik tunisiinnaratik, avatangiisilli innarlerneqannginnissaanik inuiaqatigiinnilu siuarsaanissamut isumaginninnissaanik isumaqatigiissuteqarfigineqassapput.

Kalaallit Nunaata taamaalilluni uuliasiorneq aatsaat iluaqutissamisut takorloorsinnaalissavaa. Suliffeqarfiit allat ingerlaavarsinnaasut pilersinnissaat pingaartuunerarpaa, oqarluni uulia qallorneqalersoq nungussagaluarpat taakku kisimik isumalluutaalissasut.

-Sunami ajornerua, Danmarkimit aningaasat tapiissutit imaluunniit uuliasioqatigiit, Rasmus Ole Rasmussen oqarpoq.

Rasmus Ole Rasmussep siunnersuutigaa aningaasaateqarfiliornissaq, uuliamik isertitanik isumaginnittussamik. Aningaasaateqarfiup taamaalilluni, aningaasat ataatsikkorsuaq pinnani kittaarlugilli atorluarneqarnissaat qulakkiissavaa. Siunissaq eqqarsaatigalugu taamaalilluni aamma ileqqaagaqartoqarsinnaassaaq.