Paaqqinnittarfiit sulisussaalatsimmata angajoqqaat ikiuuttariaqartartut

Nunatsinni meeqqeriviit meeraaqqeriviillu qangali ajornartorsiuteqarput.

Sulisussaalatsineq taakkunani ulluinnarni ingerlatsinermi sivisuumik ajornartorsiutaavoq, marlunnillu Nuummi paaqqinnittarfimmiittuutilik Pilunnguaq Egede-Enoksen sapaatit akunnialuit matuma siorna naammatsilluinnarpoq.

Pilunnguaq Egede-Enoksen Royal Greenlandip attaveqatigiinnermut immikkoortortaani nutserisuuvoq, meeqqerivimmilu sulisussaalatsisoqarmat soraajaariarluni ikiuukkiartortariaqarsimavoq.

- Meeqqerivimmi inigisaanniipput meeqqat 20-t sulisorlu ataaseq. Sulisoq qasuersitsiarnissaminut periarfissaqartarsimanngimmat taamaalioqquara, taamaaliorneranilu meeqqat nakkutigaakka. Akunnerni pingasuni taamaaliorpunga. Sulisoq soorunami ikioriartorlunga uterpoq, meeqqanilli akunnerni pingasuni tassa ikiuuppunga.

- Misigisaq imaannaanngingaarmat uisakajaarnangaarmallu ikiuutereerninni qasuvunga, sakkortoqaaq. Meeqqat ilaat qissapput, ilaalu inigisaminnit anillutik qimaasarput. Ataatsikkut suliassat amerlaqaat, taanna oqarpoq.

Pilunnguaq Egede-Enoksen siornatigut taama nalaataqanngilaq, qitornamili paaqqinnittarfiat ukiuni kingullerni sisamani sulisussaalatsinerulersoq maluginiarsimallugu taanna oqarpoq.

Sulisussaalatsineruneralu meeraanut sunniuteqartartoq malunnartaqisoq, taanna oqarpoq.

- Paniga inussiortuunanilu misikkarissuugami aareernerani angerlaraangatta nukissaarulluni kammasikkajuppoq. Ulluni sulisussaalatsiffiusuni qasutakkaangat ilisarsaarpianngingajattarpoq. Paasisinnaavaralu taamaattartoq, 20-nimmi meeralimmi ataasinnaarmillu sulisulimmi ineeqqaamiilluni qasunassaqaaq, taanna oqarpoq.

Perorsaasut angummassinnaasanngitsut

Pilunnguaq Egede-Enoksen kisimi taama misigisaqarsimasooqqajanngilaq.

Nunatsinnimi meeqqerivinni meeraaqqerivinnilu perorsaasut tamarmik angummassinnaasanngillat, taamaamallu artukkigaanertik peqqutigalugu sivikitsumik sulereernerminni soraartarput.

Pipaluk Olsen taakkununnga ilaavoq. Taannami paaqqinnittarfimmi qaammatini pingasuni perorsaasuunermini suliassanik nammakkersorneqarpallaarnini peqqutigalugu siorna aggustimi soraarpoq.

- Ullut ilaat nuannersorujussuupput, ullullu ilaat artornartorujussuullutik. Immaqa oqarluaannaraanni ullut amerlanerpaartaat oqimaakujuttarput amigakulanerput peqqutaalluni, taanna oqarpoq.

Sulisussaalatsisorujussuugaangamik meeqqat inimi ataatsimi ataatsimoortittariaqaraangamikkit meeqqat tamarmik immikkut piumasaat tunniussinnaasarsimanngikkitik, Pipaluk Olsen oqarpoq.

- Meeqqat nerisittagaapput, paarngulerlaajuppput, pisunniarsarisuupput, nangilersugassat innartitassallu. Sulisut pingasuinnaanermi uippakaajaalertarpugut, kukkoqqajaalerlutalu, taanna oqarpoq.

Perorsaasunngorniartilluni meeqqat atugaannik siuarsaaneq pillugu ilikkakkami sulitilluni timitalernissaannut piffissaalatsisarnini pissutiginerullugu puullaaqisarsimalluni, Pipaluk Olsen oqarpoq.

Suleruluttarninilu angerlarsimaffimmi inuuneranut sunniuteqalersimammat perorsaasutut suliunnaarluni ilaqutariinnut meerartalinnut siusissukkut iliuuseqarnermik maanna suliaqarpoq.

Ajornartorsiut kommunip tusarnartarinngikkaa

Sulisussaalatsinerup ajornartorsiutaanera Kommuneqarfik Sermersuup arajutsisimanngikkaa, meeqqerivinnut immikkoortortami aqutsisoq Ane Marie Lynge Møller oqarpoq. 

- Sulisoqarnermut tunngatillugu unammillernartoqartoq ilisimavarput. Meeqqerivimmi sulisinnaasut amigaatigaavut, meeqqeriviillu ilaat ullut tamaasa sulisussaalatsisarlutik.

Kommuneqarfik Sermersuumi perorsaasutut piffissaq tamakkerlugu suliffiit 82-inik amerlassusiligaapput, taakkunanngali 42-nnaat inuttaqartut kisitsisini novembarimeersuni erserpoq.

Novembarilli kingorna pisoqarnikooqimmat kisitsisit taakku eqqortumik maanna takutitsisuunngitsut, taanna isumaqarpoq. Kommuneqarfik Sermersuumili meeqqeriviit suli perorsaasussaalatsingaatsiartut, taanna aamma oqarpoq.

- Sulisussaalatsinerput pissutigalugu meeqqanik aalleqqusisariaqarsinnaasarpugut, taanna oqarpoq.

Nuummiinnaanngitsoq sinerisalli aamma sinnerani perorsaasussaalatsiunnaartoqassappat, najugaq qimannagu perorsaanermik ilinniakkamik pilersitsinissaq Namminersorlutik Oqartussat aamma Perorsaanermik Ilinniarfik isumaliutigisariaqaraat, Ane Marie Lynge Møller isumaqarpoq.

- Ilinniakkamik nutaamik pilersitsisoqarpat, tamanna sulisussarsisinnaanerulernitsinnik kinguneqarsinnaavoq, taanna oqarpoq.