Sakkutooqarnermi sungiusarnerujussuaq piviusumut sungiusarnerusoq
Nuummit kujammut 10 sømilinik imaluunniit 15 kilometerit missaannik ungasitsigisumi umiarsuit marluk oktobarip aallaqqaataanni aporput.
Umiarsuit aappaat tassaavoq takornariartaat, Sleeping Beauty nunanit assigiinngitsuneersunit soraarnerussutisialinnik 23-inik ilaasulik, umiarsuup aappaata suunera ilisimaneqanngilaq.
Sleeping Beauty immakkiartorpoq, ilaasut arlallit ajoqusersimapput, arlallillu apornerup kingorna imaanut nakkarsimallutik.
Umiarsuup Aasiaat Radioanut sisamanngornermi ullaakkut qulingiluat qaangilaaraa, qaammareersoq seqernullu umiarsuarmi aputip seqersimalernerani, ajunaalernermik kalerrisaarutaa taama oqaasertaqarpoq.
Ajunaalernermik kalerrisaarut nunatta SAR-imik upalungaarsimasuisa, piareersimasut, sungiusarnerannik aallartitsivoq.
Sungiusarnerujussuup aallartinnissaanut sapaatip akunnera tamaat piviusuusaartitsinernik assigiinngitsunik pilersaarusiortoqarpoq, umiarsuup sorsuutip naalagaata tulliata Lars Nielsenip, Issittumilu Sakkutooqarfimmi pisortap tulliusup oqaatigaa.
- Ulloq siulleq ajunaalernermi kalerrisaarut takuneqarpoq, inuit marluk qeqertami ullup tulliani nikeriarsinnaajunnaarsimasut isumagineqarput umiarsuarmilu pingasunngornermi ikuallattoqarpoq ilaasullu annaanneqassapput.
Sakkutooq inuusuttoq utoqqalinersiuteqartuusaartoq
Sakkutuut Royal Arctic Linellu umiarsuaani Tiliumi inuttat peqatigalugit sungiusarnerup aallartinnissaanut akunnerpaaluit sioqqullugit Nuup umiarsualivianiit iluliamernit akornisigut ullaakkut aallarput.
Sakkutuut issingigassanik, nerisassanik pastatalinnik, kukkukoortalinnik imiliinnarissanik nassarput.
Sakkutuut piviusuusaartitsinermi kiinnamut tarngutinik nassarput, kaptajnip Issittumilu Sakkutooqarfiup immikkoortortaqarfiisa ilaanni naalakkap tulliata Mikael Langenbach Arildsøp, umiarsualivimmiit avalannginnerminni, oqaatigaa.
Tiliumi nerisarfiarannguami inunnut arfineq pingasunut naammattumi pissangasoqarpoq. Inuillu 23-t inissakilliorlutik maanna tassaniipput.
Bjørk Rimmen Noe 21-nik ukiulik 2025-mili novembarimi Issittumi Sakkutooqarfimmiilersoq sungiusarnermut peqataavoq.
- Annemik ateqartuusaarlunga 64-inik ukioqartuusaassaanga uummatinnillu unittoortuusaassallunga. Neriuppungalu qulimiguulimmik annaanneqassallunga.
Qulimiguullit nipaat pissanganartorsiornermut ilisarnaataasut
Pissamaarnerup pianik nipiliortoqarunnaariartorpoq sungiusarnerullu aallartinnginnerani nalunaarutigineqartussat kingulliit oqaatigineqarput.
Qulimiguullit nipaat qassarissiartorpoq Air Greenlandillu qulimiguulii SAR-imik annanniutit ungasissumit erserput kinguninngualu illersornissaqarfiup qulimiguuliata Sea Hawkip Tilioq qulangerpaa.
Nakorsaq umiarsuarmut actionimik filmiliatut ninginneqarpoq. Anguniagaqartutut ilumoorsaarpasippoq. Tamanna qularnanngilaq. Sungiusarneq aallartippoq.
Umiarsuarmi utoqqalinersiallit aqqanillit ikioqqullutik nilliapput. Qulimiguullip nipaa kisimi tusarsaavoq qimagunniariartorli piviusuusaartitsisunit ikioqqunerit tusarsaaqqilerput.
- Ikiortissannik. Arlaata tusaasinnaavaanga. Ikiortissannik. Ikiortissannik. Anniaqaanga. Arlaata tusaasinnaavaanga? Ikiorsinga.
Mira Andersen umiarsuup usilersortarfiani issiavoq, angutaasuusaarlunilu 82-inik ukiulik Amerikameersoq, pitsorlulluni tummeqqakkut nakkarnermigut niuminik napisoorsimasoq.
Nilliasut, anori, imaq - paatsiveerusimaarneq
Nakorsap umiarsuup nerisarfiata isaariaani Bjørk Rimmen Noe allunaasat qaavanni ilisimajunnaarsimasoq takuaa maskiinaqarfimmilu arnaq utoqqaasaartoq niaqqumigut ajoqusersimasoq nalavoq. Umiarsuup siuani pisuusaartut marluk qerrussimasuusaarput. Aappaa ilisimmartarlunilu ilisimajunnaaqqittarpoq.
Nakorsaq ajoqusersimasut isiginnaartullu akornanniilluni susoqarsimaneranik paasiniaavoq.
Taamaalinerani ilaasoq tungaannaanut arpappoq.
- Qanoq iliorsinnaavunga? Qanoq iliorsinnaavunga? Ikinngutikka ikiorsinnaavigit? Usisarfimmiipput malinnga, oqaatsinilu uteqattaarlugit.
Nakorsarlu suleqatiminit kinguninngua ikiorneqarpoq.
- Maskiinaqarfimmiittoqarpoq niaqqumigut ajoquserujussuarsimasumik, sisamat usisarfimmiipput, marluk umiarsuup siuaniipput nerisarfiullu isaariaaniittoqarluni.
Piviusuusaartitsisut tamarmik qaamikkut kisitsisilersorneqarput, taakkulu kikkut ikiorneqaqqaassanerinik nalunaaqutsiussaapput.
- 1-imiit 4-mut nalunaaqutsersuisoqarpoq, 1-iupput ikiorneqaqqaartussat 4-uppullu ajoqusersimannginnerusut ikiorneqarnissaminnik utaqqisinnaasut, isiginnaartut ilaat oqarpoq.
Sakkutooq maskiinaqarfimmiittoq qaamigut 1-imik nalunaaqutserneqarsimavoq. Kinguninngua nakorsaq alla umiarsuarmut tikiuppoq Issittumilu Sakkutooqarfiup qulimiguulianut, umiarsuarmik suli qulangiussimasumut, assamminik nalunaarpoq. Taskerlu nakorsaatinik imalik akiutillu ninginneqarput, sakkutooq nakorsarlu qulimiguulimmit minutsialunnguit qaangiummata kivinneqarput Nuullu tungaanukarlutik.
Pissutsinik ilisimannittoqartariaqartoq
Sakkutuut ataasiakkaarlutik qulimiguulimmik gummibådenilluunniit, Issittup Sakkutooqarfiata imarsiortuinit Tritonimit Ejnar Mikkelsenimiillu, qimagussorneqarput. Imarsiortut taakku marluk Tiliuminngaanniit, sungiusarnermi uani Sleeping Beautymik taagorneqartumit, 150 meterisut ungasitsigisumiipput.
Arlallillu masassiutillit nakorsallu, akunnerup tulliata tungaanut, sungiusarnermut peqataajartorlutik Tiliumut ikiartoqattaarput.
- Inuit katillugit 200-nit 250-ip tungaannut sungiusarnermut peqataajartorput, soorlu Kalaallit Nunaanni Politiiniit, Aasiaat Radioaniit sungiusarnermilu peqataasunit, umiarsuup sorsuutip naalagaata tullia Lars Nielsen oqarpoq.
Pissutsinillu ilisimanninnissaq aamma. Nakorsaq siulleq umiarsuarmut ikisoq nakorsamut tullermut paasissutissiissaaq.
- Niaqqumigut ajoqusernilik qimarngutereerparput, pingasut gummibådenik qimarngunneqarput pingasullu tæppilerlutik nerisarfimmiipput.
Arlaatigulli eqqunngitsoqarpoq.
Mira Andersen usisarfimmi maanna ikiorneqarpoq. Niua qerattaqquserneqarpoq nipaallisaatinillu tunineqarluni.
- Nipaallisaammik tunivakkit, nakorsaq qisuminertut isikkulimmik tigummiarluni oqarpoq.
- Una ilumoortuuvoq, taamaattumik iissanngilat oqummiartuusaassavalli, Mira Andersenimut oqarpoq.
Kikkut qimagussorneqarsimanersut kikkullu amigaataanersut umiarsuup qaavaniittut paasereersimavaat. Qulimiguulillu Sea Hawk uterpoq umiarsuarlu qulangersimalerlugu.
- Illit paatsiveeruteqqasutit uunga ilaassuutit, Ejnar Mikkelsenimiit tikiuttut ilaat oqarpoq, qerussornilillu saneqqukkami qungujorujulluni oqarpoq:
- Qulimiguulimmik qimagutsinneqartariaqarpunga.
Sungiusarneq naammassisoriniarlugu…
Nakorsap siulliup Tiliumut tikiunneraniilli akunneq ataaseq minutsillu 40-t qaangiuttut, paatsiveerusimaartoqarunnaarluni oqaluppalaartoqarlunilu qungujulasoqarpoq. Isiginnaartut annaassiniartartullu kingulliit gummibådemik aaneqarnissaminnut umiarsuarmi utaqqipput. Sungiusarnermilu ajunaartuusaartut pingasut aamma utaqqillutik.
Sungiusarneq naammassisorineqarpoq.
Tilioq Nuummut aallalersorlu peqataasunit allanit nalunaartoqarpoq amigaateqartoqarnerarlugu. Aamma tassani eqqunngitsoqarpoq.
Inuit marluk tammaaneqarput, tamarmillu umiarsuarmiinngillat, sorsuutiniinngillat, qulimiguulimmik qimagutsinneqarsimanngillat Royal Arctic Linelluunniit umiarsuaaniinnatik.
Peqataasut tamarmik inuit taakku marluk, immamut nakkarsimatittuusaassallugit ullaakkut nakkartinneqarsimasut, akunnerit sisamat tullii ujarpaat.
- Qulingiluat missaanni nakkartinneqarput, anorlerlunili mallermat sumut tamaanga tissukarsimasinnaapput, Tiliumi kaptajni Poul Jensen oqarpoq.
Tiliuminngaanniit Triton Ejnar Mikkelsenilu ungasissumi kaaviaartut takuneqarsinnaapput. Akornanni politiit umiatsiaat sangujoraarluni ujaasisoq Issittullu Sakkutooqarfianit timmisartoq challengeri qulaavaasoq takuneqarsinnaapput.
Tammaaneqartulli nassaarineqanngitsoorput akunnerillu sisamat ujaasereermata, sungiusarneq naammassineqarpoq.
Nuummut utermata ujaasineq kingulleq sungiusarnerup ilagigaa nalunaarutigineqarpoq, tamannalu nunamiittut kisimik nalunngilaat. Tassami sungiusartoqarneratulli, piviusumik annaassiniarnerit ujaasinerillu taama ajornanngitsigineq ajorput.
Sungiusartoqangaatsiarnissaali sooruna pingaaruteqartoq?
- Tamanna pingaaruteqarluinnarpoq. Ujaasineq annaassiniarnerlu suliassatta pingaarnerit ilagaat. Issittumi Sakkutooqarfiup imaatigut ujaasineq pingaarnertut akisussaaffigaa, politiillu sinerissap qanittuani nunamilu akisussaasuullutik. Suliaqarfiillu tamarmik akornanni ataqatigiissaarinermik sungiusarnissaq pisariaqarpoq, Flotilleadmiral Lars Nielsen oqarpoq.
- Suliaqarfiit sungiusarsimanissaat sungiusallattaanissaallu aamma pisariaqarpoq, taamaalilluta pisariaqarfissaanut piareersimassalluta.
