Perorsaanermi siunnersorti perorsaasussaaleqineq pillugu: Sapinngisarput tamaat iliuuseqarpugut
Kommuneqarfik Sermersuumi ulluunerani paaqqutarinniffinni perorsaasutut atuuffiit pingajorarterutaa maannakkut inuttaqanngillat.
Kommunip ulluunerani paaqqutarinniffinni 25-ni perorsaasumut atuuffigineqarsinnaatitaaminit 99-init katillugit 33-t inuttalernissai amigaatigai
Sermersuumi perorsaasut pillugit siunnersortip, Sofie Sørensenip perorsaasut amigaataanerat nassuerutigaa. Taamaakkaluartorli kommuni atorfinitsitsiniarnermut sapinngisaminik iliuuseqaleruttorsoraa.
- Ajornartorsiutitut isiginngilarput, kisianni unamminarsinnaasarpoq aap. Sapinngisarpulli tamaat atorfinitsitsiniarnermi ikiuutaasinnaasarluta, Sofie Sørensen oqarpoq.
Ulluunerani neqoorutini sulisut amerlassusissaannut piumasaqaatit
Inatsisartut ulluunerani neqoroorutit pillugit peqqussutaat naapertorlugu meeqqanut ataatsimoortunut neqeroorutini agguaassisoqassaaq.
Meeqqerivinni meeqqat ataatsimoortut amerlanerpaamik 20-nik meerartaqarsinnaapput.
Meeraaqqerivinnilu amerlanerpaamik 12-inik meerartaqarsinnaapput.
Meeqqat ataatsimoortut tamarmik minnerpaamik sulisorissavaat perorsaasoq 1, perorsaanermik ilinniarsimasoq 1 ikiortilu 1.
Paasissutissarsiffik: Inatsisartut meeqqanut suli atualinngitsunut perorsaanikkut inerikkiartuutaasunik ulluunerani neqerooruteqartarneq pillugu peqqussutaat aamma nalunaarusiaq ’Kalaallit Nunaanni ulluunerani neqeroorutit – Pissutsinik meeqqat avatangiisaannut pingaarutilinnik misissuineq’.
AAMMA ATUARUK Angajoqqaaq ernumasoq: Perorsaasutut ilinniarsimasukippallaarnera meeqqatsinnut tuttarpoq
Sermersuumi ulluunerani paaqqutarinniffinni ilinniarsimasunut pilerinarsaanissaq sulisorinniinnarniarnissarlu siunertaralugit atorfinittunut inissaqartitsineq allaffissornermi sulisunik salliutitsinani perorsaasunut salliutinneqarnissaat kommunimi meeqqanut ilaqutariinnullu immikkoortortaqarfiup siorna marsimi aalajangerpaa.
Sofie Sørensenillu oqarnera naapertorlugu ulluunerani paaqqutarinniffinni aqutsisut ineriartortinneqarnissaat aamma qitiusumik ukkatarineqarpoq.
- Pitsanngorsaatit assigiinngitsut maangaaniit immikkoortortaminngaanniit pikkorissaanerit pisortanik oqaloqateqartuartarnerit, isumagineqarluarnerat taanna tassaavoq sulinermi pitsanngorsaatissatut aamma annertuutut isigisarput, siunnersorti oqarpoq.
Taartaasartoqarfeqalernissaanik misissuisoq
Susassaqarfiup kommunip meeraaqqeriviinut meeqqeriviinullu taartaasartoqarfimmik pilersitsinissamut periarfissaq ilaatigut misissuleruttorpaa.
Kommunimi taartaasartoqarfimmik aalajangersimasumik peqarnissaa nunatsinni ulluunerani paaqqutarinniffiit pitsaassusaannik misissuinermut nalunaarusiami nutaami innersuussutit aamma ilagaat.
AAMMA ATUARUK Sulisut peqatigiiffiata nalunaarusiaq ilisaraa: Perorsaasut meeqqerivinni suliinnartikkuminaapput
Meeqqat pisinnaatitaaffiinik sullissivik MIO nalunaarusiamik Det Nationale Forsknings- og Analysecenter for Velfærdimut tassa VIVE-mut misissuisitsisuuvoq. Nalunaarusiornermi nunatsinni meeraaqqeriviit meeqqeriviillu 15-it pitsaassusaat misissorneqarput, tassanilu sulisoqarsinnaassuseq malillugu sulisoqarniarneq ajornartorsiutaasoq takutinneqarpoq.
Ulluuneranimi paaqqutarinniffinnit 15-init 14-it perorsaasunik inatsit malillugu naatsorsuutaasumik sulisorineqartussanik atorfeqartitsinngitsut misissuinerup takutippaa.
- Perorsaasummi amigaatigiuaannassavagut. Meeqqalli atugarissaarnissaat pillugu sapinngisatsinnik suliaqarnissamik angusaqarusussuseqartuaannassaagut, Sofie Sørensen oqarpoq.
Kommunimi ulluunerani paaqqutarinniffinni pisortatut atuuffinnit 25-nit 24-t maanna atorfigineqarput.
- Nalunaarusiaq: Ulluunerani paaqqutarinniffinni pitsaassuseq qaffasissutsinik pingasuni ima pitsaanngorsarneqarsinnaavoq
- Nuna tamakkerlugu suliniut:
- Perorsaasunngorniarfissanik qaffaaneq
- Ulluunerani paaqqutarinniffinni perorsaasunut ilinniarsimasunut pitsaanerusunik atugassaqartitsilerneq
- Kommunini suliniut:
- Pikkorissartitsinissamut ilinniartitseqqinnissamut kiisalu atorfinitsitsinissamut periusissamik ineriartortitsineq
- Napparsimanermi sulinngitsoornerit aaqqissuussamik malinnaaffiginerat aalajangersimasumillu taartaasartussanik pilersitsineq
- Ulluunerani paaqqutarinniffinni ataasiakkaani:
- Ulluunerani paaqqutarinniffiup ilusilersugaanerata ukkatarinera, taamaalilluni ilusilersugaanera meeqqat ineriartornerannut ilikkariartornerannullu tapersersuutaanerussalluni
- Ataasiakkaanut ilitsersuineq ilinniartitsinerlu ukkatarinerulerlugu
Paasissutissarsiffik: Nalunaarusiaq 'Kalaallit Nunaanni ulluunerani paaqqutarinniffiit - Meeqqat avatangiisiinut pingaaruteqartunut atatillugu misissueqqissaarneq'.
Nalunaarusiami ulluunerani paaqqutarinniffinni pisortat 15-it, ulluunerani paaqqutarinniffinni sulisut arfinillit kommuninilu ingerlatsivimmi pisortat tallimat apersorneri ilaatigut tunngavigineqarput.
Nalunaarusiaq VIVE-mit suliarineqarpoq MIO-miillu suliakkiissutaalluni.
