Nanortalimmi nakorsaqanngitsoq: Magdaline Abelsen nakorsamit uppernarsaatissarsisinnaannginnini pissutigalugu isertitaqanngilaq

Magdaline Abelsen Nanortalimmeersoq Hotel Kap Farvelimi igasutut sulisarpoq.

Taassumali aavata naqitsinera qaffasippallaarmat piffissami matumani sulisinnaanngikkallarpoq. Taamaammat aningaasanik pisartagaqarnissaminut nakorsaminit atsiornermik amigaateqarpoq.

Nanortalimmili nakorsaqannginnera pissutigalugu nappaatiminut atatillugu uppernarsaatissarsisinnaanngilaq, taamaammallu maanna isertaqarsinnaanani.

Nanortalimmimi sapaatini akunnerni marlunni kingullerni nakorsaqanngilaq.

- Akissutigisartagaat tassa taanna ataasiinnaavoq susinnaanngilagut nakorsaqannginnatta, aatsaat nakorsaq tikippat. Aaversinnikkaluunniit uummatimalu misissortinnera paasisaqarfigisinnaanerlugit apersuisaraluarpunga, tassa akissut ataasiinnaavoq, aatsaat nakorsaq tikippat, Magdaline Abelsen KNR-imut oqarpoq.

Peqqinnissaqarfiup attaveqatigiinnermut siunnersortaa, Susanne Lauridsen KNR-imut ima allappoq:

- Ilumoorpoq maajip aqqarngat sioqqullugu sulilersinnaasumik Nanortalimmi nakorsassarsiorneq iluatsissimanngilaq. Nanortalimmi innuttaasut peqqissaasumit misissortinnissaminnut inniminniisinnaapput, aamma ungasianiit Qaqortumi nakorsanit misissorneqarluni nakorsiarnissaq periarfissaavoq.

Magdalene Abelsenilu nakorsiarnissamut – isertitaqarnissamullu utaqqiinnartariaqarpoq.

- Anniartarnera annertusiartuinnarpoq ulloq manna tikillugu. Sapaatit akunneri pingasut qaangiussimalerput suliunnaaramali,  tassa sulisinnaanngilanga suut tamaasa oqimaagigakkit, taanna oqarpoq, nangillunilu:

- Qujanartumik pisortarisatta takoreerpaanga, aamma paasisinnaavaanga sooq sulisinnaannginnersunga.

Innuttaasut nakorsamit ikiorneqarnissaminnik pinasuartumik pisariaqartitsisut kisimik Qaqortumut nakorsiarsinnaasut Nanortalimmi napparsimmaviup KNR-imut paasissutissiissutigaa.