Nalunaarusiaq: Meeraaqqerivinni meeqqerivinnilu pitsaassutsit ima pitsanngorsarneqarsinnaapput
![](/sites/default/files/styles/image_934x467/public/article_images/forside_4.jpg?itok=paAZZURt)
Perorsaasutut ilinniarsimasut ikippallaartut aamma meeraaqqerivinni meeqqerivinnilu akissarsiaqartitsineq perorsaasut taakkunani atorfinnik toqqaanatik sumiiffinni allani akissarsiagissaarnerunissaq pillugu toqqaasarnerat.
Det Nationale Forsknings- og Analysecenterimit, VIVE-p nalunarusiami nutaami ulluunerani paaqqutarinniffiit pillugu susassaqarfimmi unammillernartut ilat tamakkuusut paasissutissiissutigaa.
Taamaammat meeraaqqerivinni meeqqerivinnilu perorsaasunut atugassarititaasut, ilinniarnerup ukkatarineqarnera pikkorissaanerlu ulluunerani paaqqutarinnittarfinni pitsaassutsit pitsaanerulersinnissaanut innersuussutigineqarput.
Meeqqat pisinnaatitaaffiinik sullissiviup MIO-p VIVE-mut nalunaarusiarititaani taama allassimavoq.
Pitsaassuseq unammillernartortaqartoq
MIO-p nalunaarusiornikkut meeqqat ineriartorfigisinnaasaanni perorsaanermi avatangiisini pisinnaatitaaffeqarnerannik ukkatarinnikkusuppoq. Taamaammat MIO-p nunatsinni ulluunerani paaqqinniffinni pitsaassutsinik VIVE misissuisippaa.
Nalunaarusiamimi allassimavoq paaqqutariffinniffiup paasinninnerani "(...) nunatsinni meeqqanik ulluunerani paaqqutarinniffinni pitsaassutsimik naammattumik pissarsineq ajortoqarpoq."
Nalunaarusiaq: Ulluunerani paaqqutarinniffinni pitsaassuseq qaffasissutsinik pingasuni ima pitsaanngorsarneqarsinnaavoq
Nuna tamakkerlugu suliniut:
- Perorsaasunngorniarfissanik qaffaaneq
- Ulluunerani paaqqutarinniffinni perorsaasunut ilinniarsimasunut pitsaanerusunik atugassaqartitsilerneq
Kommunini suliniut:
- Pikkorissartitsinissamut ilinniartitseqqinnissamut kiisalu atorfinitsitsinissamut periusissamik ineriartortitsineq
- Napparsimanermi sulinngitsoornerit aaqqissuussamik malinnaaffiginerat aalajangersimasumillu taartaasartussanik pilersitsineq
Ulluunerani paaqqutarinniffinni ataasiakkaani:
- Ulluunerani paaqqutarinniffiup ilusilersugaanerata ukkatarinera, taamaalilluni ilusilersugaanera meeqqat ineriartornerannut ilikkariartornerannullu tapersersuutaanerussalluni
- Ataasiakkaanut ilitsersuineq ilinniartitsinerlu ukkatarinerulerlugu
Paasissutissarsiffik: Nalunaarusiaq 'Kalaallit Nunaanni ulluunerani paaqqutarinniffiit - Meeqqat avatangiisiinut pingaaruteqartunut atatillugu misissueqqissaarneq'. Nalunaarusiami ulluunerani paaqqutarinniffinni pisortat 15-it, ulluunerani paaqqutarinniffinni sulisut arfinillit kommuninilu ingerlatsivimmi pisortat tallimat apersorneri ilaatigut tunngavigineqarput.
Nalunaarusiaq VIVE-mit suliarineqarpoq MIO-miillu suliakkiissutaalluni.
Pitsaassuserlu unammillernartortaqarpoq. Tamanna VIVE-p nalunaarusiami allappaa.
- Misissuinerup atorfinitsitsiniarnermi unammillernartoqartoq sulisunillu amigaateqarneq ulluunerani paaqqutarinniffiit qinerneqartut pitsaassusaannnut unammillernartoqartitsisoq takutippaa, nalunaarusiami ilaatigut allassimavoq.
AAMMA ATUARUK Sivisuumik isumaqatigiinniareerlutik: Perorsaasut isumaqatigiissut nutaaq akuersissutigaat
VIVE-p misissuinerani ulluunerani paaqqutarinniffinnit 15-init 13-it sulisussarsiorneq unammillernartikkaat takutinneqarpoq. Tamanna unammillernaqqajaasimasoq 2019-imit kisitsisinit uppernarsarneqarpoq. Namminersorlutik Oqartussammi apeqqutinik immersuisitsinera naapertorlugu nunatsinni perorsaasut piffissami tassani 134-nik amigarput.
Akissarsiaqartitsineq apeqqutaasoq
Nalunaarusiap akissarsiaqartitsineq perorsaasunullu ulluunerani paaqqutarinniffinni atugassarititaasut pitsaanerusut pillugit apeqqut aamma qaqippaa.
Nalunaarusiaq naapertorlugu meeraaqqerivinni meeqqerivinnilu perorsaasunik sulisoqaannarniarneq unammillernartuuvoq, pissutigalugu perorsaasut ulloq unnuarlu paaqqutarinniffinni imaluunniit atuarfinni perorsaasutut - ilaatigullu suliffeqarfinni allani ilinniarsimanngitsutut sulinermi akissarsiarissaarnerusinnaammata.
Assersuutigalugu perorsaasup ulloq unnuarlu paaqqutarinniffinni suliguni ulluunerani paaqqutarinniffinni sulinermit 175.000 koruunit missaannik aamma atuarfinni perorsaasutut 85.000 koruunit missaannik akissarsiaqarnerusinnaanissaq naatsorsuutigisinnaavaa.
Perorsaasut Peqatigiiffiata, NPK-p Naalakkersuisullu perorsaasut pillugit isumaqatigiissut nutaaq tallimanngormat atsiorpaat.
Nutaamik isumaqatigiissuteqarnikkut tunngaviusumik akissarsiaritinneqartuni inimi perorsaasumut tapit 13 procentit missaannik qaffapput. Tamanna 2.500 koruunimik qaffaasoqarnerata assigaa, tamannalu qaammammut akissarsiani akileraannginnermi 22.945,14 koruuniuvoq.