Nunatsinni immami sikorasaartumi nalunnermi pissartanngorniuttoqarngaalersoq

Kalaallit Nunaanni immami sikorasaartumi nalunnermi pissartanngorniuttoqarngaalerpoq.

Tamanna peqatigiiffiup Siku Svøm-ip, Nuummi Nuup Saavani sikorasaartumi nalunnermi misilittagaqareersunik misilittagakinnerusunillu oktobarip 18-ianni peqataanissamut qaaqqusineranni, pissaaq.

 25, 50, 100, 200 aamma 1.000 meterimik nalunnermi unammisoqassaaq.

Aaqqissuisut oqarnerat naapertorlugu, pissartanngorniunneq sukkanerpaamik nalunnguarsinnaanermut tunngassuteqarnani sapiissuseqarnermut imminullu unamminissamut tunngassuteqarpoq, Siku Svøm pissartanngorniunnermut atatillugu allappoq. 

- Misilittagaqartut kilumeterimik nalunnissamut kisimik aamma peqataassapput. Taakku taama nalunnermik ikinnerpaamik ataasiarlutik naammassinnissimanermut diplomimik takutitsissapput, Siku Svømimi aaqqissueqataasoq siulersuisunilu ilaasortaq, Bo Krüger KNR-imut nassuiaavoq.

Taassuma immap killingani qiimasoqarluarnissaa qularutiginngilaa, tamannali nalunnermi inernerinik pissuteqarpallaarani.

- Qiimasoqarluartarpoq, pissutigalugu inuit imaanit nillertumit qaqigaangamik pisorpassuaqarmat. Taamaammat hormonerpassuanik aniatinneqartarmata pilluangaatsiartarput. Taamaammat nuannaartoqangaatsiartarpoq, Bo Krüger oqarpoq.

Annanniuteqarnissaq kajumissaarutigineqartoq

Siku Svømip inuit imaani nillertumi sivikitsuinnarmik uumasoqarsinnaanerannik takorluuisarneq akerlilerusuppaa.

- Uanga Qullissani inunngorpunga Nuummilu arfineq-marlunnik ukioqalernissamut tungaanut najugaqarlunga. Meeraaninni imaanut nakkaraanni minutsi ataaseq marlulluunniit imaaniittoqarsinnaasoq oqaatigineqartartoq eqqaamavara, Bo Krüger oqarpoq, nangillunilu:

- Tamanna suli tusakulavara. Taamaammat amerlasuut angalagaangamik annanniuteqarusunnerluunniit ajorput. Tamanna pissutigalugu ipisariaqanngikkaluartunik ipisoqartarpoq. Uagut imaani nillertumi naluttartuusugut sivisuumik imaaniittoqarsinnaasoq nalunngilarput. Allanit qaqinneqarnissamut imaluunniit immap killinganut nalunnissamut piffissaq sivisusinnaavoq, Bo Krüger oqarpoq.

Siku Svømip pilersaarutaasumik nalunneq imaanut tassanngaannartumik nakkarnermut assersuunneqarsinnaanngitsoq erseqqissaatigaa.

- Sikorasaartumi naluttartutut timip imaani nillertumi takorloorneqartartumit pisinnaasaqarnerunera misigisarparput. Kisianni pilersaarutaasumik nalunneq imaanut tassanngaannartumik nakkarnermit allaaneruvoq. Taamaammat annanniuteqarnissaq oqariartuutitsinni pingaarnerpaavoq, siulersuisunut ilaasortaq, Emma Firestone oqarpoq.

Kikkut tamarmik peqataasinnaasut

Pissartanngorniunneq naluttartunngorlaanut misilittagaqarluartunullu ammavoq.

Aaqqissuisut peqataasussat nutaat naannerpaamik toqqaanissaat innersuussutigaat. 

Arnat angutillu akornanni isorartussutsini tamani ajugaasoqartitsissaaq, peqataasullu tamarmik aamma saqqarmiulerneqassallutik.

- 25 meterimik nalunneq inuit ilaannut inuttut angusaqarnerujussuussaq. Tamanna aamma saqqarmiunnassutigineqassaaq, aaqqissueqataasoq, Henrik Stokholm oqarpoq.

Pissartanngorniuttoqarnissaanut nunanit tamanit peqataasoqarsinnaavoq, peqataanissamullu uani nalunaarsinnaavutit.

Siku Svømip nalunaarutaa naapertorlugu Danmarkimit Frankrigimiillu peqataaniartunik nalunaartoqareerpoq.

Siku Svøm nunatsinni Issittumilu sikorasaartumi isumannaatsumik akisussaassuseqartumillu nalunnermik siuarsaanermik suliaqarfiulluni nammineq kajumissutsimik peqatigiiffiuvoq.

Tusagassiuutinut nalunaarut naapertorlugu peqatigiiffiup 'inuit imaani nillertumi, misigisassarsiorfiusumi ataatsimoorfiusumilu killeqarfiit akimorlugit ataatsimoortittarpai.'