Kuannersuarni aatsitassarsiornissamut suliniut pillugu innuttaasunut ataatsimiititsinernut peqataannginnissaq Naalakkersuisut aalajangiusimavaat. Aatsitassanut inuussutissarsiornermullu naalakkersuisoq, Jens Frederik Nielsen (D) taama oqarpoq.

Innuttaasut politikerillu innuttaasunut ataatsimiititsinernut peqataaniartut navianartorsiornavianngitsut politimesteri Bjørn Tegner Bay ataasinngormat oqarpoq.

Tamannali Naalakkersuisut peqataannginnissamut aalajangernerannik allanngortitsinngilaq.

AAMMA ATUARUK Politiit nunatta kujataani innuttaasunik ataatsimiititsinermi isumannaassuseqartoqarnissaa neriorsuutigaat

- Inuppassuit tusarniaatitsinermik ingerlatsisoqarnissaanut toqqissisimanngillat. Taannalu uanga naalakkersuisutut soorunami tusaanngitsuusaaginnarsinnaanngilara, Jens Frederik Nielsen oqarpoq.

Politiillu navianartoqannginneranik nalileereeraluartut peqataannginnissaq sooq aalajangiusimaneraa aperineqarami ima akivoq.

- Politiit taanna nalilersorpaat, taamalu nalilersuinerat ataqqeqqissaarpara. Kisianni uani pineqarpoq, inuit toqqissisimanersut, Jens Frederik Nielsen oqarpoq.

Annilaanganngitsoq

Taassuma innuttaasunut Kujataani ataatsimiititsinernut tallimaasununut peqataanissaminut innutaasunillu naapitaqarnissaminut annilaanganani erseqqissaatigaa.

Naalakkersuisut innutaasunut kingusinnerusukkut ataatsimiititsinissartik maannakkut pilersaarusiuleruttoraat aamma erseqqissaatigaa, taakkuli qaqugu pissanersut suli nalunarluni.

Jens Frederik Nielsenilu innuttaasut maanna toqqissisimanngitsut kingusinnerusukkut ataatsimiititsinermi sooq toqqissisimanerulersimassasut pillugu aperineqarami sioorasaarisoqarneranut qisuariarlutik ataatsimiititseqqaarnernut peqataaniarnatik aalajangerlutik qaqugulu ataatsimiititsinissaminnut nalilersuillutik oqarpoq.

- Ataavartumik taanna nalilersuunnaavittussaavarput. Taanna qularutigineqassanngilaq. Siullertut oqaatigissavara tamat oqartussaaqataanerat sioorasaarinerit atorlugit innarlerneqartoq uggornarpoq. Taanna akuerineqarsinnaanngilaq.

Politiit suliaq naamassereeraat

Jens Frederik Nielsen Naalakkersuisut tusagassiuutinut jannuaarip ulluisa 29-anni nalunaarutaannut innersuussivoq. Naalakkersuisunut sakkulersornissamik qaartartumeerinissamillu sioorasaarisoqarsimasoq sioorasaarinerilli pimoorussaarpasinngitsut tassani allaqqavoq.

Kujataani sioorasaarinermut suliaq ingerlasimasoq maannali naammassineqareertoq Kalaallit Nunaanni Politiit ataasinngormat uppernarsarpaat.

AAMMA ATUARUK Qaqortumi innuttaasut ataatsimiitsitsinissamut isummaat assigiinngitsut

- Katersuunnissamut kiffaanngissusermut, politikkikkut oqallinnermut tusarniaanermilu siorasaarisoqaraangat suliaq ilungersunartumik tigusaripput qularutissaanngilaq.

- Taamaammat erngertumik iliuuseqarpugut. Piffissap sivikitsup ingerlanerani tigusarinnippugut. Uanilu aqutsisinnaalluarluta misigisimavugut, politimesteri Bjørn Tegner Bay ataasinngormat oqarpoq.