Demokraatit naalakkersuisoqataajunnaartut

Erseqqissaat, ataasinngorneq nal. 16.20: Allaaserisami siusinnerusukktu allassimagaluarpoq, Kim Kielsen apeqqutaalluinnartoq, taassumalu qinersisoqassasoq aalajangersinnaagaa. Taannali ilumoortoq tamakkiisuunngilaq. Kim Kielsen Inatsisartut Naalakkersuisunut imaluunniit naalakkersuisunut ilaasortamut tatiginnikkunnaarpata aatsaat qinersinissamut nalunaaruteqarsinnaavoq.  

Demokraatit Siumut Nunatta Qitornaalu naalakkersuisoqatigiunnaarpai.

- Maannakkut qinersisoqarnissaa kaammattuutigaarput, Demokraatit siulittaasuat, Jens Frederik Nielsen tusagasiortunik katersortitsinermi oqarpoq.

Naak demokraatit naalakkersuisoqatigiinni ilaajunnaaraluartut tamanna maannakkut qinersisoqartariaqarneranik isumaqanngilaq.

Naalakkersuisummi siulittaasuat, Kim Kielsen (S) 2018-imi qinersinermili naalakkersuisoqatigisatik Nunatta Qitornai peqatigalugit ikinnerussuteqarlutik Naalakkersuisuunissartik aalajangiuppaa. 

Tassalu Inatsisartuni ilaasortat amerlanerussuteqartut taassuminnga naalakkersuisunulluunniit ilaasortamik allamik tatiginnikkunnaarlutik nalunaarnissaasa tungaannut naalakkersuisunut siuttuuinnarsinnaavoq.

Demokraatit naalakkersuisoqatigiinni siorna maajip ulluisa 29-anni aatsaat ilaalerput.

Partiitut ikiorfartortaanianngitsoq

Demokraatit tamatuma siornatigut naalakkersuisoqatigiinnut ikiorfartortaasimagaluarpoq. Jens Frederik Nielsenip Siumup suleqatiginera tamarmi unitsinniarlugu tusagassiortunik katersortitsinermi oqaatigaa.

Taamaammat Kim Kielsen Inatsisartuni partiinit allanit maanna tapersersortissarsiortariaqassaaq.

Illuatungiliuttut partiiat IA Siumup siulittaasortaavalu Erik Jensen ataatsimeeqatigerngaaqqammertut, sermitsiaq.ag allappoq.

- Siumup aqutsisortaavi politikkikkut qanoq saqqummiiniarnersut paasiniarlugu najuutinngikkutta isumatusaarnerunavianngilaq, IA-p siulittaasua Múte B. Egede sermitsiaq.ag-mut oqarpoq.

Kuannersuarni aatsitassarsiulersaarneq avissaartuunnersuaqartitsisoq

Inuit Ataqatigiit Siumullu naalakkersuisoqatigiilissagunik IA-p Kuannersuarni aatsitassarsiulersaartoqarunnaarnissaa piumasarissagaa, IA-p siulittaasua oqarpoq.

Kuannersuarnimi aatsitassarsiulersaarneq naalakkersuisoqatigiit, tassa Demokraatit, Siumut Nunatta Qitornaalu akornanni avissaartuunnerujussuaqarpoq. 

Kuannersuarni ukiuni kingullerni 14-ini aatsitassarsiulersaartoqareeraluartoq, tamanna maanna isumaqatigiinngissutaaqaaq. Tassami Narsamiit kilometerinik arfinilinnik ungasitsigisumi qaqutigoortunik aatsitassarsiulersaarnermut uranisiornilersaarnermullu akerliusorpassuaqarpoq. 

Aatsitassarsioqatigiiffik aatsitassarsiornissamut suli akuersissuteqanngilaq – Kujataanili innuttaasunik ulluni makkunani ataatsimiisitsinerit akuersissuteqalernissaanut alloriarnerujussuuvoq.

AAMMA ATUARUK Siumut ataatsimiititsinissanik suli kinguartitseqqusivoq

Innuttaasunik ataatsimiisitsinissaraluit taamaatinneqassasut kissaatigigini, Siumut innuttaasunik ataatsimiisitsinissat aallartinnissaannut sapaatit akunneriinnanngortoq nalunaarpoq. 

Aatsitassarsiulersaarneq ingammik kujataamiunit akerlerineqarmat taamaaliorpoq. 

Innuttaasunilli ataatsimiisitsinissat kinguartinneqanngillat – massakkullu pileruttorlutik.

Innuttaasunik ataatsimiititsinerit maannakkutut itsillugit naammassineqarnissaat Demokraatit aalajangiusimavaat.

- Siumup Kuannersuarnut tunngatillugu sammivigiligaa nutaaq naalakkersuisoqataajunnaarnitsinnut pissutaasut ilagaat, Jens Frederik Nielsen oqarpoq.

- Siumumi avissaartuuttoqarnera unammillernaannavippoq. Demokraatit Siumup iluani isumaqatigiinnginnerit qularutigilerpai, siulittaasoq oqarpoq.