Visit Greenland eqqaaviit atorneqarnerunissaannik ujartuisoq

Nunatsinni illoqarfiit saligaannerunissaat, takornariaqarneq pillugu siunnersuisoqatigiinnit, Visit Greenlandimit ujartorneqarpoq. Tamanna pivoq, Nunatsinnut takornariartut Nunatta saligaassusaanik ukiuni kingullerni arlalinni misissuereerlutillu.

Allattoq Apollo Jeremiassen

juunip 11-at 2015 11:43

Visit Greenlandimi pisortap tullia, Anders la Cour Vahl tamanna pillugu ima oqarpoq.

- Illoqarfinni eqqakkat salinneqareersimatillugit takornarianit tamanna nuannaarutigineqartarpoq oqarlutik illoqarfiit saligaatsuunerarlugit. Sulili saliisoqarsimanngitsoq tikikkunik taava pakatsisimallutik oqartarlutik.

Visit Greenlandimi pisortap tullia, Ander la Cour Vahl oqarpoq. Illoqarfinnilu maangaannaq eqqaanerujussuaq piunnaarlugu eqqaaviit atorneqarnerunissaat ujartorlugu.

Aamma atuaruk Nunatsinni eqqagassarpassuit sumi tamaaniittut takornariaqarnermut ajoqusiisinnaapput

- Eqqaavinnut igitsisarnissarput tamatta ilikkartariaqarparput. Tamanna uagutsinnut ajunngitsumik kinguneqaannassanngilaq aamma takornariat Nunatta eqqiluilluinnassusianik misigitinnissaannik kinguneqartussaavoq taamaalillutik Nunatsinniinnerminni misigisaat pitsaanerulissallutik, Visit Greenlandimi pisortap tullia, Anders la Cour Vahl oqarpoq.

Takornariat Nunatsinnut tikittartut nunatta eqqiluinnera pillugu Visit Greenlandimit 2012-imili apersorneqartarput.

Eqqaasitsissutigissavarpullu tassa ullumi aallartissammat illoqarfinni nunaqarfinnilu saligaatsuutitsinissaq siunertaralugu sumut tamaannga eqqakkanik saliinissaq. Tamanna aallarnerlugu, Pinngortitamut Avatangiisinullu Naalakkersuisoq, Mala Høy Kúko Nuummi Katuami nalunaaqutaq ataatsimut oqalugiassaaq.