Nunatta kujataani Kuannersuarni suliniut pillugu innuttaasunut ataatsimiititsinermut peqataanissamut ernumassutissaqanngitsoq, politimesterip, Bjørn Tegner Bayip oqaatigaa.Assi: KNR

Politiit nunatta kujataani innuttaasunik ataatsimiititsinermi isumannaassuseqartoqarnissaa neriorsuutigaat

Naalakkersuisuni politikerit nunatta kujataani innuttaasunut ataatsimiititsinissat siorasaarisoqarnera pissutigalugu peqataanianngillat. Politiilli oqarnerat naapertorlugu ataatsimiititsinissamut siorasaarinerit ilungersunartuunngillat, isumannaassuseqartitsinissarlu aqunneqarsinnaavoq.

Aatsitassanut naalakkersuisup, Jens Frederik Nielsenip (D) Naalakkersuisullu sinneri nunatta kujataani innuttaasunut ataatsimiititsinissamut siorasaarisoqarnera pissutigalugu peqataaniarnatik tallimanngornermi nalunaarutigaa.

Kuannersuarni aatsitassarsiorfik pillugu paasissutissat piviusut:

  • Kuannersuit Narsap kilometerinik 7,5-inik ungasitsigisumi avannarpasissortaaniippoq.
  • Aatsitassarsiorfik asimi 700 meterinik qutsitsigisumiipppoq.
  • Greenland Mineralsip aatsitassarsiorfk ukiuni 37-ni piiaaffiginiarpaa.
  • Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
  • Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
  • Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
  • Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut ) 111 millionit tonsiussalluni.

Tusarfik: Pinngortitaleriffik aamma Nationalt Center for Miljø og Energi, IPN-iliaq.

Politiilli aperigaanni peqataanngiinnarnissamut pissutissaqanngilaq.

Politiit tungaanniit arlaatigut innersuussuteqarnissatsinnut pissutissaqanngilaq, Kalaallit Nunaanni Politiinit, Bjørn Tegner Bay oqarpoq.

- Inuit ataatsimiinnermit peqataanngiinnarnissaanut politiit tungaanniit arlaatigut innersuussuteqarnissatsinnut pissutissaqanngilaq, politimesteri, Bjørn Tegner Bay KNR-imut oqarpoq.

Nunattali kujataanut tunngatillugu siorasaaruteqarnermut suliaqartoqarsimasoq uppernarsarpaa.

Pissutsit aqunneqarsinnaalluartut

Naalakkersuisut innuttaasunut ataatsimiititsinernut peqataaniarunnaarnerat pissutigalugu suliffeqarfik suliniuteqartuusoq, Greenland Minerals oqartussaniillu inuit attuumassuseqartut innuttaasunut ataatsimiititsinernut kisimik peqataasussanngorput.

Politimesterip suliaq aalajangersimasoq iserfigerusunngilaa, taamaakkaluartorli isumannaassuseq pissutsillu tamanut – aamma nunatta politikeriinut aqunneqarsinnaasut erseqqissaatigaa.

AAMMA ATUARUK Naalakkersuisut Kuannersuit pillugit qaartartumeerinissamik siorasaarinermik tigusaqartut

- Katersuunnissamut kiffaanngissusermut, politikkikkut oqallinnermut tusarniaanermilu siorasaarisoqaraangat suliaq ilungersunartumik tigusaripput qularutissaanngilaq.

- Taamaammat erngertumik iliuuseqarpugut. Piffissap sivikitsup ingerlanerani tigusarinnippugut. Uanilu aqutsisinnaalluarluta misigisimavugut, politimesteri oqarpoq.

Naalakkersuisoq apersorneqarusunngitsoq

Ataatsimoortillugu innuttaasunut ataatsimiititsinissami sillimaniarnissamut ilungersunartumik siorasaarisoqartoq, politimesterip oqaatigaa. Politiillu aaqqissuussinernik qanimut nakkutinnittut aamma erseqqissaatigaa.

AAMMA ATUARUK Qaartartumeerinissamik siorasaarisoqaraluartoq ataatsimiititsinerit naalakkersuisup taamaatiinnanngikkai

- Katersuunnissamut kiffaanngissuseqarnissaq pingaaruteqarluinnarpoq, taamaaliortoqarsinnaanissaanullu isumaginnissaagut.

Taamaappat innuttaasut ilaqutariillu innuttaasunut ataatsimiititsinernut peqataasinnaapput?

- Politiit suliaqarneranut tunngasumik peqataajartunnginnissamik pissutissaqanngilaq.

KNR-ip naalakkersuisoq, Jens Frederik Nielsen suliamut tunngatillugu apersorniaraluarpaa.

Taannali apersorneqarusunngilaq.

Innuttaasunut ataatsimiititsinerit qaqugu sumilu aaqqissuunneqassanersut uani ataani takusinnaavat.