Angajoqqaaq ernumasoq: Perorsaasutut ilinniarsimasukippallaarnera meeqqatsinnut tuttarpoq

Ulluunerani paaqqinnittarfinni perorsaasutut ilinniarsimasut amerlassusaat Inatsisartut sulisunik amerlassusiliineq pillugit inatsisaanni piumasaqaatinut naapertuutinngikkaangata, tamanna meeraaqqerivimmiittartunut meeqqerivimmiittartunullu tuttarpoq.

35-nik ukiulik Inaluk Olsen Heilmann Nuummeersoq taama isumaqarpoq.

Taanna angajoqqaat allat 13-it peqatigalugit angjoqqaanut ulluunerani paaqqinnittarfinniittartuutilinnut siorna septembarip qaammataani peqatigiiffiliorpoq. Peqatigiiffik taanna perorsaasutut ilinniarsimasut sulinermi atugaasa pitsanngorsarneqarnissaannik tamaviaarutiginnittuuvoq. Ulluunerani paaqqinnittarfiit perorsaasutut ilinniarsimasunik sulisukippallaarnerisa malitsigisaannik unammilligassanik ukkassineq tamaviaarutigisaanut ilaavoq.

AAMMA ATUARUK MIO nunatsinni ulluunerani paaqqinniffiit pitsaassusaat politikkikkut ukkatarineqaqqugai

- Meeqqat isumannaatsuunissaat ineriartornissaallumi eqqarsaatigalugit sulisunik naapertuuttumik amerlassusiliisoqartarnissaa pingaartittorujussuuarput. Tamannami meeqqat ineriartornerannut ilikkarniarnerannullu pingaaruteqarpoq, Inaluk Olsen Heilmann oqarpoq nangillunilu:

- Sulisussaaleqiffiugaangatami meeqqat ingerlalluanngitsortaqarnersut alaatsinaanneqarsinnaanngilaq. Taamaaliortoqarsinnaanngikkaangallu meeqqat ullormik ualikkut nalunaaqutaq sisamat missaaniikkajuttumi aaneqarnissamik tungaanut aniguinissaat kisiat eqqumaffigineqalersarpoq.

Amerlassusiliisarnerit equngasortaqartut

Perorsaasutut ilinniarsimasut 134-t nunatsinni ulluunerani paaqqinnittarfinni sulisunik amerlassusiliinermut inatsit naapertorlugu amigaataasut, Namminersorlutik Oqartussat 2019-imi immersuisitsinikkut misissuinermi inernerit tunngavigalugit nalilerpaat.

Sulisunillu amerlassusiliinermut inatsimmik naapertuiniarnerigaluaq taamaalilluni ajalusooqqippoq.

VIVE-p nunatsinni ulluunerani paaqqinnittarfiit pitsaassusaannik misissuineq pillugu nalunaarusiaa, MIO-p sapaatit akunneranni uani saqqummiuppaa.

2019-imi upernaakkut apersuinerit misissuinermi ilaatigut tunngavigineqarput.

Ulluunerani paaqqinnittarfiit 15-iugaangata 14-it perorsaasutut ilinniarsimasunik amerlassusiliinermut inatsit naapertorlugu sulisukippallaartartut misissuinermi erserpoq. 

- Qitornannik meeqqeriviliaassigaangama ilaannikkut misigisarpunga nerlersikkiartuinnarlugulu nangilersortikkiartuinnarlugu taavalu kiserrammi pinnguariartortikkiartuinnarlugu, Inaluk Olsen Heilmann oqarpoq. 

AAMMA ATUARUK Nalunaarusiaq: Meeraaqqerivinni meeqqerivinnilu pitsaassutsit ima pitsanngorsarneqarsinnaapput

Taamaammat nunatsinni ulluunerani paaqqinnittarfinni sinaakkutinik pitsanngorsaanissaq politikerit ukkassinissaat pingaaruteqartoq, taanna isumaqarpoq. 

- Angerlarsimaffimmi ilungersuaguit, imaluunniit ikiortariaqaruit, taava angerlarsimaffimmi ilungersuasumit meeqqerivimmi ingerlalluartumiittartumit marloriaataanik ilungersuassaatit. Ingerlalluartumi paaqqinnittarfimmiittarneq siunissami ingerlalluarnerunissamut periarfissaqartitsinerusarpoq, taanna oqarpoq nangillunilu: 

- Taamaammat iliuuseqalertornissaq pingaaruteqarpoq, neriuppungalu pimoorunneqassasoq. Angjoqqaajusugut suaarutigisatsinnik tunngavilersuutigineqarsinnaasumik nalunaarusiortoqarsimasoq nuannaarutigeqaara, taanna oqarpoq.

Kinguneqartitsisoqartalernissaanik ujartuisoq

Meeqqat Illersuisoqarfiat, MIO, VIVE-p misissuineranut akiliivoq. Ulluunerani paaqqinnittarfiit 15-iugaangata arfinillit sulisuini pisortaq taamaallaat perorsaasutut ilinniarsimasuusartoq, misissuinermi erserpoq.

AAMMA ATUARUK Sulisut peqatigiiffiata nalunaarusiaq ilisaraa: Perorsaasut meeqqerivinni suliinnartikkuminaapput

Ulluuneranilu paaqqinnittarfiit arfinillit 15-it 72-llu akornanni amerlatigisunik meerartaqartut, VIVE-p nalunaarusiaani aamma allaqqavoq.

Ulluunerani paaqqinnittarfiit tamarmik immikkut ataatsip sisamallu akornanni amerlatigisunik perorsaasutut ilinniarsimasunik sulisussaaleqipput. 

Inatsimmik unioqqutitsiffiusunut kinguneqartitsisoqartalernissaa, Inaluk Olsen Heilmannip ujartorpaa. Assersuutigalugu sulisunik amerlassusiliinermut tunngatillugu. 

Nalunaarusiarli nuna tamakkerlugu, kommunit ulluuneranilu paaqqinnittarfiit ataasiakkaat pillugit innersuussuterpaalunnik imaqarmat nuannaarutigaa. Aammali ima oqarluni:

- Sutigut pitsanngorsaanissaannut  assersuuteqarsinnaannginnerput uggorilaarpara.

• Nalunaarusiaq: Ulluunerani paaqqinnittarfiit pitsaassusaannik pitsanngorsaaneq immikkoortunut pingasunut agguataarneqarsinnaavoq:
• Nuna tamakkerlugu suliniutit:
• Perorsaasutut ilinniarsimasut amerlinissaat
• Perorsaasutut ilinniarsimasutut ulluunerani paaqqinnittarfinni atorfillit atugarisaasa pitsaanngorsarnissaat
• Kommunit innersuussutaat:
• Ilinniaqqittarnermut ingerlaqqiffiusumillu ilinniartarnermut taavalu sulisussarsiortarnermut periusissiornissaq
• Napparsimasoqartillugu malitseqartitsisarnissamik aaqqissuussineq taartaasartussanillu aalajangersimasunik pilersitsineq 
• Ulluunerani paaqqinnittarfiit ataasiakkaat:
• Ulluunerani paaqqinnittarfiit pisatsersornerisa isiginiarneqarnerunerat, tassuunakkut meeqqat ineriartornerat ilikkariartornerallu ikorfartorneqarneroqqullugit
• Sulisunut immikkut ilitsersuinermik ilinniartitsinermillu ukkassinerulerneq

Tusarfik: Nalunaarusiaq 'Kalaallit Nunaanni ulluunerani neqeroorutit - Pissutsinik meeqqat avatangiisaannut pingaarutilinnik misissuineq'. 

Ulluunerani paaqqinnittarfinni pisortat 15-it, sulisut arfinillit kommunillu ingerlatsiviini pisortat tallimat misissuinermi ilaatigut apersorneqarput.

VIVE nalunaarusiortuuvoq, MIO-lu nalunaarusiortitsisuullunilu nalunaarusiornermut akiliivoq.