Tusagassiuutit: KNAPK-mi millionit amigaataasut Hong Kongimut nuunneqarsimasut
![](/sites/default/files/styles/image_934x467/public/2024-04/Nikkulaat%20Jerimiassen_1.3.1.png?itok=p74wvdJ9)
Suliniaqatigiiffiit marluk Atlantic Salmon Federation (ASF) aamma North Atlantic Salmon Fund (NASF) kontumut aalisartut piniartullu kattuffiata KNAPK-p aamma iserfigisinnaasaanut millioninik 2019-imi nuussipput.
Sermitsiaq taama allaaserisaqarpoq.
Aningaasat taakku suliniaqatigiiffiit marluk aamma KNAPK-p akornanni kapisillit eqqissisimatinneqarnissaannut ukiunut 12-inut isumaqatigiissutip ilagaat.
KNAPK-p siulittaasuata, Nikkulaat Jeremiassenip oqarnera naapertorlugu aningaasat 1.050.000 koruunit pineqarput, taakkulu 2019-imi tammarsimasut sermitsiaq allappoq.
Nikkulaat Jeremiassen aningaasat tammarnerat pissutigalugu 400.000 koruuninik ukiumoortumik pissarsinngitsoortarlutik, KNAPK-p immikkoortortaqarfimminut siusinnerusukkut oqaatigaa.
Suliniaqatigiiffinnit marlunnit aningaasat Hong Kongimut tammarsimasut maanna paasineqarpoq.
ASF aamma NASF ataatsimut allakkaminni Sermitsiamut ima nassuiaapput:
- 2019-imi aningaasat Kalaallit Nunaanni aningaaserivimmi kontumiittut tammarput, tamanna unioqqutitsilluni allap qarasaasiaanut isernikkut peqquserlunnikkulluunniit pisimassagunarpoq. Tamanna paasigatsigu ASF-ip NASF-illu pisoq Kalaallit Nunaanni Hongkongimilu politiinut nalunaarutigaat, aningaasallu nassiunneqarsimasut tassani allattugaatit takutippaat. Aningaasat kingorna nassaarineqarsimanngillat.