Nuummi Ulloq Saliiffissuaq peqataaffigineqarluartoq

Pia Bang Christensenip, CSR Greenlandimi suliniutinik ingerlatsisup aammalu suliniummi Saligaatsumi aqutsisuusup, Nuummi suliffeqarfiit 30-t missaanniittut illoqarfiit pingaarnersaanni saleeqataaniarlutik nalunaarsimasut oqaatigaa.

- Suliffeqarfippassuit saliinissamik pilersaarusioqataaniarlutik januaarimili nalunaarput. Aamma Saligaatsup aallartinneraniilli siullerpaamik biilinik innaallagiatortunik, Nukissiorfinnit atorneqarluartunik, takutitsivugut. Taamaaliornitsigut illoqarfissuarmi avatangiisinik mianerinninnissaq aamma immikkut sammineqalersikkusupparput, Pia Bang Christensen, Namminersorlutik Oqartussani tusagassiisartumut Else Olsvigimut taama oqaluttuarpoq.

AAMMA ATUARUK Saligaatsoq Nuummi ukiut tallimassaanik saliissaaq

Nuummi saleeqataaniarlutik allatsissimasut, Nuup saligaannerulersinnissaanut siunnersuuteqaqqullugit Saligaatsup Facebookimi quppernermini kajumissaarsimavai. Siunnersuutigineqartullu akornanni marluk Saligaatsup ataatsimiititaliaanit pitsaanerpaatut toqqarneqarlutik ajugaatinneqarput.

Siunnersuutip aappaa TELE-mi sulisup Giiti Tittusenip nassiussaraa, taassumalu siunnersuutigaa Nuummi eqqakkanik immikkoortitserisarneq pitsaanerulersinniartariaqartoq, siunnersuuteqartullu aappaa tassaalluni Nuummi Brugseni, avatangiisitigut suliniutissanik arlariinnik siunnersuuteqartoq.

AAMMA ATUARUK Visit Greenland eqqaaviit atorneqarnerunissaannik ujartuisoq

Nuummi ullormik saliiffimmik tapersersuillutik aningaasaliisuupput STARK, Nuuk Imeq, Nuup Bussii A/S aamma Godthåb Transportservice A/S.