Naalakkersuisoq MIO pillugu apersorneqarusunngitsoq

Meeqqat pillugit oqaaseqartartoq Stina Sværd soraarsinneqarmat, kia meeqqat pisinnaatitaaffiinik isumaginnittussanngussava? Aningaasanillu atornerluisoqarsimanera pillugu suliaqartoqarnerani, MIO qanoq iliorneqassava?

Tamanna pillugu KNR-ip Meeqqanut, Inuusuttunut, Inatsisit Atuutsinneqarnerannut Naligiissitaanermullu Naalakkersuisoq Mariane Paviasen Jensen (IA) akissuteqartinniarsimagaluarpaa.

Naalakkersuisorli apersorneqarusunngilaq.

Allakkatigut akissuteqarnermini inunnut ataasiakkaanut tunngatillugu suliaqartoqarnerarpaa taakkulu pineqartut eqqarsaatigalugit tamanut oqaaseqarsinnaanani eqqaallugu.

IA erseqqissaateqaqqusisoq

Inuit Ataqatigiit Inatsisartunut suliamut atatillugu erseqqissaaqqusernerata kingorna itigartitsisoqarpoq.

KNR-ip Mariane Paviasenip nammineq partiimi kissaatigisaa malinniarneraa aperaa.

Taassuma IA-p saaffiginnissutaa takusimannginnamiuk tamanna maanna akissuteqarfigisinnaannginnerarpaa.

Peqatigisaanillu suliani ingerlanneqartuni tamani pissutsit tamakkiisumik erseqqissarsinnaanagit erseqqissaatigaa.

- Pisut tamarmik uggornarlutillu alianartuupput, taanna allappoq.

Nutaamik oqaaseqartussarsiortoqassasoq

Nunatsinni meeqqat pillugu oqaaseqartartoqannginnerani susoqassanersoq pillugu apeqqummut naatsumik ima akissuteqarpoq:

- Oqaaseqartartussarsiortoqartariaqassaaq.

Mariane Paviasenip qanoq qaquguluunniit tamanna pissanersoq imaluunniit naalakkersuisut qanoq ilillutik meeqqat pisinnaatitaaffiinik qulakkeerigallassanersut paasissutissiissutiginngilaa.

MIO-p siunissaanut apeqqummut tunngatillugu naalakkersuisut suliniaqatigiiffiup suliamik ingerlatsiinnarnissaa neriuutigaat taassuma allappaa.

- MIO-p siunissaa pitsaasuussasoq kissaatigeqaarput, pisariaqartipparpullu ingerlaannassasoq meerartatta illersorneqarnissaat pingaaruteqarluinnarmat.