Issittumi uuliaqarluartoq ilimagineqarpoq
Uulia nappartat 90 milliardit tassaapput nunarsuarmi ukiut pingasungajaat ingerlaneranni atorneqartartut.
Annertuumik uuliaqarfiusinnaasutut nalilerneqartut pingasut tassaapput Alaska, Barentip Imartaani Ruslandip avataaniittumi, kiisalu Kalaallit Nunaanni.
Alaskami nappartat 30 milliardit immerneqarsinnaassangatinneqarput, Barentip Imartaaniit nappartat 9,7 milliardit, Kalaallillu Nunaanni 8,9 milliardit.
Kisitsisit nalornissautigineqarsinnaasut, ujarassiooq USA-meersoq Donald Gautier oqarpoq, kisianni ilanngullugu oqaatigaa uulia nunarsuarmi nassaassaasup 13 procentia Issittumi nassaarineqarsinnaassagunartoq.
Annertuumik aamma gasseqarnissaa ilimagineqarpoq, gassi nunarsuarmi nassaassaasup 22 procentia tamaani nassaarineqarsinnaassangatinneqarmat.
Silap pissusaata allanngoriartornerata kingunerisaanik Issittumik imartaanik piginnittussaaneq aaqqiaginngissutigineqarpoq, Danmark, Rusland, USA, Canada aamma Norge Issittup imartaa pillugu tamarmik immikkut oqariartuuteqareeramik.
