Nunap immikkoortuini tallimaasuni pingasut nakorsanut pisortaqanngitsut

Peqqinnissaqarfik sulisussaalatsisoq isertugaataanngilaq.

Peqqinnissaqarfiup nunap immikkoortuini tallimaasuni pingasut massakkorpiaq nakorsanut pisortaqanngillat. Taakkua nunap immikkoortuini pitsaasumik ingerlatsinissamik qulakkeerinnittuullutik siuttuusarput.

- Taakkunani nakorsanut pisortaqannginnera Peqqinissaqarfimmi aqutsisunut allanut artukkiivoq, aqutsisummi allat suliassamik saniatigut nunap immikkoortuini taakkunani suleqatiminnut ikiuullutik siunnersuisuullutillu annertoqqutaasariaqartarput, Peqqinissaqarfiup pisortaa Tina Amondsen oqarpoq.

Nunap immikkoortui uku nakorsanut pisortaqanngillat:

Disko (tassa Qeqertarsuup Tunua (aaqq.)), Kujataa Avannaalu.

Nunap immikkoortua Disko aalajangersimasumik 2021-mi juunimili nakorsanut pisortaqanngilaq, atorfilli taanna killilimmik piffissalikkamik inuttaqartarsimalluni. Nunap immikkoortua Kujataa 2022-mi septembarimili nunallu immkkoortua Avannaa 2022-mi novembarimili aamma nakorsanut pisortaqanngillat.

Tamatuma saniatigut nunap immikkoortua Avannaa aamma peqqissaasunut pisortaqarunnaaqqammerpoq.

Sulisunut artukkeeqisoq

Sulisussaalatsinerup nakorsianik sullissinermi sapinngisamik akornutaannginnissaa Peqqinnissaqarfiup tamaviaarutigigaa, Tina Amondsen oqarpoq.

- Sulisussaalatsisoqarfiusuni oqarasuaatikkut nakorsiartitsisoqartarpoq. Peqqissaavinni mikinerni aamma taamaappoq, peqqissaaviillu taakkua sivisuumik aamma nakorsaqanngillat. taakkunanili peqqissaasoqarlunilu peqqinnissamut ikiorteqarpoq, nakorsanut ikioqqullutik sianersinnaasunik.

Nunap immikkoortuisa ilaanni nakorsanut pisortassaalatsineq nakorsianik eqquia?

- Taamaannissaa sapinngisamik ingalassimaniartarparput. Nakorsanut pisortaqanngikkaluartoq nakorsanik allanik taakkunani atorfinitsitsinikkut taamaaliortarpugut, Tina Amondsen oqarpoq.

Taamaammat ingammik peqqinissaqarfimmi sulisut nunap immikkoortuisa ilaat nakorsanut pisortassaalatsinerannit eqqugaanerpaasuupput. Nakorsassaalatsinerinnarmilli eqqugaanngillat, taakkumi suliassamik saniatigut nakorsanut pisortat suliarisassaagalui aamma isumagisarpaat.

- Siornatigutut nunap immikkoortukkaarluta suliunnaarluta Peqqinnissaqarfik tamaat isigalugu kivitseqatigiinnerunissarput pisariaqarluinnarpoq. Tassa atorfinitsitsiffiusinnaasuni suliatigut kivitseqatigiinnerusariaqarpugut, Tina Amondsen oqarpoq.

Taamaakkaluartoq nakorsassaalatsiunnaarnissamik aaqqeeriaannaanngillat.

Nunat avannarliit allat aamma nakorsassaalatsisut

Nunat avannarliit allat aamma nakorsassaalatsimmata nunatsinni nakorsassaalatsiunnaarnissamik qanoq aaqqiisoqarsinnaanersoq oqaatigisinnaanagu, Tina Amondsen oqarpoq.

- Ilaatigut immaqa aningaasaliinerunikkut suliassannilluunniit allaanerusumik naammassinneriaaseqalernikkut aaqqiisoqarsinnaavoq, taanna oqarpoq.

Peqqinnissaqarfiup nakorsassaalatsinerani atorfinitsitsiniarnermut suliinnartitsiniarnermullu aalajangersimasumik periusissiaqarnissaq iluaqutaassasoq, Peter Vedsted nunap immikkoortuani Avannaani nakorsanut pisortaajunnaarniarluni septembarimi nalunaaruteqaqqammersoq oqaloqatigigatsigu oqarpoq.

Politikerilli Peqqinnissaqarfiup pitsanngorsarnissaanut aningaasaliissuteqarusuppallaartanngitsut, taanna isumaqarpoq.

- Nakorsat suliffimmi soqutiginartumiikkusupput. Politikerilli suliffinnik soqutiginarsaanermut aningaasaliissuteqarpallaanngillat. Suliffiup soqutiginartuunissaanut pitsaassuseq appasippallaaleqqavoq, taamaalillunilu atorfinititsiniarneq ajornakusoorluni, Peter Vedsted KNR-imut taamani oqarpoq.

Akisussaaqatigiittut

Tina Amondsen suliassat pillugit maleruagassani tunngavigalugit sulinini pissutigalugu politikerinut ersarissunik piumasaqarnissamut tunuarsimaakannerpoq.

- Politikerit Peqqinnissaqarfik aningaasanut inatsimmit qanoq amerlatigisunik aningaasaliiffigineqassanersoq aalajangertarpaat, aningaasaliissutaasullu amerlassusaat sulininni tunngaviusarput. Politikerit uangalu Peqqqinnissaqarfiup tamakkiisumik isiginerani tamatta immikkut isiginneriaaseqarpugut, taanna oqarpoq.

Sulisussaalatsiunnaarnissamilli aaqqiinissannut suut pisariaqartippigit?

- Tassa nakorsaqarnerulernissaa pisariaqartippara, Tina Amondsen oqarpoq.

Kikkut sulisussaalatsiunnaarnissamik aaqqiisussaatitaappaat?

- Peqqinnissaqarfiup Qullersaqarfia uangalu pisortatut Peqinnissaqarfiup ingerlanneqarnissaa akisussaaffigaarput. Peqqinnissaqarfiup massakkorpiaq nunatsinnullu immikkuullarisssutaanngitsumik sulisussaalatsinerani suliassat sapinngisamik pitsaanerpaamik naammassinissaat tamaviaarutigissavarput, Tina Amondsen oqarpoq.

Peqqinnissaq pillugu ataatsimiititaliarsuup isumaliutissiissutini utaqqiluugaq ataasinngornermi maajip ulluisa 22-anni saqqummiutissavaa.

Ataatsimiititaliarsuup Peqqinnissaqarfimmi ingerlatsinerup qanoq pitsanngorsarnissaanik innersuussuteqarnissaa neriuutigigini, Tina Amondsen oqarpoq.

Meeqqanut, Inuusuttunut, Ilaqutariinnut Peqqissutsimullu Naalakkersuisoq Inuit Ataqatigiinneersoq, Mimi Karlsen, tamanna pillugu oqaloqatiginiarsarivarput.