Rektori perorsaasussaaleqineq pillugu: Akissarsiakippallaartunukua
Perorsaasutut ilinniarsimasut akissarsiaat ilinniartitsisut akissarsiaannut naligiissarlugit qaffanneqartariaqarput.
Meeqqanik Illersuisoqarfik, MIO, nunatsinni ulluunerani paaqqinnittarfiit pitsaassusaat pillugit nalunaarusiamini saqqummerseqqammisamini taama allappoq. Ilulissanilu Perorsaanermik Ilinniarfiup rektoria, Nuka Kleeman, tamatumunnga isumaqataavoq.
- Ilinniarnikkut suliaat assigiimmata assigiimmik akissarsiaqartitaanngitsut paasisinnaanngilara. Professionsbacheloritummi ilinniarsimasoq professionsbacheloriuvoq, Nuka Kleemann oqarpoq.
AAMMA ATUARUK Perorsaanermi siunnersorti perorsaasussaaleqineq pillugu: Sapinngisarput tamaat iliuuseqarpugut
Ilinniartitsisutut ilinniarsimasut isumaginninnermilu siunnersortitut ilinniarsimasut tamarmik professionsbacheloriusut, taanna erseqqissaavoq. Taamaammat perorsaasut ilinniartitsisullu akissarsiaat naligiissarnissaat pissusissamisoortoq, rektori isumaqarpoq.
Persorsaanermik ilinniakkamik 1998-p 2020-llu akornanni naammassinnittut amerlassusaat
- Perorsaasutut: 434-t
- Socialassistentitut: 146-t
- Isumaginninnermi ikiortitut: 620-t
- Ulluunerani paaqqinnittarfinni ikiortitut ilinniakkamik naammassinnittut 2014-imiit maannamut 39-upput.
- Tassa imaappoq, perorsaanermik ilinniakkamik naammassinnereersimallutik ulluunerani paaqqinnittarfinni sulisinnaasut katillutik 1239-upput.
Tusarfik: Ilulissani Perorsaanermik Ilinniarfiup rektoria, Nuka Kleemann
Isummersuutit assigiinngitsut
Taannalu Inuit Ataqatiginnit tapersersorneqarpoq. IA-mmi siulittaasuata, Múte Bourup Egedep, perorsaasut ilinniartitsisullu akissarsiaasa naligiissarnissaannut siunnersuut isumatsialaasoraa.
- Siunnersuut Inuit Atagatigiinnit tapersersorparput, aamma perorsaasuinnaanngitsut aammali perorsaanermik suliallit taakkununngalu ikiortitut sulisut sulinermi atugaat pitsanngorsartariaqarput, Múte Bourup Egede oqarpoq.
Nunatta Qitornai perorsaanermik suliallit ataasiakkaat qanoq akissarsiaqarnissaannut oqallinnermut akuliukkusunngillat.
- Isumaqarpunga kattuffiit akissarsiaat sulinermilu atukkat pillugit isumaqatigiinniarnermik akisussaasuusut akisussaatissagivut, Nunatta Qitornaasa siulittaasuat oqarpoq.
Naammasserlaat ulluunerani paaqqinnittarfinni suliumanngitsut
Ulluunerani paaqqinnittarfiit 15-iugaangata 14-it amerlassusiliinermut inatsit naapertorlugu perorsaasukippallaartut, MIO-p nalunaarusiaani erserpoq.
Perorsaanermik ilinniakkamik 2020-mi naammassinnittut amerlassusaat
Inunnik isumaginnittutut: 19-it
Socialassistentitut: 21-t
Isumaginninnermi ikiortitut: 27-t
Ulluunerani paaqqinnittarfinni ikiortitut: 6
Tamatuma saniatigut inunnik isumaginnittutut ilinniakkamik Perorsaanermik Ilinniarfiup Sisimiuni, Nuummi Qaqortumilu immikkoortortaqarfiini ukiut marluk allortarlugit naammassinnittoqartarpoq.
Tusarfik: Persorsaanermik Ilinniarfik
Ajornartorsiulli perorsaasutut ilinniarsimasukippallaarneranik peqquteqanngitsoq, Nuka Kleemann oqarpoq.
- Kommunini sulisunik amerlassusiliinerit qimerlooraanni isumaqarpunga naammattunik ilinniarsimasoqartoq, taanna oqarpoq.
Ajornartorsiut tamanna ilinniarsimasut akissarsiagissaarnarnerusumi soorlu sulisartuinnartut sulerusunnerunerannik peqquteqarpoq.
- Ulluinnarni tusartakkakka tamakkuupput, Nuka Kleemann oqarpoq.
- Perorsaasunngorlaanik nalaatsornerinnakkut naapitaqartarpunga. Kingulleq naapitara perorsaasunngorlaajugaluarluni taxartitsisuuvoq, taanna ilanngullugu oqarpoq.
Rektori: Iliuuseqarnerusoqartariaqarpoq
Atorfininnermi sulinermilu atukkat ulluunerani paaqqinnittarfiit perorsaassukippallaarnerisa ajornartorsiutaanerata iliuuseqarfiginissaanut pitsanngorsarneqaqqaartariaqarluinnartut, rektori oqarpoq. Ingammik akissarsiaat eqqarsaatigalugit.
AAMMA ATUARUK MIO nunatsinni ulluunerani paaqqinniffiit pitsaassusaat politikkikkut ukkatarineqaqqugai
Perorsaasunut isumaqatigiissutitaaq apriilip aallaqqaataani atuutilissaaq. Meeraaqqerivinni, meeqqerivinni ulloq unnuarlu angerlarsimffinni perorsaasut tunngaviusumik assigiimmik akissarsiaqalernerat, isumaqatigiissutitaap isumaqatigiissutaajunnaartumit allaanerussutigaa. Akissarsiaat perorsaanermik suliaqarfinni allani akissarsianut naligiissarneqarnissaannut iliuuseqarnerusoqartariaqartoq, rektori oqarpoq.
- Isumaqatigiissuteqaqqammertut ilisimagaluarlugu iliuuseqarnerusoqartariaqarnera naleqquttuusoraara, taanna oqarpoq.
- Nalunaarusiaq: Ulluunerani paaqqinnittarfinni pitsaassuseq qaffasissutsinik pingasuni ima pitsaanngorsarneqarsinnaavoq:
- Nuna tamakkerlugu suliniut:
- Perorsaasunngorniarfissanik qaffaaneq
- Ulluunerani paaqqinnittarfinni perorsaasunut ilinniarsimasunut pitsaanerusunik atugassaqartitsilerneq
- Kommunini suliniut:
- Pikkorissartitsinissamut ilinniartitseqqinnissamut kiisalu atorfinitsitsinissamut periusissamik ineriartortitsineq.
- Napparsimanermi sulinngitsoornerit aaqqissuussamik malinnaaffiginerat aalajangersimasumillu taartaasartussanik pilersitsineq.
- Ulluunerani paaqqinnittarfinni ataasiakkaani:
- Ulluunerani paaqqinnittarfiup ilusilersugaanerata ukkatarinera, taamaalilluni ilusilersugaanera meeqqat ineriartornerannut ilikkariartornerannullu tapersersuutaanerussalluni
- Ataasiakkaanut ilitsersuineq ilinniartitsinerlu ukkatarinerulerlugu
Tusarfik: Nalunaarusiaq 'Kalaallit Nunaanni ulluunerani paaqqinnittarfiit - Meeqqat avatangiisiinut pingaaruteqartunut atatillugu misissueqqissaarneq'. Nalunaarusiami ulluunerani paaqqinnittarfinni pisortat 15-it, ulluunerani paaqqinnittarfinni sulisut arfinillit kommuninilu ingerlatsivimmi pisortat tallimat apersorneri ilaatigut tunngavigineqarput.