Atlantikup Avannaa Københavnimi Unnuk kulturisiorfimmi misigisaqarfigiuk

Kalaallit, Savalimmiormiut Islandimiullu eqqumiitsuliaat kulturiallu Folketingimi Københavnimilu Nordatlantens Bryggemi tallimanngorpat unnukkut ilaatigut misigisaqarfigisinnaavat. Tamanna ukiumoortumik Unnuk Kulturisiorfimmut ilaavoq.

Allattoq Ann-Sophie Greve Møller

oktobarip 08-at 2026 14:19

Københavnimi tallimanngorpat unnukkut unnuk kulturisiortoqarpat kalaallit kulturiannik misigisaqarnissaq aamma periarfissaassaaq. Kulturikkut sullissiviit 200-nit amerlanerusut matutik ammassavaat, Folketingilu taakkununnga ilaavoq.

Folketingimut ilaasortaq, Inuit Ataqatigiinneersoq, Naaja H. Nathanielsen Savalimmiormiut ilaasortat Anna Falkenberg aamma Sjúrður Skaale peqatigalugit Folketingimut qaaqqusipput.

Tassani politikerinik ilassinninnissaq aamma nunanit avannarlernit qinikkat sammisanik sunik sulissuteqartariaqarnerannik siunnersuuteqarnissamut periarfissaqassaaq.

Unnuup ingerlanerani kalaallinit Savalimmiormiuniillu aliikkusersuisoqartassaaq. NIpilersortartoq The MALIKK aamma Aavaat ilaatigut tusarnaartitsissapput.

Atlantikup Avannaanik misigisaqarneq

Inuit Ataqatigiit Savalimmiormiullu Folketingimi partiivi

Matut nal. 18.00 ammassapput.
Savalimmiormiut erinarsoqatigiit Húsakórið nal. 18.30 tusarnaartitsissapput.
Aavaat nal. 19.15 tusarnaartitsissapput.
The MALIKK nal. 19.45 tusarnaartitsissaaq.
Savalimmiormiut qitittartut Fótatraðk nal. 20.30 takutitsissapput.
The MALIKK nal. 21.30 tusarnaartitseqqissaaq.
Aaqqissuussineq Socialistisk Folkepartiip gruppiata ataatsimiittarfianni quleriiaat aappaanni ingerlanneqassaaq.

Nordatlantens Brygge

Saqqummersitsinerit maanna ingerlanneqartut ’Daamani – i Østgrønland’ aamma ’Følelsernes terræn’ nalunaaqutaq 18.30, 20.00 aamma 21.30 takutinneqassapput.
Eqqumiitsuliortup, Tróndur Paturssonip igalaaminermik eqqumiitsuliaa ’Kosmisk rum’ talittarfiup saani aamma ammatinneqassaaq.

Allisiguk

Naleqqameersoq, folketingimut ilaasortaq, Qarsoq Høegh-Dam partiip allaffianik Borgenimi aamma ammatitsissaaq. Aaqqissuussineq taanna ornigulluni folketingimut ilaasortamik oqaloqateqarfiusinnaasoq pisortatigoortuunngitsoq, partii KNR-imut paasissutissiivoq.

Tamanna Folketingimi nal. 18.00-imit nal. 21.00-ip missaata tungaanut ammatitsinerani periarfissaassaaq.

Kalaallit kulturiat Nordatlantens Bryggemi

Nordatlantens Bryggep unnummut pissanganartumut Kalaallit Nunaannit, Savalimmiunit Islandimiillu eqqumiitsulianik kulturimillu sammisaqarfiusumut matut aamma ammassavai.

Tassani maannakkut saqqummersitanit Tunumiup assiliisartup, Arkaluk Biancop 1950-ikkunni 1960-ikkunnilu ulluinnarni inuunermit assit saqqummersitai ’Daamani – Dengang i Østgrønland’ isiginnaarneqarsinnaapput.

Saqqummersitsinerup ilaatut Bolatta Silis-Høeghip suliaa ’Står og kigger gennem vinduet (ind eller ud)’ aamma misigisaqarfiusinnaavoq.

Kalaallit Nunaannut angerlarseraanni imaluunniit tikeraarnissaq takorlooraanni VR-inik misiliilluni nunatsinni pinngortitat allatut misigisaqarfiusinnaavoq.

Aaqqissuussinerit tamarmik Unnuk Kulturisiorfimmut Kulturpaseqarfiusariaqarput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.