Naartuersinnissamut Danmarkimi killigititaasoq sapaatit akunnerit aqqaneq-marlunniit 18-inut sivitsorneqartoq
Folketingimi sivitsortumik oqallittoqareersorlu qaqugukkut naartuersittoqarsinnaanersoq, Folketingemi amerlanerussuteqartunit isumaqatigiissutigineqarpoq.
Tassa naartuersinnissamut Danmarkimi killigititaasoq sapaatit akunneri aqqaneq-marlunniit 18-inut 2025-mi juunip aallaqqaataani atuutilertumik sivitsorneqassaaq.
Naartuersinnissamut Kalaallit Nunaanni killigititaasoq allanngortinneqanngilaq, tassa sapaatit akunneri aqqaneq-marluk qaangiutsinnagit naartuersittoqartarnissaa piumasaqaataavoq.
Naartuersinnissamut killigititaasup sivitsorneqarnissaa, Danmarkimi ileqqorissaarnissamik siunnersuisoqatigiit siorna siunnersuutigaat, Danmarkimi naartuersinnissamut killigititaasup Europami nunanut allanut sanilliullugu sivikippallaarnera tunngavilersuutigineqarluni.Naartulernermiit sapaatit akunneri 18-it qaangiutsinnagit Sverigemi Islandimilu sapaatit akunneri 22-t qaangiutsinnagit naartuersittoqarsinnaavoq.
Danmarkimi naartuersittarneq pillugu malittarisassanik ukiuni kingullerni 50-ini allannguisoqarsimanani aatsaat allannguisoqarpoq, maannalu allannguisoqartariaqariaqartoq danskit nunamut namminermut peqqinnissamullu ministeriat Sophie Løhde (V) oqarpoq.
- Naartuersinnissamut maanna killigititaasup peqqissutsimut ulorianarsinnaaneranut takussutissaqanngilaq, naartuersisinnaanerlu kingusinnerusukkut imaluunnit arlaleriarluni naartuersikkaanni ulorianarsinnaaneranik takussutissaqarpasinngilaq, Sophie Løhde oqarpoq.
Naartuersinnissamut malittarisassartaat atuutilerpata, nivissat 15-it 17-illu akornanni ukiullit angajoqqaaminnit akuersiteqqaarnatik aamma naartuersissinaalissapput.
Danmarkimi 1973-imi nunatsinnilu 1975-imi naartuersittoqarsinnaalerpoq.