Kisitsisit nutaat: Naartuersittartut meerartaarineqartunit suli amerlanerusut
Nunatsinni naartuersinnerit meerartaarnernit suli amerlanerupput.
Nakorsaaneqarfimmit naartuersinnerit pillugit kisitsisit nutaat tamanna takutippaat.
Arnat 800-t akornanni naartuersinnerit 857-iusut, 2022-mit kisitsisit takutippaat. Tassa imaappoq arnat ilaat ataasiaannarnatik naartuersissimapput.
Arnat 56-it 2022-mi marloriarlutik naartuersipput. Ataaserlu pingasoriarluni naartuersissimasoq, nun.gl-imi allassimavoq.¨
Nunatsinni naartuersinnerit erninernit taamaasillutik amerlanerupput: 2022-mi meeqqat inunngortut 754-iupput – naartuersinnerillu 857-iullutik. Tassa imaappoq naartuersinnerit ernisunit 103-nik amerlanerupput.
Ukiup siulianut sanilliullugu naartuersittut amerlanerulaartut
2022-mi naartuersittut pillugit kisitsisit nutaat ukiup siulianut sanilliullugu amerlerialaarput: nunatsinni naartuersittut 2021-mi 842-rput. Tassa imaappoq 2022-mi naartuersittut 2021-mi naartuersittunit 15-inik amerlanerupput.
2021-mi ukiup pingajussaanik naartuersittut ikiliartorput, taakkuli maanna amerleqqipput.
Naartuersittut 2018-imi amerlanerpaapput: Ukioq taanna naartuersinnerit 931-t Nunatta Nakorsaaneqarfianut nalunaarutigineqarput.
Nunap immikkoortuani Kujataani naartuersittoqarnerpaasoq
2022-mut uteqqeriarutta. Nunatta immikkoortuani Kujataani naartuersinnerit amerlanerpaapput: Tassani arnat 1.000-iugunik 91,3-t naartuersipput.
Nunatta immikkoortuani Avannaani arnat 1.000-iugunik 42,5-it naartuersipput.
- Ukioqatigiiaani 20-t 29-llu akornanni ukiulinni naartuersittut amerlanerungaatsiarput. Naartusinnaasut 1.000-iuppata 15-init 19-inut ukiulinni naartuersittut 30-t 34-llu akornanni ukiulinnisut amerlatigaat. Suli 15-iliisimanngitsuni arfinillit naartuersipput, Nakorsaaneqarfik nalunaaruteqarpoq.
