"Pappialaanngillat - meeraapput": Perorsaasussaaleqinerujussuaq

Nunatsinni ulloq unnuarlu angerlarsimaffinni perorsaasutut sulisussani 817-inut amerlassusilerneqarsimasuni 470-it amigaataapput. Tassa atorfiit affaat sinnerlugit sulisussaqanngillat.

Perorsaasullu meeqqerivinni sulisut nammakkersorneqarpallaarput. Ulapputtoqarneruleraluttuinnarpoq, allaffissorlunilu suliffissat uippakajaarnannginnerusut akissarsiagissaarfiunerusullu suliffigineqarusunnerusalerput.

Taama inissisimasoqarmat perorsaasut atorfissaqartinneqaqisut suli amigaataaneruleraluttuinnarput.

Tamanna siunnersuisarfiup K. Bruunip nalunaarusiaani atuarneqarsinnaavoq. Nunatsinni Perorsaasut Kattuffiat, NPK, nalunaarusiortitsisuuvoq.

Meeqqerivinni perorsaasut ulappunneruleraluttuinnarmata ajornatorsiut qaangeruminalligaluttuinnarpoq. Uippakajaarnerit napparsimallunilu sulinngitsoortarnerit amerligaluttuinnarmata perorsaasut sinneri suli ulapinnerulerput.

Taassuma saniatigut sulisitsisut piumasaqarnerulernerat inatsisiliallu nutaat suliassaqarnerulersitsipput, sulisusalli amerlanerulersinneqanngillat. Tassa imaappoq perorsaasutut sulereersut suliassaqarnerulerput.  

- Sulinermi piumasaqaaterpassuit inatsisini allassimasut aamma sulisitsisunit allaniillu avataannit piumasaqaatit naammaginartumik naammassineqarsinnaanngillat. Sulisut artorsarlutik soraartut amerlavallaarput, nalunaarusiami allaqqavoq.

Perorsaasut ilaat nalunaarusiornermi apersorneqartoq oqarpoq: ”Qasuvugut”.   

Allami suliffittaartarneq paasinaartinneqartoq

Perorsaasussaaleqineq aatsaat tusarsaalinngilaq. Perorsaasummi akissarsiaat qanorlu amigaatigineqartiginerat ukiorpassuarni eqqartorneqartuartarpoq.

Perorsaasut qassit amigaatigineqarnersut aamma perorsaasut suliarisartakkaminnut sanilliullugu aningaasarsiakippallaarlutik misigisimasut nalunaarusiami nutaami allaqqavoq. Akissarsialli perorsaasussaaleqinerlu nalunaarusiami pingaarnerpaanatik sulinermi atugassaritaasut pingaarnerpaapput.

Perorsaasut amerlanerusut sulilissappata sunik atugassaqartitaanerat paasissallugu pingaartoq NPK-mi siulittaasoq Arnaq Brønlund isumaqarpoq.

- Perorsaasut ulluinnarni atugaat qanoq pitsanngorsariassagutsigit una atuarsinnarlugu oqallisigitinneqarusukkatsigit, inuiaqatigiillu aaqqiinissamut nassaaqatigerusukkatsigit, taanna oqarpoq.

Pitsaanerusoqarsinnaavorlu. Perorsaasutummi ilinniagaqarneq suliffisanik allanik aamma periarfissaqalersitsisarpoq. Perorsaasutut ilinniagallit Namminersorlutik Oqartussani, kommunini aamma ilaqutariinnut sullissivinni allaffimmiutut sulisarput.

- Taakku suliffiit uiverfiuvallaaratik nipiliorfiuallaaratillu suliffiummata aamma sulinermi atukkat, aningaasarsiat ineriartornissamullu periarfisssat pitsaanerusarmata, nalunaarusiami allaqqavoq.

Perorsaasullumi meeqqerivinni sulinatik allaffimmiutut sulilertarnerat perorsaasunit allanit paasilluarneqarsinnaasoq nalunaarusiami allaqqavoq. Tamannali meeqqerivinni perorsaasunik amigaateqarnermik allanngortitsinngilaq.

- Uagut perorsaasutut suliassagut uninnganeq ajorput - pappialaannginnamik - meeraappulli assannik kissalaaartunik pisariaqartitsisut, nalunaarusiami allaqqavoq.