Assortuuttoqangaanngikkaluartoq Naalakkersuisut siulittaasussaanik taaserusuttoqanngilaq.Assi: KNR / Malik Brøns

Partiit siuttuisa oqallinneranni: Marluinnaat Naalakkersuisut siulittaasussaanik piukkussaqartut 

Partiit siuttui ataqqineqarnikkut kikkulluunniit suleqatigisinnaagaat.

Ulloq qinersinngilaarnerup unnukkuutaani KNR TV-kkut partiit siuttuisa oqallinneranni assortuuttoqarpallaanngilaq. 

Assortuuttoqangaanngikkaluartoq Naalakkersuisut siulittaasussaanik taaserusuttoqanngilaq.

Inuit Ataqatigiit siulittaasuat, Múte B. Egede, Atassutillu siulittaasuat, Aqqalu Jeremiassen, eqqaasanngikkaani.  
Nammineerlutimmi taakku imminnut piukkupput. 

  • Inuit Ataqatigiit qinersinermi siuariangaatsiassangatinneqartut, HS Analyse nutaarsiassaqartitsivillu Sermitsiaq suleqatigiillutik isumasiuineranni erserpoq:

 

  • Isumasiukkat 36 procentiisa IA qinerniarpaat, tassa IA aqqaneq-marlunnik Inatsisartuni ilaasortaatitaqalissasoq isumasiunermi erserpoq. 

 

  • Siumut kinguariassangatinneqarmat partiimut taasumunnga nutaarsiassatsialaanngilaq. 

 

  • Isumasiuinermimi partii taanna qinersinermi taasisut 23 procentiinik qinersiseqassangatinneqarpoq, ilaasortaatitaallu ataatsimik ikileriassangatinneqarlutik.

Naleraq, Sulisitsisut, Nunatta Qitornai, Demokraatit Siumullu piukkussaqanngillat. 

Siumup siulittaasua, Erik Jensen, ima oqarpoq:

- Inuit akisussaasuupput. Siumumilu siulittaasup tamanna aamma akisussaaffigaa.

AAMMA ATUARUK Under et døgn til valget: Kielsen afviser ikke at forsøge sig som formand Siumut igen

Partiit siuttuisa oqallisinngilaataani, paasiuminaasinnaasumik nalunaarutigineqartoq, eqqaasanngikkaani: Aqagu qinersinermi Erik Jensenimiit qinerneqarnerpaassaguni, Siumumi siulittaasunngorniaqqissinnaanini tunuarsimaarfiginagu, Siumumi siulittaasuunikoq Naalakkersuisunilu siulittaasuugallartoq, Kim Kielsen, KNR-imut oqarpoq.

Kikkut suleqatigiissappat?

Oqallinnermili toqqaananngitsumik, partiinik atinillu taasisoqanngikkaluarluni, akerleriittoqalaarpoq.

Qinigaaffimmimi nutaami kikkut suleqatigiissappat?

Demokraatit, Siumut Nunattalu Qitornai akisussaarusullutik ersersaapallapput, akisussaassuseqartumillu qimarratiginninngittunik partiinik suleqateqarusupput.

 

Assi: KNR / Malik Brøns

- Demokraatininngaanniit kikkulluunniit suleqatigiissinnaallugit oqaatigisarparput. Uagutsinnut pingaaruteqarpoq isumaqatigiissusiorsimagaanni taanna aamma malinneqarnissaa. Naalakkersuisoqatigiinniit anisariaqarsimavugut naalakkersuisoqatigut, partii anginerpaaq, siulittaasutaarnerminni iluminni avissaartuuterujussuarnerminni sangujoraarnerani peqqutigalugu, anisariaqarsimavugut. Isumaqatigiissutit malinneqanngippata kinguneqartariaqarpoq, Jens-Frederik Nielsen, Demokraatini siulittaasoq oqarpoq.

AAMMA ATUARUK Demokraatit naalakkersuisoqataajunnaartut

- Siumuminngaanniit pingaatittuartarparput patajaatsumik pitsaasumik aammalu qinigaaffiup tamakkerlugu naalakkersuisoqatigiinnissamik isumaqatigiissummik attassinissaq. Peqqissuseq imaluunniit partiit nammineq assigiinngitsunik peqquteqarluni tunuartariaqarnerat aqussinnaanngilarput, Erik Jensen oqarpoq.

- Akisussaaffimmik tigusinissaq taavalu unneqqarinnissumik suleqatigiinnissamut toqqammaviusunik taakkupput suleqatigiinnermut aallaaviit. Takoreernikuuvarput qinigaafiup uani qaangiutilersumiinnaanngitsoq kisianni aamma siuliini qanoq ajornanngittartigisoq akisussaaffimminngaanniit qimarratiginnittarneq, Vittus Qujaukitsoq, oqarpoq.

Atassummi siulittaasoq, Aqqalu Jerimiassen, qinigaaffimmi kingullermi naammagittartariaqarsimavoq. Naleraq, Nunatta Qitornai Siumullu ukioq ataaseeqqianngitsoq naalakkersuisooqqatigisimavai. Tamanna uneriasaarpoq, Atassullu naalakkersuisooqqataajunnaarpoq.

- Suleqateqaqqissinnaaniarutta pilliuteqarujussuartarnigut tamaanga killeqartariaqarpoq, Aqqalu Jerimiassen oqarpoq.

Vittus Qujaukitsoq, qinigaaffimmi uanituulli Siumut suleqatiginiarpisiuk?

 

Assi: KNR / Malik Brøns

- Uani kajuminnanngilaq misilittakkagut qinigaaffiup una qaangiutilersup iluani. Qinigaaffiup tulliani pissanganartussaavoq Siumut qanoq ilumini periuuseqassanersoq. Qinersisartut taanna naliliinerminni isumaliuutigilluartariaqarpaat, patajaassuseq ujarneqarpat sangujoraanngitsumik politikkimik ujartuisoqarpat, taava Nunatta Qitornaaniik suleqataavugut, Vittus Qujaukitsoq oqarpoq.

Inuit Ataqatigiit partiit allat aamma suleqatiserai, partiip siulittaasua, Múte B. Egede, oqarpoq.

- Inuit Ataqatigiinniit pingaarnerpaarpaavoq ataqqeqatigiinneq, patajaassuseq torersumillu ingerlatsineq aallavigalugit suleqatigiinnissaq. Taassumalu tulleralugu inuit atugaanik salliutitsilluni pitsanngorsaaniarnissaq, aammalu avatangiisigut mingutsinnagit, taanna oqarpoq.

Kuannersuit - aasiit

Partiilli isumaqatigiinngissuteqarput – tassa Kuannersuarni aatsitassarsiulersaarneq isumaqatigiinngissutigigamikku:

Inuit Ataqatigiiniit aatsitassarsiulersaarneq unitsinneqarusuppoq. Siumut taamaaliorusunngilaq. Aatsitassarsiortoqalissasoq aamma Demokraatinit qineqqusaarutigineqarpoq, piviusunngussappammi kujataani suliffeqartitsiffiusussamik nunatta karsianut millionilippassuarnik isaatitsiffiussammat.

- Uanga ernumavunga, tamatta oqartussaanera ataani, innuttaasut taasititsineqassagaluarpata paartiit marluk maannakkut nikorfasut, qanorluunniit taanna inerneqaraluarpat amerlanerussuteqartut soqutiginagut suliniut unitsiinnarniaraat, Jens-Frederik Nielsen oqarpoq.

AAMMA ATUARUK Erik Jensen: Siumup Kuannersuarni aatsitassarsiortoqarnissamut periarfissarsiornissaq anguniagarivaa

Innuttaasunik qinersititsinissamik kinguneqarataassagaluarpat, inaarutaasoq Inuit Ataqatigiinniit tusaaniarneqarnavianngitsoq, taanna isumaqarpoq. Aatsitassarsiornilikkersaarnermi taanna qanorluunniit IA-mit  unitsinneqarusummat.

Kuannersuarni aatsitassarsiulersaarnermut isumasiuinermi inuit apersorneqartunit 706-iusuni 71 procentii akerliusut, Innovation South Greenlandip imissutigisaanik HS Analysep isumasiuineranit erserpoq.

Isumasiuneq tamanna Inuit Ataqatigiinnut isumalluarnarpoq:

 

Assi: KNR / Malik Brøns

- Inuiaqatigiit peqqissusaat pingaarnerpaajuvoq. Suliniutip avatangiisinut kinguneqarnissaa nalunngereerparput, Múte B. Egede, oqarpoq.

Isummersuutit

Nannumik assiliisoq © Vilhelm Lynge Hard

TV, radio: Qinersisartunik ataatsimiititsinerit

INATSISARTUNUT QINERSINEQ #IQ2021

Illoqarfinni assigiinngitsuni qinersisartunik ataatsimiititsinerit tv-kkut radiukkullu aallakaatilerpagut.

Sumiiffiit ornillugit imaluunniit Facebookimi quppernitsinni KNR-imi Qinersinermi apeqquteqarnissamut periarfissaqarputit:

facebook.com/qinersineq

Pilersaarutit uani takukkit