Nakorsamut sianertut affangajaat ilaanni iluatitsinngitsoortartut
Ajornartorsiut nutaajunngilaq.
Napparsimasutut misigivutit nakorsamillu oqaloqateqarusullutit. Nalunaaqutaq arfineq-pingasut qaangerlugit tanneq pingasunngormat nakorsap oqarasuaataanut sianerputit.
Ilaannili sianernerigaluit iluatsinngitsoorsinnaasarpoq.
Pingaartumik Nuummi najugaqaruit Dronning Ingridip Peqqissaavianullu sianerlutit.
Nakorsamit ikiorneqarniartut affangajaasa ullut ilaanni sianerfigineqartannginnerat KNR-ip allagaatinik takunniffigisinnaasaata maanna takutippaa.
Innuttaasut nakorsamit ikiorneqarusuttorpassuit iluatitsinngitsoortarnerat arlalinnik pissuteqartoq Sermersuumi nunap immikkoortuani nakorsaaneq Jesper Olesen oqarpoq. Nakorsat immikkut ilisimasallit peqqissaasullu amigaataanerpaapput.
- Innuttaasut ulluni suni piffissallu qanoq ilinerani saaffiginnittarnerat apeqqutaalluinnarpoq. Qaqugukkut saaffiginnittartut amerlasanersut ikinnerusarnersulluunniit iluamik takuneqarsinnaanngilaq, taanna KNR-imut oqarpoq nangillunilu.
- Oqarasuaammik tigusisarnerput naammanngilaq. Saaffiginniittoq inuunerminik navianartorsiorpasippat nakorsaq qisuariartussaatitaavoq. Innuttaasulli saaffiginnissutaannik ikiuussinnaasunik suleqatissarsiornitsinni neqeroorusiagut inuttassaqartuaannanngillat.
Aningaameertoqanngilaq, sulisussalli amigaataapput
Naalakkersuisut Dronning Ingridip Peqqissaavianut ukiup massuma aallartinnerani aningaasaliipput. Sulisussaaleqinerujussuarmi qaangerniarlugu aningaasaliisoqarpoq.
Pinasuartumik aningaasaliissutit 3,5 millionit koruuniusut aningaasanut inatsimmi isumaqatigiissummeerput, Nuummilu nakorsap oqarasuaataanut sianernermi utaqqisarnerujussuit sivikillinissaannut ilaatigut aningaasaliissutaallutik.
- Innuttaasut peqqissaavimmit ikiorneqarnerata pitsanngornissaanut aningaasaliinerput nuannaarutigaara. Nuummi innuttaasut ukiuni arlalinni amerliartuinnarsimapput. Taamaattumillu innuttaasut sullinneqarnissaat qularnanngitsumik amerlanernik sulisoqalertariaqarput, Mimi Karlsen tusagassiuutinut nalunaarummi taamani oqarpoq.
Nakorsamilli ikiorneqarniarlutik sianertaraluarlutik iluatitsinngitsoortartut aningaasaliinerup suli ikilisissimagunanngilai. Jesper Olesenimi naapertorlugu iluatitsinngitsoortartut ikilinatik amerliinnarsimapput:
- Piffissami sivitsortumi ilungersunartorsiorpugut. Ukiup aappaata qeqqata missani sivisutigisumik. Ajornartorsiummut tunngatillugu kisitsisit takusinnaasagut kusanartuunngitsut nassuerutigaarput. Ajornartorsiulli suli annertusiartortoq malunnarpoq, taanna KNR-imut oqarpoq.
Aningaasaliissuteqaqqinnikkulli aaqqiissuteqartoqarsinnaanngitsoq Jesper Olsen isumaqarpoq. Ajornartorsiulli maanna sulisussarsiornermiippoq:
- Ukiup massuma aallartinnerani pinasuartumik aningaasaliiffigineqarpugut. Ilungersunartorli tassaavoq allannguiniarneq. Qaammatialunnik sivisussuseqarsinnaavoq. Sulilersinniakkatta amerlanerpaartaat Danmarkimi suliffeqarput. Sulisunik atorfinititsisinnaannginnitsinni aningaasaliiffigineqaqattaaraluarutta iluaqutaanavianngilaq.
Taavami pinasuartumik aningaasaliinermut sulisussarsiornissamullu pilersaarut iluatsippa?
- Iluatsiffeqarpoq, tamakkiisumiunngitsorli. Tamanna kisitsisit takutippaat. Ajunngikannersumik aallartikkiartuaarpugut. Arlalinnik sulilersitsereerpugut, sulilersitattali amerlanersaasa sivikitsuinnarmik, soorlu qaammatini pingasuni atorfeqartarnerat ilungersunartuuvoq. Taamaalilluta sulisunik amigaateqaqqilipallattarpugut.
Iliuuseqartoqartariaqarpoq
Nakorsamilli ikiorneqarniarlutik sianertartut tunniutiinnassanngitsut Jesper Olesen oqarpoq.
- Nalunaaquttap arfineq-pingasut qaangerlugit tanneq pingasunngorluinnarnerani sianeraanni sianerfigineqarnissaq ilimanaateqarnerusarpoq. Sianertut tulleriiaartarpagut. Uagutsinnut attaveqartillutit piareersimagit. Napparsimaninnut tunngatillugu oqaatigisassatit eqqarsaatigeriikkit, aqerluusaq ullorsiutillu piareersimatillugit, taamaalillutit piffissalerneqaruit allapallassinnaanngussavat. Saaffiginnittut sukkaneruppata nassuiaalluarpatalu innuttaasut sullissinnaasagut amerlanerussapput.
Danskit qineqqusaarneranni danskit ministeriunerat – taamani ministeriunertut qinigassanngortittoq – Mette Frederiksen (S) KNR-mut oqarpoq peqqinnissaqarfimmut tunngatillugu nunarput ikioqqussappat Danmark ikiuukkusuttoq. Partiit siuttuisa Foketingimi pingasunngormat oqallinneranni minitseriunerup oqaatigeqqippaa danskit tungaanniit nunatsinni peqqinnissaqarfiit ukkanneqartut.
