Nualluummut H1N1-imut akiuussutissiinissaq sillimmartaarfigineqalerpoq
Nakorsaatit amerlassusii innuttaasunut 16.000-inut naammapput. Akiuussutissat inunnut tunillatsikkunik nappaammik ilakutaqartitsinissamut ilimanaateqarnerpaanut siullerpaamik neqeroorutigineqassapput.
Tamatumani pineqarput napparsimasut puaat iluamik sulisinnaanngitsut, issanngusartut, uummatimik taqaasigut nappaateqartut, sukkortut nappaatinullu akiuussutissamik amigaateqartut. Qaammatit sisamassaannit sivisunerusumik naartusut imaluunniit tamatuma saniatigut nappaatillit aammattaaq akiuussutissalerneqarnissaminnik neqeroorfigineqassapput.
Peqqinnissaqarfik nappaammik tuniluuttoqalerpat sulilersinnaaniassammat nakorsat napparsimasunillu paarsisut aammattaaq akiuussutissalerneqarnissaminnik neqeroorfigineqassapput. Inuit inuiaqatigiinnik napatitsisuni allani sulisut aammattaaq akiuussutissalerneqarnissaminnik neqeroorfigineqassapput, tamatumani assersuutigalugu politiit, qatserisartut timmisartoqarfimmilu sulisut.
Peqqinnissakkut Nakkutilliisoqarfiup erseqqissarpaa Kalaallit Nunaanni H1N1-imik nualluutilinnik suli nassaartoqarsimanngitsoq. Taamaattorli ullut pingasut-tallimat kingornatigut quersornerit anersaartorniarnerillu ajornerulersimappata nakorsamik attaveqarnissannut kajumissaarneqassaatit.
Inuit makkunannga nappaatillit akiuussutissinneqarnissaminnik neqeroorfigineqassapput:
Anigorsinnaanngisamik pualluutillit
Anigorsinnaanngisamik taqqamikkut uummammikkullu nappaatillit
Aammikkut nappaatillit
Kingunerluutilimmik nakorsaruminaatsumilluunniit sukkortut
Timip nappaatinut akiuussinnaassusiagut akornutillit
Sianiutit nukinnut attaviisa nappaateqarfiunerisigut anernikilliortut quersorluarsinnanngitsulluunniit
Anigorsinnaanngisamik tingulluutillit tartuluutillilluunniit
Pualavallaartut
Allanik nappaatillit nakorsap naliliinera naapertorlugu inuunerat nuallunnikkut navianartorsiortinneqarsinnaappat.
Naartusut aamma nualluummik A(H1N1)-imik tunillatsinnermikkut kingunerlutitsisinnaasunut ilaapput, taamaammat najoqqutassiaq una malillugu akiuussutissinneqarnissamik neqeroorfigineqassapput: Qaammatit 4-assaat naartusut tamarmik.Naartunerup qaammatai siulliit 3-t nualluummik tunillatsinnikkut peruluutaasinnaasunik arlaannik nappaatillit. Nappaatip peruluutaasinnaassusia naliliivigineqaqqaassaaq.
