Siumut ataatsimiititsinissanik suli kinguartitseqqusivoq
Kujataani innuttaasut ilaat tallimanngorpamiit Kuannersuarni suliniut assortuussutaasoq pillugu ataatsimiisinneqassapput. Siumup siulersuisuunerisa ataatsimiititsinissat kinguartinneqarnissaat kissaatigalugu januaarip 26-ani tusagassiutinut nalunaarutertik ullumi suli attappaat.
- Tusagassiutinut nalunaaruterput Vivian Motzfeldtimit nassiunneqartoq siulersuisuunernillu isumaqatigineqartoq qanoq oqariartuuteqarnitsinnik ersarissumik takussutissiivoq, Siumup siulittaasua, Erik Jensen KNR-imut taama oqarpoq.
Kinguneqartitsisoqassanersoq nalunartoq
Pissutsit maannatut itsillugit ataatsimiititsinerit pilersaarutaasutut pissapput, Siumullu kissaataa pinngitsoorluni. Taamaattoqassappat qanoq kinguneqartitsisoqassanersoq Erik Jensenip oqaatigisinnaanngilaa.
- Maannakkut soorunami oqaaseqarsinnaanngilanga. Inatsisartuni gruppimi oqaloqatigiippugut aamma naalakkersuisoqatigut oqaloqatigissavagut, suulli eqqartussanerigut oqareersinnaanngilanga.
- Maanna siumoortumik oqaaseqarniarnata isumaqatigiissuteqarpugut. Kinguneqartitsineq oqaluuserinngilarput qanorli ingerlaqqissanerluta naalakkersuisoqatigut oqaloqatigeqqilaassavagut, Erik Jensen oqarpoq.
KNR-imiit Siumut sinnerlugu Inatsisartunut ilaasortat arlallit attaveqarfigaagut, amerlanerillu gruppimi siulittaasortik Hermann Berthelsen innersuuppaat.
Taannali partiip Inatsisartuni gruppianit innuttaasunik ataatsimiititsineq kinguartinneqassanersoq pilersaarutilluunniit malinneqassanersut oqaaseqarusunngilaq, partiillu siulittaasua, Erik Jensen innersuullugu.
Kinguartitsineq pisariaqarsorineqanngitsoq
Inatsisartunulli ilaasortaq, partiinilu sinnerlugu avatangiisit pillugit oqaaseqartartoq Doris J. Jensen sorusunnerluni nalorninnginneruvoq. Ataatsimiititsinerit kinguartinneqarnissaat pisariaqanngitsoq taanna isumaqarpoq. Kinguartinneqarpata tusarniaanerup ingerlaneranut kinguneqarnerlussammat.
- Taava aamma nunatsinni suliniutit pingaarutillit tamaasa coronavirusi peqqutigalugu kinguartissavagut? Doris J. Jensen apeqqusiivoq.
AAMMA ATUARUK Jens Frederik Nielsen: Innuttaasut pillugit innuttaasunut ataatsimiititsinernut peqataanianngilagut
Ataatsimiititsinerilli Naalakkersuisut peqataaniaratik nalunaaruteqareernerannit kinguaattooreersut taanna isumaqarpoq.
- Naalakkersuisut peqataaniannginnerat kinguaattoorneroreerpoq, Naalakkersuisummi ataatsimiinerni peqataassasut inatsimmi allaqqavoq, Doris J. Jensen oqarpoq.
Taannali taamak isumaqartuni kisimiinngilaq. Inatsisartunut ilaasortaq Karl-Kristian Kruse, ataatsimiititsinerit inatsisitigut tunngavissaqarmata Naalakkersuisunit ingerlaannarnissaat aalajangiusimaneqarmat paasisinnaavaa.
AAMMA ATUARUK Politiit nunatta kujataani innuttaasunik ataatsimiititsinermi isumannaassuseqartoqarnissaa neriorsuutigaat
Taanna sumiiffinni innuttaasunut ataatsimiititsinerit arlaleriarlutik pisinnaanissaat Naalakkersuisut sulissutigisariaqaraluaaraat isumaqarpoq.
Tamannalu illoqarfinnut marlunnut, Qaqortumut Narsamullu piviusunngorpoq. Naalakkersuisummi illoqarfinni taakkunani ullormut marloriarlutik ataatsimiititsissallutik ullumi nalunaarput.
