Qaqortumi innuttaasut ataatsimiitsitsinissamut isummaat assigiinngitsut
Kujataani aatsitassarsiornissaq illugu innuttaasunut ataatsimiitsitsinissat kinguartinneqartariaqartoq, Kommune Kujallermi, Siumumilu siulersuisuunerit kissaateqarput – aatsitassanulli naalakkersuisup kinguartinneqassanngitsoq oqariartuutigaa. Innuttaasunut ataatsimiitsitsinissanut peqataasussaanngikkaluarluni, kinguartinneqassanngitsut taanna isumaqarpoq.
Tamanna pillugu Qaqortumi innuttaasut isumaat KNR-imit tusarniarneqarput. Ilaasa kinguartinneqarnissaat, ilaasalu kinguartinneqassanngitsut kissaatigaat.
AAMMA ATUARUK Naalakkersuisut Kuannersuit pillugit qaartartumeerinissamik siorasaarinermik tigusaqartut
-Massakkorpiaq kinguartittariaqarpoq, aamma inuiaqatigiinni inissisimanitsinni ilisimasagut annikippallaaramik, Lena Pedersen oqarpoq.
Kuannersuarni aatsitassarsiornissaq pillugu innuttaasunut ataatsimiitsitsinerit tallimanngorpat februaarip tallimaani Narsarsuarmi aallartinneqassapput.
Innuttaasulli ilaata, ataatsimiitsitsisoqarniarnera ajoriffissaqartinngilaa.
-Ukua aatsitassarsiorniat paasissutissiiniarlutik ingerlatsiniarnerat ajoringilara, Lars Poulsen oqarpoq.
-Soorunami innuttaasut tusarniaaffigineqartariaqarput.
Erik Kielsen, taama oqarpoq.
AAMMA ATUARUK Qaartartumeerinissamik siorasaarisoqaraluartoq ataatsimiititsinerit naalakkersuisup taamaatiinnanngikkai
Sapaatillu akunnerata siuliani, qaartartumeerisoqarnissani sioorasaarisoqareersorlu, aatsitassanut naalakkersuisoq, naalakkersuisullu allat peqataaniarunnaarlutik nalunaaruteqarput. Taamatullu aalajangernerat, Lars Poulsenip ima isummerfigaa:
-Tassa taanna equngassuteqalaarami Naalakkersuisut peqataaniannginnerat, peqataasussanngoraluarlutik peqataajumajunnaarnerat taanna equsoortitsigami, Lars Poulsen oqarpoq.
AAMMA ATUARUK Greenland Mineralsip naalakkersuisut qaartartoq pillugu taamaatitsinerat ajuusaarutigaa
Aatsitassanut naalakkersuisup, Jens Frederik Nielsenip (D) Naalakkersuisullu sinneri nunatta kujataani innuttaasunut ataatsimiititsinissamut siorasaarisoqarnera pissutigalugu peqataaniarnatik tallimanngornermi nalunaarutigaa.
Politiilli aperigaanni peqataanngiinnarnissamut pissutissaqanngilaq.
Politiit tungaanniit arlaatigut innersuussuteqarnissatsinnut pissutissaqanngilaq, Kalaallit Nunaanni Politiinit, Bjørn Tegner Bay oqarpoq.
- Inuit ataatsimiinnermit peqataanngiinnarnissaanut politiit tungaanniit arlaatigut innersuussuteqarnissatsinnut pissutissaqanngilaq, politimesteri, Bjørn Tegner Bay KNR-imut oqarpoq.
Nunattali kujataanut tunngatillugu siorasaaruteqarnermut suliaqartoqarsimasoq uppernarsarpaa.
