Eqikkaaneq: Illorsuarni najugaqartunik nuutsitsineq pillugu nalunaarusiaq nakerisarsiunngitsoq

Illorsuarni najugaqartunik nuutsitsineq pillugu nakerisarsiunngitsumik nalunaarusiortoqarnissaa Inatsisartut pingasunngornermi ataatsimiinnerani taperserneqanngilaq.

Partiilli amerlanerit inuusuttut 18-it inorlugit ukiullit inummut navianaateqartumik ukiuni kingullerni pinerluuteqarnerusalernerat iliuuseqarfigineqartariaqarsoraat.

Uani nukappiaqqap 14-inik ukiullip Nuummi Inuusuttunik Sullissiviup eqqaani inuusuttuaqqanit eqimattanit 2023-mi saassunneqarnera aamma filmiliorneqarnera internetikkullu siammarterneqarnera assersuutitut aamma oqaatigineqarpoq.

Oqallinnerit taakku marluk pillugit uani ataani atugaqarsinnaavutit. Atuarluarina.

Illorsuarni innuttaasunik nuutsitsineq

Aki-Matilda Høegh-Damip (N) siunnersuutaa Illorsuarmi innuttaasunik 2017-imi ajunaarnersuup kingorna nuussuisoqarneranik nakerisarsiunngitsumik sukumiisumillu misissuisoqarnissaanut tunngassuteqarpoq.

Siunnersuut Upernaakkut Ataatsimiinnermi siullermeerneqarpoq, uanilu ikinnerussuteqartuinnaat akuersimmata siunnersuut ataatsimiititaliamut suliarineqartussanngortinneqanngilaq.

- Misissuisoqarnissaa pingaaruteqarluinnaraluartoq Siumumiit paasisinnaavarput, amerlanerussuteqartoqannginnera uggornartorujussuuvoq, Erik Jensen (S) oqaaseqartarfimmit oqarpoq. 

Jens Napaattuup oqarnera naapertorlugu siunnersuut innuttaasut angerlaqqissinnaanerannut aqqutissiuussisussaagaluarpoq.

Aki-Matilda Høegh-Damip oqarnera naapertorlugu siunnersuut oqartussat innuttaasut uteqqissinnaanerannik oqarnerannut illuatungaanili pisortanit nalinginnaasumik kiffartuunneqarsinnaannginnerannut tunngassuteqarpoq.

Ineqarnermut, Attaveqaasersuutinut Isorliunerusunut Upalungaarsimanermullu Naalakkersuisulli, Iddimanngiiu Jensen Biancop naalagaaffiup eqqartuussissuserisua suliamik naliliisimanera innersuussutigaa.

Naleqqalli oqartussat suliamik nammineq misissuisuusinnaanngissorai.

- Soorlu pinerluuteqarsimasoq iliuuseqarsimannginnerarluni oqartoq, taamaammallu misissuisoqassanani. Taamaammat suliaq nakerisarsiunngitsumik misissuiffigineqassaaq, Aki-Matilda Høegh-Dam oqaaseqartarfimmit oqarpoq.

Siunnersuut 15-init akerlerineqarluni arfinilinnillu akuerineqarluni itigartitsissutigineqarpoq.

Ukiukitsut pinerluuteqarnerusalertut

Meeqqat inuusuttullu 18-it ataallugit ukioqartut inummut ulorianartorsiortitsillutik pinerluuteqartarnerisa qanoq akiorneqarsinnaanera pingasunngornermi aamma oqaluuserineqarpoq.

Bo Martinsenip (D) Kalaallit Nunaanni Politiit ukiumoortumik nalunaarutaanni kisitsisit ukiukitsut akornanni 2024-mi pinerluuteqartoqarnerusalerneranik takutitsisut pillugit qanoq suliniuteqartoqarsinnaaneranik oqallisissiatut siunnersuuteqartuuvoq.

- Pinaveersaartitsinermut tunngatillugu timersorneq timersuutillu ukkatarineqangaatsiarput, aamma assersuutigalugu timersoqatigiiffinnut aningaasarpassuarnik immikkoortitsisoqartarpoq, Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq, Mariane Paviasen Jensen (IA) oqarpoq:

- Atorfilittakka misissueqquakka kukkusumimmi sammiveqarluta ingerlavugut.

Tamatuma saniatigut Inuit Pisinnaatitaaffii pillugit Siunnersuisoqatigiinni ilaasortat sulinerat pisortatigoortumik tatigineqarluni sulinermut naligitinneqarnissaannut inatsisissatut siunnersuut aamma inuiaat kalaallit nunaannarmi namminerisamik sunngiffimmilu illuaqqiorsinnaanerannik pisariinnerulersitsinissamut inatsisissatut siunnersuut pingasunngornermi oqaluuserineqarput.