Peqqinnissaqarfik sulisussaaleqineq pissutigalugu ikilisaasariaqartoq

Dronning Ingridip Napparsimmavissuani piffissami aggersumi uninngasukinnerussaaq. Tamatuma saniatigut nunap immikkoortuini sulisut naammanngippata Nuummut erniartortoqartariaqarsinnaassaaq. Aamma pilattaanerit ikinnerussapput.

Peqqinnissaqarfimmi peqqinnissamut sulisunik immikkut ittumik amigaateqarpoq.

Peqqinnissaqarfik Naalakkersuisut nittartagaatigut tusagassiuutinut nalunaarummi taama allappoq:

- Juunip, juulip, aggustip septembarillu ingerlanerani nunap immikkoortui aamma Dronning Ingridip Napparsimmavissua peqqissaasoqarniarnikkut annertuumik tatisimaneqassapput.

- Aasap qaammataani Peqqinnissaqarfimmi atorfiit inuttalersorniarneqarnerat ajornakusoortanera takornartaanngilaq, aasarmannali sulisussarsiorneq nalinginnaasumiit ilungersunartorsiornarneruvoq.

Peqqinnissaqarfimmut kingunerusinnaasut ima nassuiaaserneqarput:

Dronning Ingridip Napparsimmavissuani ingerlatsinermi nalimmassaaneq

- Peqqinnissaqarfimmi sulisussarsiornermi ajornartorsiutit kinguneri tunngavigalugit sulinngiffeqarnerup nalaani nalinginnaasumiit siniffiit arlallit matusariaqalerput. Piffissat ilaanni pinasuartumik napparsimasut kisiisa isumagineqarsinnaassapput.

Ikinnerusunik pilattaaneq aamma sivisunerusumik utaqqineq

- Piffissat ilaanni pilattaanerit ikilissapput. Pilersaarutaasumik napparsimasunik misissuinerit katsorsaanerillu kinguartinneqassapput, tamatumalu kingunerisaanik utaqqisutut allattorsimasut amerlissapput. Napparsimasut eqqugaasut allannguutit pillugit saaffigineqarumaarput.

Nunap immikkoortuini Peqqinnissaqarfimmut attaviit allanngortinneri:

Nunap immikkoortuini tamarmi sulisussarsiornikkut ajornartorsiuteqartoqarpoq, nunalli immikkoortui ilaat annertunerusumik sulisussarsiornikkut ajornartorsiornerupput. Nunat immikkoortuinut tamanut atuuttoq tassaavoq sulisoqarniarneq annikinnerusoq, taamaattumillu piffissat ilaanni innuttaasut Peqqinnissaqarfimmut ileqquusunit allaanerusunit innersuunneqartassapput.

- Assersuutigalugu nal. sisamat kingorna najukkami Peqqissaavinnut pinnani qitiusumik Napparsimavimmut saaffiginneqquneqassaaq. Innuttaasut eqqugaasut najukkami Peqqinnissaqarfimmiit ilisimatinneqartarumaarput.

Nunap immikkoortuisa napparsimaviannut, Nuummut aamma Danmarkimut napparsimasunik nuussinerit amerlanerit

- Piffissat ilaanni peqqissaavinni/qitiusumik napparsimmavinni/Dronning Ingridip Napparsimmavissuani nakorsat peqqissaasullu ikinneranni imaluunniit sulisorineqannginneranni, napparsimasut amerlanerit nuutsinneqartariaqarnerat aamma qimarngunneqartariaqarnerat naatsorsuutigineqartariaqarpoq.

Erninerit Nuummut nuutsinneqarsinnaapput

- Nunap immikkoortuani napparsimmavimmi illersorneqarsinnaasumik erninissamut upalungaarsimasoqarnissamut sulisunik pisariaqartunik peqanngippat arnat naartusut Dronning Ingridip Napparsimmavissuani erniartornissaat piffissani pisariaqarsinnaavoq.

Nunaqarfinnut tikittoqarnissaa kinguartinneqarsinnaasoq

Tamatuma saniatigut sulisussat naammanngippata peqqinnissaqarfiup nunaqarfinnut tikeraarnissai kinguartinneqanngikkunik taamaatiinnarneqarsinnaapput.

Peqqinnissamik sullinneqarnissaq pisariaqartinneqalissagaluarpat innuttaasut peqqinnissaqarfimmut attaveqarsinnaassasut peqqinnissaqarfik allappoq, taakkulu innuttaasut ataasiakkaat pisaqartitaat aallaavigalugit peqqissutsimut immikkut naliliiffigineqassallutik.

Sumiiffinni nalimmassaanerit pillugit innuttaasunut ingerlaavartumik paasissutissiisoqartassaaq.

- Assersuutigalugu peqqinnissakkut sullissinissat pillugit attaveqaatissanut allannguutaasinnaapput. Paasissutissat Peqqinnissaqarfiup tamanut attaveqaataasigut najukkami peqqinnissaqarfimmiit innuttaasunut ingerlateqqinneqartassapput. Innuttaasut nakorsartinnissaminnut allannguuteqartussat allannguutit pillugit saaffigineqarumaarput.