Illorsuarmiut Nuugaatsiarmillu: -Angerlaqqikkusuppugut
Ukiut qulingiluat qaangiutereeraluartut Illorsuarmiut Nuugaatsiarmiullu nunaqarfimminnut uteqqinnissartik kissaatigigaat KNR nunaqarfinnut taakkununnga tikeraarnerani oqariartuutigaat.
Allattoq Jonna Enoksen Dahl, Bikki P. Kleist
juulip 27-at 2026 15:53
Uummannamiit Illorsuarnut nalunaaquttap akunnera ataaseq affarlu umiatsiaqqaarluni tikinneqarsinnaavoq.
Nunaqarfik qaqqarsuup ataani inissisimavoq, nunaqarfialu tamangajammi narsartamiilluni.
Uummannap sulluani Karrat Kangerluanni qaqqamik sisoortoqarnerani juunip ulluisa 17-ianni 2017-imi tassaarsuartoqarpoq.
Nuugaatsiarmiut Illorsuarmillu ulloq taanna qimagutsinneqarput.
Illorsuarmi aasarsiortut
Illorsuarmiu Agnethe Jonassen meeqqanilu qimaasunut ilaapput, taassumalu Illorsuit ammaqqinnissaa neriuutigaa.
-Neriuutigiuaannarpara ammaqqinnissaa, ammaqqissappallu angerlaqqissinnaalluta, Agnethe Jonassen oqarpoq nangillunilu:
-Misigissutitsigut ilaatigut pikkunartarpoq meeraqaratta, angerlarsertaramik qanoq iliuusissaaleqinartarpoq.
Agnethe Jonassen
Edvard Korneliussen nuliani Lea Korneliussen meeqqanilu ilagalugit aasat tamaasa Illorsuarnukartarput, nunaqarfillu peroriartorfigisimasani uterfigeqqikkusuppaa.
-Pingaarutilerujussuuvoq, qanorluunniit oqassanerlunga naluara. Meeraaffigalugu, inuusuttunngorninni massakkumullu ukiut 53-it maanimiuunikuuvunga Uummannamut nuutsitaanissatta tungaanut.
Nunaqarfiullu ammaqqinnissaa kissaatigaa.
-Illorsuarmik Nuugaatsiamilluunniit arlaannik ammaaniarlik, manna angallaffiusorujussuusarpoq soorlu tamatuma nalaani aamma ukiukkut sikuutillugu. Maani aalisartarput ukiukkut aamma massakkut.
Edvard Korneliussen
Nuugaatsiarmiuusimasoq aamma uteqqikkusuttoq
Nuugaatsiami illu
Nunaqarfimmut tikikkaanni illut aserfallassimasut arlallit takussaapput, illullu ilai imaanut nakkannginnerussammata allunaasarsuarnik qilersorneqarsimapput.
Karrat Kangerluanni qaqqaq sisooreersoq minutsit arfineq pingasut qulingiluallu missaat qaangiummata mallit pukkinnerpaagamik 9,3 meterinik portussusillit Nuugaatsiamut 2017-imi tassaarsuartitsipput.
Tamatumalu kingunerisaanik inuit sisamat ajunaarput.
Nuugaatsiami kommunefogediusimasoq Mikkel Jeremiassen nunaqarfiup ammaqqinnissaanut neriuuteqartunut ilaavoq.
-Nunagisimallugu ukiuni amerlalaartorpassuarni aammalu pilluarluta ilaqutariuulluta inuuffigisimallugu, neriunneq qamani suli taanna ikumavoq massakkut aamma.
Mikkel Jeremiassen Nuugaatsiaq ammaqqissinnaappat ilaquttanilu angerlaqqikkusupput, oqartussanullu oqariartuuteqarusuppoq:
-Pimoorunneruniarsigit nunaqarfiit taakkua, aap Nuugaatsiaq aserutiteruffiunikuuvoq, siulliullugu suliariniarsiuk Illorsuit ammaqqinnissaat.
Mikkel Jeremiassen
Tassaarsuaqaqqinnavianngilaq
Illorsuit
Hans Frederik Møller Ilulissani massakkut najugaqarpoq, Illorsuillu ammaqqissagaluarpat uteqqikkusuppoq.
Inatsisartut upernaakkut ataatsimiinnerminni Illorsuit ammaqqinnissaat oqaluuseraat, Naalakkersuisulli Illorsuit najornissaannut navianartutut suli isigivaat.
Qaqqat sisooqqissinnaasut tassaarsuarmillu pilersitsisinnaasut Naalakkersuisut akissuteqarnerminni tunngavilersuutigaat.
Nunaqarfiullu ammaqqinnissaanut oqallinneq malinnaaffigeqqissaarpaa, navianartutullu oqariartuut ilumoorsorinngilaa.
-Una sillimaniarnermut tunngasoq una politikkerit amerlanerit qulakkeerusuppaat, paasinartumik aamma. Kisianni Illorsuit tassaarsuaqarunnanngilaq uanga isummanni, siorna inatsisartunut qinigaq taavaneeqatigisara oqarfigaara, tassaarsuaqaqqinnissaa utaqqigaluarumaarpat, immaqa uani oqaatsikka sakkortulaarput, toqussuutit suli tassaarsuaqanngitsoq.
Hans Frederik Møller Ilulissani parti Atassummi siulittaasuuvoq, Inatsisartunullu siorna qineqqusaarnermini Illorsuit ammaqqinnissaa sulissutiginiarlugu oqariartuutigalugu.
Illorsuillu ammaqqissappat nunaqarfimmuinnaanngitsoq iluaqutaassasoq oqaatigaa.
-Illorsuarmiuinnaat illorsuit ammaqqinnissaannik nillianngillat. Upernaviup eqqaaniik, ilulissaniik sineriammiillumi angallattuniik Illorsuit amigaatigineqarluni aamma ammaqqinnissaa kissaatigineqarpoq. Angallannermi aqqusaarfissuummat.
Hans Frederik Møller
