Borgmesterit: Imigassamik matusineq naammanngilaq
Kommune Kujalliup imigassamik nioqquteqarnermik sassaalliisinnaanermillu matusigallarnissamik aalajangernera siunissaq ungasinnerusoq eqqarsaatigalugu aaqqiissutaanngitsoq, kommunini allani pingasuni borgmesterit tapersersunngilaat.
Matusigallarneq piffissaq qaninnerusoq eqqarsaatigalugu aaqqiissutaasinnaasoq, piffissarli ungasinnerusoq eqqarsaatigalugu iliuuseqartoqartariaqartoq, Avannaata Kommuniani borgmesteri Lars Erik Gabrielsen(S) isumaqarpoq.
- Matusineq kisimi aaqqiissutaanngitsoq isumaqarpugut. Piffissarli qaninnerusoq eqqarsaatigalugu aaqqiissutaasoq isumaqarpugut, taanna KNR-imut allappoq.
Imigassanik kimittuunik imerniartarfinni sassaalliisarnerup matuneqarnissaa, taassuma nammineq siunnersuutigisareerpaa.
Avannaata Kommunia imigassaq pillugu politikkimik pilersitsiniartoq borgmesterip aamma oqaatigaa. Matusigallarnerimmi killilersuinerillu piinnarnagit allanik aamma suliniuteqartoqartariaqartoq Lars Erik Gabrielsen isumaqarpoq.
'Ajornartorsiutit uteqqiattut'
Imigassaq Kalaallit Nunaanni inunnut amerlasuunut kingunerluuteqartoq, Qeqqata Kommuniani borgmesterip Malik Berthelsenip(S) isumaqatigaa.
Matusigallarnerli aaqqiissutaannginnerarpaa.
- Ammaqqinneqaraangata ajornartorsiutit uteqqiapput, taanna allappoq.
Imigassap Kalaallit Nunaanni ajornartorsiutaaneranut aaqqiissutaasinnaasut imaaliallaannarlugit aaqqiivigineqarsinnaanngitsut taanna isumaqarpoq.
- Ajornartorsiuteqartoqarneranik nassueruteqarneq aaqqiissuteqarsinnaanissamut aqqutaasinnaavoq, imigassartorunnaarniarnermut aqqutaasinnaasoq, Malik Berthelsen allappoq.
Aalajangerneq ataqqillugu
Kommune Kujalliup aalajangernera Kommune Qeqertalimmi borgmesterip Simigaq Heilmannip(D) ataqqivaa, taannami isumaqarpoq innuttaasut tamanna kissaatigigaat.
Matusigallarnerli aaqqiissutaasorinngilaa:
Uanga nammineq isumaqarpunga tamanna aaqqiissutaanngitsoq. pissutsilli taamaatsillugit innuttaasut kissaatigimmassuk isumaqarpunga aalajangiilluarnerusoq.
Kommune Qeqertallip imigassaq pillugu innuttaasunut ataatsimiititsisarnissani pilersaarutigaa. Isummat taakkunani saqqummiunneqartut naalakkersuisunut ingerlateqqinneqassapput, imigassaq pillugu politikkimik pilersitsinissaq eqqarsaatigalugu.
Borgmesterit politikkikkut oqallittartoqatigiit(PKG) aqqutigalugit imigassamik ajornartorsiutit oqallisigisimagaat Lars Erik Gabrielsen oqaatigaa.
Naalakkersuisut borgmesterillu politikkikkut oqallittartoqatigiinni ataatsimeeqatigiittarput. Imigassaq pillugu ajornartorsiutit qaangerniarneqarnissaannut nuna tamakkerlugu iliuusissatut pilersaarutit tassani oqallisigineqarsinnaapput.
Kommuneqarfik Sermersuumi borgmesteri Avaaraq S. Olsen(IA), KNR-imit apersorneqarnissamut periarfissaqarsimanngilaq, apeqqutinullu allakkatigut aamma akissuteqarumanani.
