MIO nunatsinni ulluunerani paaqqinniffiit pitsaassusaat politikkikkut ukkatarineqaqqugai
- Meeqqat nunatta siunissaa pillugu ineriartortillugillu ilinniartissagutsigit politikkikkut maanna salliutitsisoqartariaqarpoq.
MIO-mit meeqqat illersuisuat, Aviaja Egede Lynge nunatsinni ulluunerani paaqqutarinniffiit pitsaassusaat pillugu nalunaarusiaq nutaaq tunngavigalugu taama oqarpoq.
MIO-p nammineerluni Det Nationale Forsknings- og Analysecenter for Velfærd tassa VIVE meeqqat ineriariartornissamut pisinnaatitaaffiinik ukkatarinnittoqalernissaanut misissuisitsisuuvoq.
- Nalunngilarput ulluunerani paaqqutarinniffinni perorsaasunik sulisunillu naammattunik pissarsiniarnermut atatillugu unammillernartoqangaatsiartoq, meeqqat illersuisuat oqarpoq, nangillunilu:
- Meeqqat ilikkariartornissamut ineriartornissamullu pisinnaatitaaffiinut tamanna qanoq sunniuteqarnersoq takorusussimavarput, taamaammat meeqqat pisinnaatitaaffiinut tamarmi tunngatillugu ukkatarinnitsitserusuppugut, maannalu taamaaliortoqarpoq.
AAMMA ATUARUK Nalunaarusiaq: Meeraaqqerivinni meeqqerivinnilu pitsaassutsit ima pitsanngorsarneqarsinnaapput
Nalunaarusiaq nunatsinni meeraaqqerivinni meeqqerivinnilu pitsaassutsinik pitsanngorsaasoqarnissaanut assigiinngitsunik innersuussutitaqarpoq.
Nalunaarusiaq: Ulluunerani paaqqutarinniffinni pitsaassuseq qaffasissutsinik pingasuni ima pitsaanngorsarneqarsinnaavoq
Nuna tamakkerlugu suliniut:
- Perorsaasunngorniarfissanik qaffaaneq
- Ulluunerani paaqqutarinniffinni perorsaasunut ilinniarsimasunut pitsaanerusunik atugassaqartitsilerneq
Kommunini suliniut:
- Pikkorissartitsinissamut ilinniartitseqqinnissamut kiisalu atorfinitsitsinissamut periusissamik ineriartortitsineq
- Napparsimanermi sulinngitsoornerit aaqqissuussamik malinnaaffiginerat aalajangersimasumillu taartaasartussanik pilersitsineq
Ulluunerani paaqqutarinniffinni ataasiakkaani:
- Ulluunerani paaqqutarinniffiup ilusilersugaanerata ukkatarinera, taamaalilluni ilusilersugaanera meeqqat ineriartornerannut ilikkariartornerannullu tapersersuutaanerussalluni
- Ataasiakkaanut ilitsersuineq ilinniartitsinerlu ukkatarinerulerlugu
Paasissutissarsiffik: Nalunaarusiaq 'Kalaallit Nunaanni ulluunerani paaqqutarinniffiit - Meeqqat avatangiisiinut pingaaruteqartunut atatillugu misissueqqissaarneq'. Nalunaarusiami ulluunerani paaqqutarinniffinni pisortat 15-it, ulluunerani paaqqutarinniffinni sulisut arfinillit kommuninilu ingerlatsivimmi pisortat tallimat apersorneri ilaatigut tunngavigineqarput.
Nalunaarusiaq VIVE-mit suliarineqarpoq MIO-miillu suliakkiissutaalluni.
Perorsaasutut ilinniarsimasut ikippallaartut aamma meeraaqqerivinni meeqqerivinnilu akissarsiaqartitsineq perorsaasut taakkunani atorfinnik toqqaanatik sumiiffinni allani akissarsiagissaarnerunissaq pillugu toqqaasarnerat ulluunerani paaqqutarinniffiit pitsaassusaanut uniffiliisarpoq.
Nalunaarusiamittaaq sulisussarsiniarneq sulisullu amigarnerisa unammillernarnerat ”ataatsimut isigalugu ulluunerani paaqqutarinniffiit ilaanni pitsaassuseq unammillernartuusarpoq.”
Tamanna meeqqat illersuisuata ernumanartippaa.
- Meeqqanik sumiiffimmut nerisaqartinneqarlutillu paarineqarfissaannut suli tunniuttarpagut, tassanili pissarsiarisinnaatitaasartik tassa ineriartortinneqarneq ilinniarnerlu pissarsiarineq ajorpaat, Aviaja Egede Lynge oqarpoq.
Politikerinut suaaruteqarneq: Suliniutigisigit
Nalunaarusiaq kommuninut Inatsisartunullu apriilip ulluisa arfernani qinersisoqarnissaanut qineqqusaaleruttornermi saqqummerpoq. Qinersisoqangajalersorlu MIO politikerinut ersarissumik aamma oqariartuuteqarpoq:
Akisussaaffimmik tigusigitsi perorsaasullu amigaataanerat aamma perorsaasut akissarsiaat qaffassigit taamaalilluni meeqqat pillugit sinaakkutik pitsaanerusut pilersinneqarsinnaassallutik.
- Perorsaasut ataasiakkaaginnaat imaluunniit inuit ataasiakkaaginnaat akissarsiaqarnissaat maani pineqanngilaq. Nunatta siunissaa pineqarpoq. Meeqqaninguna nakkutiginninneq, nunattalu peqqissuunissaa taakkulu ilinniarlutillu ineriartorluarnissaat kissaatigigutsigu maanna pingaarnersiuisariaqarpugut, Aviaja Egede Lynge oqarpoq.
Perorsaasut akissarsiaat ilinniartitsisut akissarsiaat naligisariaqarpaa
VIVE-p misissuinerani ulluunerani paaqqutarinniffinnit 15-init 13-it sulisussarsiorneq unammillernartikkaat takutinneqarpoq.
Taamaammat perorsaasutut ilinniarsimasut amerlanerulernissaat suliniutinillu ulluunerani paaqqutarinniffinni perorsaasunut atugassarititaasunik pitsaanerulersitsisussanik aallartitsisoqarnissaa nalunaarusiami ilaatigut innersuussutigineqarpoq.
MIO naapertorlugu perorsaasut akissarsiaannik qaffaaneq aallarniutaasinnaavoq, taamaalilluni ilinniartitsisullu akissarsiatigut naligiilissallutik.
- Perorsaasummi ilinniartitsisunut naleqqiussinnaavagut. Meeqqat sullitaat assigiipput. Taakku ilinniarnissaat ineriartornissaallu sulissutigivaat meeqqanullu tunngaviliisarlutik, MIO meeqqanut siunnersorti, Ellen Bang Bourup oqarpoq.