Kalaallit inuttut normui 40.000-it qarasaasiakkut paasissutissanik tillinniartoqarujussuarnerani pissarsiarineqaratarsimasinnaasut
Piffissami tulliuttumi sianertoqartarpat mailertoqarpalluunniit mianersornissat pissutissaqarluarpoq.
Kalaallit Nunaannimi innuttaasut inuttut normui 40.000-t missaanniittut susassarinninngitsunit pissarsiarineqaratarsimasinnaapput.
Tamanna Digitalimik ineriartortitsinermut ministereqarfiup KNR-imut oqaatigaa.
- Inuit 40.000-it missaanniittut Kalaallit Nunaanni kommunit ilaanni najugaqartut pineqarput, Digitalimik ineriartortitsinermut ministereqarfik KNR-imut allakkatigut akissuteqarluni oqarpoq.
Inuit 8,8 millionit missaanniittut CPR-ip nalunaarsuiffiani inuttut normui, aqqi najugaallu susassarinninngitsunit pissarsiarineqarsimasinnaanerat ataasinngornermi paasinarsivoq.
Tamanna qarasaasiakkut paasissutissanik tillinniat, suliffeqarfeeqqap CPR-ip nalunaarsuiffianut qarasaasiakkut isersinnaatitaanera atornerlummassuk pivoq.
Digitalimik ineriartortitsinermut ministereqarfiup pisoq "isumannaallisaanikkut pisimasutut ilungersunartutut" taavaa innuttaasullu mianersoqqissaaqqullugit.
- Danmarkimi innuttaasunut kajumissaarinitsitulli, Kalaallit Nunaanni innuttaasut piffissami tulliuttumi eqqumaffiginninnerunissaannik kajumissaarpagut, ministereqarfik oqarpoq nangillunilu:
- Innuttaasutut inunnit atermik, najukkamik inuttullu normumik nalunnginnittunit, paasissutissallu tamakkua avataatigut allanik paasissutissanik isertortunik - assersuutigalugu kodenik passwordinilluunniit pissarsiumasunit - attavigineqaraanni, paasissutissat tamakkua tunniunneqarnaveersaassapput.
Suliaq suli paasiniaaffigineqartoq
Oqartussaasut CPR-ip nalunaarsuiffiani septembarimi pissusissamisoortumik ingerlasoqannginnera tallimanngornermi kingullermi paasivaat.
Ilisimatusarnermut, ilinniartitaanermut digitalimillu ineriartortitsinermut ministerip, Christina Egelundip (Moderaterne), "pisoq ilungersunartorujussuunerarpaa."
- Oqartussaasut susassarinnittut peqatigalugit pisup qanoq annertutiginera paasinialerparput, taanna tusagassiuutinut nalunaarummi allappoq.
Digitalimik ineriartortitsinermut ministereqarfiup, Kalaallit Nunaanni oqartussaasut suliaq pillugu ilisimatinneqarsimanerat KNR-imut ilisimatitsissutigaa.
DR-ip nutaarsiassiinera naapertorlugu Christina Egelund oqarpoq, innuttaasut nutaamik CPR-normoqalertariaqarsinnaasut.
Oqartussaasut kina CPR-imut paasissutissanik tillinniarsimanersoq suli ilisimanngilaat, paasissutissalli internetikkut peqquserlunnermut kinaassuserlu pillugu tillinnermut atorneqaratarsinnaasoraat.
Maannamulli misissuineq naapertorlugu, inuit atiminnik najugaqarfiminnillu isertuussillutik nalunaarsoqqasut paasissutissaat pissarsiarineqarsimarpasinngillat.
Innuttaasutut qanoq iliortariaqarnermut siunnersuutit sikkerdigital.dk-mi atuarneqarsinnaapput.
