Nuummi nakorsiarniarlutit sianerniaruit utaqqingaatsiartariaqassaatit

Nammineq qanigisarluunniit napparsimasoq ikiortarialik siarngutiginerani oqarasuaatikkut sivisuumik utaqqinissaq pakatsinarsinnaavoq.

Ajoraluartumilli Nuummi nakorsap oqarasuaataani pissutsit maannakkut taamaapput. Peqqinnissaqarfik Sermersuumi nakorsaaneq, Jesper Olsen, KNR-imut oqarpoq. 

- Malinnaasinnaanngivippugut. Qassit nunaqqatitsinnut ikiuisinnaasut naleqqiukkaanni amerlanerusut oqaloqatigerusuppaatigut.

Tamanna marlunnik peqquteqarpoq: Ilaatigut peqqinnissakkut sullissisorpassuit sulinngiffeqarput. Tamanna nalinginnaasumik ajornartorsiutaaneq ajorpoq, nakorsammi oqarasuaataanut aasaanerani saaffiginnittut ikinnerusaraluarmata.

Ukiorli manna peqqutit ilisimaneqanngitsut pissutigalugit allaaneruvoq, nakorsammi oqarasuaataani ukiuuneranituulli ulapitsigimmata.

- Neriuppugut pitsanngussasoq. Sulisut ilai feeriareerlutik utissapput. Tamanna iluaqutaassaaq. Tamassumalli saniatigut Nuummi innuttaasut naammagittarmata qutsavigerusuppagut, Jesper Olsen oqarpoq.

Corona sulisussaaleqititsisoq

Nakorsap oqarasuaataani sivisuumik utaqqinermut peqqutip aappaa tassaavoq soraarniuteqartorpassuaqarnera. Ukioq nutaaq aallartimmalli Nuummi peqqissaasut 25-isunit 13-it soraarniuteqarsimapput, corona pillugu ajornartoornermi ukiuni arlalinni suliassanik annertusaaffiusuni sulisimanerat soraarniuteqarnerannut peqqutaassangatinneqarpoq.

- Ukiuni marlunni taakkunani coronamut suliniuteqarsimavugut, sulinngiffeqarnissamullu atatillugu sulisunut iliuuseqaqqusisimalluta. Maanna coronaruppugut. Kisiannili ilimagisimanngilarput taama amerlatigisut soraarniuteqassasut, Jesper Olsen oqarpoq nangipporlu:

AAMMA ATUARUK Peqqinnissaqarfik sulisussaaleqineq pissutigalugu ikilisaasariaqartoq

- Takorloorsimasinnaasimanngilarput nutaanik suleqatissarsiornerup taama maannatuulli ajornartiginissaa. Atorfinnummi allagartaliussatsinnut qinnuteqartoqanngilaq.

Peqqinnissakkut sullissisunik Nuuk kisiartaalluni amigaateqanngilaq. Sulisussaaleqineq Kalaallit Nunaat tamakkerlugu aamma Skandinaviami atuuppoq. Taamaattumik nunap immikkoortuani nakorsap piffissami qaninnermi pitsannguuteqartoqarnissaanut neriorsuerusunngilaq.

- Ajornartorsiutip qanoq aaqqinneqarsinnaanera taajuminaappoq.

Kaammattuut: Piareersimallutillu inussiarnisaarit

Oqarasuaatikkut sullissineq oqilisikkumallugu Jesper Olsen nuummiunut siunnersuutissatsialaateqarpoq: 

Nakorsaatinik pisartakkaminnik nutaanngortitsiniartut nittartakkami doktor.gl-imi tamanna isumagisinnaavaat. Tassani nakorsaatit pisartakkat allagartaat sorliit nutarterusunnerlunikkit allassinnaavaat.

Sullissisut naveernaveersaarisigit, taakkuami pisuunngillat.

Napparsimaneq imaluunniit ersiutit nutaat siarngutigigaanni Jesper Olsen kaammattuivoq oqaloqateqannginnermi ukua eqqarsaatigineqareersimassasut: Napparsimaneq/ersiutit qanoq sivisutigaat? Arlaat taakkununnga iluaqutaappat ajornerulersitsippalluunniit? Ersiutit taakku misigereernikuuppat? 

- Taamaasilluta sukkanerusumik aaqqiissuteqarsinnaalissaagut. Sukkanerusumillu napparsimasumut sullissisinnaagutta piffissap aalajangersimasup iluani amerlanerusut oqaloqatiginissai angumerisinnaavagut, taanna oqarpoq.

Naak oqaloqateqarnissamut utaqqineq sivisugaluartoq naggasiutitut nunap immikkoortuani nakorsaq kajumissaaruteqarpoq.

- Sullissisut naveernaveersaarisigit, taakkuami pisuunngillat.