Uuliasiornissaq piareersarluartariaqarpoq
Nunatta kitaani uuliamik nassaartoqarnissaanik neriuuteqarneq eqquussinnaavoq, uuliamilli naassaartoqarsinnaaneranut Namminersornerullutik Oqartussat piareersarluanngippata nassaarneq Kalaallit Nunaata aningaasaqarneranut ajornartorsiutinik aamma pilersitsisinnaavoq, taama Danmarkimi aningaaserivimmi Danske Bankimi misissueqqissaartartoq Arne Rasmussen, avisimi Politikenimi issuarneqarpoq.
Arne Rasmussen oqarpoq nunani uuliasiorfinngortuni taamaasillunilu aningaasarsiorfissamik annertuumik pilersitsiffiusuni sulisut aningaasarsiaasa qaffariarujussuartartut tamannalu ajornartorsiutinik pilersitsisartoq.
- Uuliasiorfinni suliumasut amerleriarujussuassapput tamannalu suliffeqarfiit allat sulisussaaleqilernerannik immaqalu matuinnartariaqalernerannik kinguneqarsinnaavoq, soorlu Hollandi Nordsømi 1970-kkunni uuliamik nassaarmat taama pisoqartoq, Arne Rasmussen oqarpoq. Alaskali Norgelu uuliamik nassaarmata inuiaqatigiinnut ajornartorsiutinik pilersitsinnginnissaq anguniarlugu aningaasaateqarfimmik pilersitsisoqarpoq, tassa aningaasat uuliasiornermit iluanaarutaasut nunamit aniavallaannginnissaat kiisalu uuliap siunissami nungunissaa piareersimaffiginiarlugu qularnaarisoqarluni. Alaskami Norgemilu taama iliorsimanerit qissimigaaqqullugit Arne Rasmussen kaammattuivoq.
