Rektori: Perorsaasunngorniartartut ikilinerat isumakuluutigaara
Perorsaasutut bachelorinngorniarneq amerlanerpaamik 25-nut inissaqartitsisaraluartoq ukioq manna 16-iinnaat ilinnialerput.
Perorsaasutut bachelorinngorniarnissamut ukioq manna akuerisaasimagaluartut 31-upput, taakkunanngali 16-iinnaat ilinnialernissamut akuersisimapput.
Tassalu qinnuteqartut affaannaat ilinniarlutik aallartissapput – ukiuni kingullerni arfinilinni aatsaat taama ilinnialertussat ikitsigaat.
Ilinniartut agguaqatigiisillugit 62 procentii ilinniakkaminnik naammassinninnermut uppernarsaammik pissarsisarput.
Nunatsinni perorsaasutut ilinniarsimasunik amigaateqartorujussuugatta, 2017-imiit perorsaasunngornialisartut aatsaat taama ikitsiginerat ernumanaateqartoq, Perorsaanermik Ilinniarfiup pisortaa Nuka Kleemann KNR-imut oqarpoq:
- Ilinniarnerit soorunami neqeroorutigiuaannassavagut, taavali ikiliartuinnassappata, soorunami soorlu atuisut, nalinginnaasumik soorlu meeraaqqeriviit, meeqqeriviit taavalu innarluutilinnut ulloq unnuarlu angerlasimaffiit, perorsaasut nalinginnaasumik suliffiini sulisut soorunami ikiliartuinnassapput, siunissami aallartittartut ikiliartorusaassappata.
Perorsaasut akissarsiaannut isumaqatigiissut
- Isumaqatigiissut nutaaq apriilip aallaqqaataani 2020-mi atuutilersoq marsip 31-anni 2024-p tungaanut atuutissaaq. Isumaqatigiissumi nutaami akissarsiaq 13 procentimik qaffanneqarput
- Akissarsiatt 2.500 koruuninik qaffanneqarput, tassalu akileraannginnerminni qaammammut 22.945,14 akissarsiaqarput.
Perorsaasunngorniarnissamut aallartinngitsoortut ilaasa ilinniakkami allami akuerisaanertik akissutigisimavaat, ilaasali suna peqqutaanersoq oqaatigisimanagu.
Ajornartorsiut aaqqeriaannaanngitsoq
Ilinnialertut taama ikitsiginerat arlalinnik nassuiaateqarsinnaasoq, Nuka Kleemann isumaqarpoq.
Ukiuni kingullerni corona tuniluummat ilinniarnertuunngorniarfiit illoqarfiillu allat tikillugit pilerisaariartortoqarsinnaasimanngilaq.
Aammattaarli perorsaasutut bachelorit bachelorinngortartunit allanit akissarsiakinnerunerat peqqutaaqataasinnaanerarlugu:
- Soorunami maannakkut inuusuttut, soorunami qiviaqqaartarpaat ilaa - sumi aningaasarsiarissaarsinnaavunga, sumi ilinniareerlunga atugarissaarnerullunga sulisinnaavunga? Soorunami tamakkua aamma qiviartarsimassagaat naatsorsuutigilluinnarpara.
Nye tiltag skal lokke flere til faget
Perorsaasutut bachelorinnginngortartut amerlisarniarlugit Perorsaanermik Ilinniarfik nammineq maanna iliuuseqarpoq:
-Perorsaasunngorniartarnermut piumasaqaatit; ilinniarnertuunngorsimanissaq socialassitentitullu nammassinnereersimanissaq - taakkua amerlisarniarlugit uagut nammineerluta socialassitentit eqimattat marluk ukioq manna aallartinniarpagut. Taava aappaagussamut naammassigunik periarfissarissaarnerussapput perorsaasunngornermut qinnuteqarnissaminnut.
Perorsaanermik Ilinniarfiup pisortaa Nuka Kleemann taama oqarpoq.
Ukioq manna nunagisaq qimannagu perorsaasunngorsimasut perorsaasutut bachelorinngorniarsinnaalerput, taakkunanngalu sisamat septembarimi aallartissapput.
Perorsaasutut ilinniartut ukiuni kingullerni arfinilinni ima isikkoqarput:
