Uuliasioqatigiiffiit Kitaata imartaanit qimarrattut
Aatsitassanut Naalakkersuisoqarfik naapertorlugu maanna akuersissutaasut ukiup naanerani atorunnaarpata, Cairn Energy Nunatta kitaani uuliasiortitseqatigiiffinni kiserngorutissasutut isikkoqarpoq.
Aviisi Atuagagdliutit ullumi saqqummersoq taama allaaserisaqarpoq.
- Aatsitassarsioqatigiiffiit arlallit akuersissutiminnik utertitsinissaminnik pilersaaruteqartutut isikkoqarput, soorlu aamma Issittumi allani taamatut pisoqartoq, Aatsitassanut naalakkersuisoqarfimmi pisortaq Jørgen T. Hammeken-Holm aviisimut taama oqarpoq.
Uuliasioqatigiiffiit pineqartut tassaapput Shell, ConocoPhillips, Maersk Oil aamma Husky Oil.
- Kitaa qiviarutsigu Cairn Energyp kisiartaalluni maaniiginnarumalluni erseqqissumik nalunaarutigaa, sinnerilu tammakaagaluttuarput, naalakkersuisoqarfimmi pisortaq oqarpoq.
Nunatsinni uuliasiortoqarsinnaanera Issittup sinnerani pisunut assinguvoq, assersuutigalugu Alaskami akuersissutaasut 80 procentii utertinneqarsimammata.
Tunulli avannaani akuersissutaasut Aatsitassanut naalakkersuisoqarfiup suli neriuuteqarfigai.
- Uuliasioqatigiiffiit suli soqutiginnipput, Aatsitassanut naalakkersuisoqarfimmi pisortaq Jørgen T. Hammeken-Holm aviisimut taama oqarpoq, Tunullu avannaa Nunatta uuliasiornissamik takorluugaqarnerani neriunaateqartut kisiartaattut taallugu.
