Narsami peqqissaasutuap soraarniuteqarnera peqqissutsimut naalakkersuisup qisuariarfigigaa
Narsami peqqissaasutuap soraarniuteqarnera pillugu KNR allaaserisaqareertorlu, Peqqissutsimut inunnullu Innarluutilinnut Naalakkersuisoq Anna Wangenheim (D) qisuariaateqarluni tusagassiuutinut nalunaaruteqarpoq.
Tassunga killittoqarnera Anna Wangenheimip ajuusaarutigalugu uggoralugulu KNR-imut oqaatigaa:
- Siullertut oqaatigissavara ajuusaarutigeqigakku pissutsit tassunga killissimammata uggoralugulu aaqqiissutaasinnaasunik nassaaqatigiittoqarsimannginnera.
- Soorunami sulisunut ataasiakkaanut tunngasunik oqaaseqarsinnaanngikkaluarlunga oqaatigiinnarusuppara naalakkersuisutut aningaasat sinaakkusiorneqartut aqqutigalugit sulisunik attassinissamik siunertaqartunik suliniuteqaratta taamaattumik uggoreqaara tassunga killittoqarsimanera, Anna Wangenheim (D) oqarpoq.
Narsap peqqissaaviani nakorsaqarniarnikkut allanngortoqarnerani ukiup aappaata affaata matuma siorna ajornartorsiuteqalertoq Berit Byg KNR-imut oqaluttuarpoq.
Nalunaarut 2011-meersoq allanngortinneqassasoq
Nunatsinni peqqissaavinni sulisussaaleqisarnerit ineriartortitsinissamullu aporfiusartut suminngaanniit qanorlu pissuteqarnersut peqqissutsimut naalakkersuisup suminngaannit aallaaveqarnersut paasisimallugu oqaatigaa:
- Oqaatigisinnaavara ilaatigut peqqutaasinnaasut nassaarigatsigit, ilaatigut nalunaarut taanna eqqaaqqippara 2011-meersoq ilaatigut qitiusumiik immaqa ingerlatsineq taamaalilluni peqqissaavinni sulisunik peqataatitsineq killeqartarsinnaasimanera.
- Taanna oqaatigisinnaanngilara kisianni inatsisitigut taanna takusinnaavara immaqa aporfioqataasimavoq taamaalilluni peqqissaavinni mikinerusunilu sulisuusut peqataatinneqarnerat annikissimasoq taannalu allanngortikkumavarput, taanna oqarpoq.
Nunatsinni peqqissaavinnik 2011-imi eqiterisoqarpoq.
Peqqissaavinnik eqiterineq illoqarfinni tallimani qitiusumik peqqinnissaqarfeqalerneranik isumaqarpoq.
Qitiusumik peqqinnissaqarfeqalernerata kingorna aqutsisut peqqissaavinni sulisoqarnikkut, aningaasatigut aqutsinikkut allatigullu akisussaaffeqarnerulernerat peqqissaavinni sulisunik peqataatitsivallaarunnaarnermik kinguneqarpoq tamannalu allanngortinneqassasoq Anna Wangenheim oqarpoq.
- Taannaluuna ilaatigut tikkuarumagipput immaqa peqataatitsinissaminnik killeqartitsisinnaanerat inatsisitigut ersernerlummat.
- Ulluinnarni ingerlatsisuusut aamma ulluinnarni sulisuusut tatigineqarlutik peqataatinneqarlutik, ineriartortitsinissaminnut aamma akisussaaqataasinnaanerat naqissuserusullugu inatsisitigut.
Aningaasaqarnikkut sipaarniartoqanngitsoq
Narsami nakorsaqarniarnikkut allanngortoqarnerani sulisukillisaasoqarnera sipaarniarnermik pissuteqartoq Berit Byg peqqinnissaqarfiup aqutsisuanit paasitinneqarsimalluni KNR-imut oqaatigaa.
Peqqinnissaqarfinnulli sipaarniartoqanngitsoq aamma sulisukillisaasoqanngitsoq Anna Wangenheim oqarpoq.
- Peqqinnissaqarfimmi aningaasanik sinaakkusiussat oqaluttuarisaanitsinni aatsaat taama amerlatigisunik ataasiakullattunillu aningaasaliisoqaqattaarpoq.
- Taamaattumik sipaarniarneq taanna pinaveersaartissimavarput aamma siornali, taamaalilluta aamma peqqissaaviit nunap immikkoortuinilu peqqinnissaqarfiit aamma immikkut ittumik aningaasalersoqqinneqarnikuupput missingersuutit saniatigut.
Peqqinnissaqarfik kujataa aningaasaliiffiginikinnerusimava?
- Naamik. Ukioq kingulleq ukioq mannalumi aamma immikkut ittumik aningaasalersoqqinneqarput taamaattumik naalakkersuinikkut politikkikkullu taperserneqarput sinerissatsinni napparsimaveqarfiit taamatullu peqqissaavinni mikinerusuni taamaattumik ilisarisinnaanngilarput peqqissaavinni sipaarniartoqarnera, Anna Wangenheim oqarpoq.
KNR-ip naalakkersuisoq peqqinnissaqarfinnut tunngasumik sivisunermik apersornikuuaa, allaaserisarlu piffissami tulliuttumi saqqummerumaarpoq.
